Read Angguruk Yali EZRA 1 Bible Online

EZRA 1 - Angguruk Yali bible

EZRA 1

¹ O Persia ahun Kores ino ap suwon lahibahon mo ino fam NINIKNI Allahn hun Yeremia feneyen ibag ane hikir amag ulug Kores indi kahaltukmu Kores inowen o pumbuk obog tohowen holukag ulug suwesingga eke haharoho imbibag. Haharoho imbibag ane tu,

²”An Kores o Persia hinap honoweyen nele uruk lahiyon tu holeg lamek: NINIKNI Allah Poholmon inowen o pumbuk kinang atogman atogma werehon obog toho an ninggikmu og nitisireg Aren an nubam hiyag nutuk lit, ’Yehuda kinang fam o Yerusalem An nunuk wel naptuk lamuhup ibam wiruhun,’ ulug hiyag nitisi.

³Ari fahet hit winon Yahudi hinap Allah umalikisi welahebon Hinikni Allahn fet henesugmu hit hinibam o Yerusalem tam welatikip ambeg suhuloho lahupteg Israel hinap HINIKNI o Yerusalem werehon ino wel turuk ibam wiri fuhup.

⁴Yahudi inap obog toho hit Persia hinap seheli ke hik isarusama ap pohon hag toho werehon arimano inibam larukmu hit wal taneg iniraham welahebonen perak ili ruruk angge men emas umbagpag turuk angge men wam men fano-fano angge winon oho og isahupteg nin winon eke Allah wel turuk ibam witukon fahet hit hinindi henehiyeg toho og isahupmu lahup,” ulug haharoho imbibag ane ino o Persia pumbuk obog toho walinggoho hiyag isil libag.

⁵Hiyag isil libagma Yehuda inap onowesi men Benyamin inap onowesi men Allah fahet hubu lahaptuk inap imam oho Lewi inap oho it arimano Allahn hinibam o Yerusalem suhuloho lahupteg An wel naptuk ibam wibuhup ulug inindi anggarap eneptuk latfagma ninibam lahuk ulug o welatfag ke wal taneg enenggengge tug taruk latfag.

⁶Tug tarukmu Persia inap it iniraham ke welatfahonen perak ili ruruk angge men emas umbagpag turukon men fano-fano angge winon oho wam oho og isibareg nin winon sebe roho inindi enehiyeg toho Allah wel turuk ibam witukon fahet og isibag.

⁷Og isibagma ap suwon Kores inowen at anggengge foroho ahun Mitredat hiyag utuk lit, ”NINIKNI Allah ibamen foroho angge indam Nebukadnezaren o Yerusalemen hilalug watfareg aren nikni ulug wel turuk ibam imbik kibahon arimano wili fusuhunteg Yahudi inap hebeloho og isahun,” ulug hiyag itfagma aren wilip isibahon arimano obog toho Mitredat inowen Yehuda kinang senehon Sesbazar fahet suwesingga fam haharoho imbibag.

⁹Wili fisibahon tu: Kubag iya rebelug hubu lahaptuk angge emas fam witfahon teng misigmen nubam hilag hinahan 30, perak fam witfahon teng-teng angge 1.000, kubag winon teng misigmen nubam hilag piren 29,

¹⁰kubag ik naruk angge emas fam witfahon 30, perak fam witfahon teng-teng angge 410, o aliliyangge lahaptukon winon teng-teng angge 1.000 wili fisibahon arimano obog toho

¹¹teng-teng angge winahuk fug toho 5.400 Sesbazar ino og itfagma Yahudi inap o Babilonia hik isibahon arimano o inowen wilip atug laruk lit Sesbazar inowen o Yerusalem walug libag.