Read Angguruk Yali EZRA 10 Bible Online

EZRA 10 - Angguruk Yali bible

EZRA 10

¹Ezra inowen Allah ibam owahalma elenggen fam hur atug uba nim-nim siyag ane turuk latukuk ulug sembahyang urukmu itano Israel inap abet hiyabet maliket anggolo roho at iraham luhal arik watfareg enele hum toho uba yatuk latfag.

²Ari roho turuk lit hun Elamen ondohowonen ondohowon Yehiel amloho Sekhanya inowen Ezra fam, ”Niren hiyap o winamon hilaruk lit Ninikni Allah nenembol yig utuk latukuk. Ari roho turukukon fahet siyag ala angge famen nit Israel ninap nonoluk welamuhuk ane fahet turuk lamuhukon tu:

³Haren fano komo nenebehenma ap Ninikni Allahn ele urukon fahet enekol toho werehonen oho fano pehesama hiyap o winamon hilaruk latukukon men unumalikisi indag taruk latuson men obog toho yanggal enebuhuken ketiya eneg Ninikni Allah fam sali umbul. Allah wene haharoho imbibahon hikit toho tulen maniyek!

⁴Ari fahet Ezra, nikni, haren eneg alem ari haloho umbuk teg lahenma in atug hine roho timihin! Nit aruma hat hiraham wereg lit let henebul!” ibag.

⁵Ibagma Ezra ino in atfareg imam onowesi men Lewi inap men Israel inap luhaleg latfahon arimano obog toho unubam, ”Hun inowen ehekon hikit toho tuhuken hele tem toho iyek!” ulug hiyag isibagma iren tem toho tuhuk ulug sali imbibag.

⁶Sali imbibagma Ezra ino Allah ibam owahalman Allah ibam iraham hili witfahon hun Elyasib amloho Yohananen tohon fam kibareg Yahudi inaben Allah enembol yig utuk latfag ane fahet indi siyahen ik suburu na fug angge weregman hup atfagma nohibag.

⁷Nohibareg Ezra inowen Yahudi inap o Babelen suhuloho inibam waharuson obog toho o Yerusalem palu arik wamuhuben o Yerusalem men Yehuda kinangma men hiyag isil lahup ulug ap mon enepfag.

⁸Mon enepfagma, ”Ap sa watmin fug ulug hup hinahanam pok aruhu halug nonowesi men fet nenesug inap menen kong toho emberuson hikit toho Yahudi ninap o Babelen suhuloho waharukukon sehelimuwen yanggaltuk lit at anggengge obog toho hilahuk,” ulug ap obog toho hiyag isil libag.

⁹Libagma pikalem sohowon fam hup likin fimahen atfagma ununggul unuk Yehuda inap men Benyamin inap men obog toho amusun tuk fug angge o Yerusalem palu arik watfag. Watfareg Allah ibam owahalma heriyegman osit humon naruken yuk-yuk angge turuk lit alem angginon nunubam werehon haltul ulug enekolen elek-elek turuk latfag.

¹⁰Ari roho weregma imam Ezra ino in atfareg ele uruk lit, ”Hiren hiyap o winamon hilaruk lit Allah henembol yig utuk latikip. Yig utuk lit nit Israel ninaben siyag ane anggolo turuk latukukon emberimu siyag ane ari imbik laharikip.

¹¹Ari fahet ketiya NINIKNI Allah nunumbasiyen oho wel turuk latfahon alukeman siyag ane turukuk ilihipteg Allahn fano peruk ane hikit toho ap o winamon nit sehelimu werehon men mangno roho welamuhuk fuhen hiyap o winamon hilarikibon arimano umbusuhup,” ulug hiyag isibag.

¹²Hiyag isibagma ap obog tohowen enele hi roho, ”Haren ehenon hikit toho tuhuk,” ibag.

¹³Ibareg nin enele uruk lit, ”Nit nenebe anggolo welaheyon osit naruk li ariya selma welam fug teg lahe. Nit anggolowen alem ari turukuk angge re hup misig piren fam haluk fug teg lamuhuk.

¹⁴Ari fahet nit ninibam lulmu nonowesi eneg pok atuk lit nit nununuk fam alem ari haltuk lamuhup. Pok atuk lit nonowesi arimanowen ap hiyap o winamon hilaruk latuson obog toho wal-wal wol eneptuk lamuhupmu nonowesiyen wal taneg hiyag isahup li enembeg tuma waharuk lamuhup. Waharuk lit inibam man-man o pumbuk onowesi roho werehon men alem haltuk inap men ambiyeg waharuk lamuhupmu alem unubam werehon haloho emberuk lamuhup. Ari roho turukmen eneg Ninikni Allahn nit nunubahet olok haruk ane eleg aruhu,” ibag.

¹⁵Ari ibahon fahet ap obog tohowen fano ehe perukmen we hun Asael amloho Yonatan men hun Tikwa amloho Yahzeya menen hiren ehebon ari siyag ibagma Lewi inap Mesulam men Sabetai menen it inibil atfag.

¹⁶It inibil atfag angge famen Yahudi inap o Babelen suhuloho watfahon arimanowen nenele eheyon hikit toho tul uruk latfag. Ari ibagma imam Ezra inowen ununggul unuk onowesi enesehelimuwon mumal enepfareg ununuk wal taneg uruk lit wol enepfagma at iraham watfareg pikalem numon ket inam atfag sambil alem Israel inap unubam werehon haltuk ane ak tibag.

¹⁷Ak tibareg ap hiyap o winamon hilaruk latfag ane haltukmen eneg pikalem atamon inam atfag sambil alem obog toho haloho imbibag.

¹⁸Ap hiyap o winamon og enesug latfahon arimanowen nunuhesi umbusuhuken nenele tem toho uruk lahe ulug onowesi ininggik sen enepfareg siyag ane turukukon eleg amag ulug Allah fahet wam domba yuhambukon waroho yaltuk latfag. Ap hiyap o winamon hilaruk latfahon ununuk tuma ul: Allah amingmingangge imam: hun Yozadak amloho Yesua ori menen ondohowonen ondohowon Maaseya, Eliezer, Yarib, Gedalya men; hun Imer inowen ondohowonen ondohowon Hanani men Zebaja men; hun Harim inowen ondohowonen ondohowon Maaseya, Elia, Semaya, Yehiel, Uzia men; hun Paskur inowen ondohowonen ondohowon Elyoenai, Maaseya, Ismael, Netaneel, Yozabad, Elasa men. Lewi inap: Yozabad, Simei, Kelaya unuk eke Kelita ino, Petahya, Yuda, Eliezer men. Sini yunggultuk ahun: Elyasib Allah ibam sok foroho inap: Salum, Telem, Uri men. Israel inap winon: hun Paros inowen ondohowonen ondohowon Ramya, Yezia, Malkia, Miyamin, Eleazar, Malkia, Benaya men; <pb(...)

⁴⁴It arimano obog tohowen hiyap o winamon og enesug latfahon unumalikisi indag enepfahon men lalihip ulug imbisibag.