Read Angguruk Yali EZRA 3 Bible Online

EZRA 3 - Angguruk Yali bible

EZRA 3

¹Israel inap Babelen wilip atug Yehuda kinang fam suhuloho watfareg pumbuk wal taneg weregman pikalem sabiron ket inam atfag sambil ino it obog toho o Yerusalem palu arik watfag.

²Watfagma hun Yozadak amloho Yesua ori Allah fahet hubu lahaptuk inap imam arimano men Sealtiel amloho Zerubabel ori menen Allah amingmingangge Musa inowen haharoho imbibahon hikit toho Israel ninap Ninikni Allah fahet wam waroho yaltuk lamuhuk ambeg ulug helep sengget watfag.

³Kinang yug inap fahet enekol toho wereg lit Allah fahet wam waroho yaltuk ambeg ino tam wirig latfag ambeg witfareg hupmu men likiya men NINIKNI Allah fahet wam waroho yaltuk latfag.

⁴Lekman o sabo wiroho nohil laruk latfag ane fahet wenggel haruk sambil oho Musan haharoho imbibag ane roho Allah wel turuk lit likiya hupmu At fahet wam waroho hubu lahaptuk lamuhup ulug imbibahon hikit toho hubu lahaptuk latfag.

⁵O itano li ak tibareg likiya hupmu wam waroho yaltuk lit pikalem keron inam atuk sambil oho NINIKNI Allah wel turuk lamuhup ulug imbibag sambil oho enepeleg am fug angge wereg lit nin winasul oho inindimuwen NINIKNI Allah fahet sebe roho emberuk latfag.

⁶NINIKNI Allah ibam olun uwan oho elegma pikalem sabiron ket inam atfag sambil ino ak tibareg NINIKNI Allah fahet hubu lahaptuk latfag.

⁷Persia inap onowe Kores inowen hiyag isibag ane hikit toho Yahudi inaben o wituk inap men helep waruk inap men Allah ibam wibuhup ulug uang og isibareg o Sidon inap men Tirus inap menen e sin tom Libanon famen ik saho ahik ahum pali keyen o Yafo walug lahup ulug onggo suburu men ik unduk fanowon men e zaitun ahaluwe minyak men og isibag.

⁸Yahudi inap o Babelen Allah ibam welatfag ambeg o Yerusalem suhuloho watfareg weregman mo piren libagma pikalem pirenehon fam hun Sealtiel amloho Zerubabel men Yozadak amloho Yesua men onori winon Allah fahet hubu lahaptuk inap imam arimano men nin Lewi inabet it o Babelen hik isibag ambehen suhuloho watfahon arimano obog tohowen NINIKNI Allah ibam wibuhuk ulug ak turuk lit o wituk inap fano roho wibuhuben kim isaruk lamuhup ulug Lewi inap enebe toron embeselug we kabiniyon indag tibag sali mo ilig am wirig am turukmen likin fimahen atukon famen pali filon eneg hiyag isibag.

⁹Ari ulug hiyag isibagma Lewi ahun Yesua umalikisi ori men, hun Kadmiel umalikisiyet oriyet Hodawia inap arimano men NINIKNI Allah ibam fano roho wibukag ulug kim isaruk lit weregma Lewi ahun Henadad umalikisi onori menen oho ambiyeg kim isaruk lit welatfag.

¹⁰O wituk inaben NINIKNI Allah ibam uwag pilapfag sambil ino imam arimano imamen wan turuk asum wan tibareg pinggong seneg lit uwag pilapfag ambeg iraham in arik watfagma Lewi inap Asaf umalikisi oho waruk seneg lit watfareg Israel inap tam fet enesug latfag ahun Daud inowen imbibag ane hikit toho NINIKNI Allah wel turuk latfag.

¹¹Wel turuk lit, ”At fanowonen Israel ninap indi nenesugmen eneg welaruhu,” ulug NINIKNI Allah hi ruruk asini ap misihen wiliptukmu winonen aluwag leg haruk latfag. Leg harukmu ap obog tohowen NINIKNI Allah ibam uwag pilapfahon fahet enele hi roho NINIKNI Allah unuk suwap turuk lit enehiyehen ngik-ngog turuk latfag.

¹²Ap anggolo enehiyehen ngik-ngog turukmu imam inap men Lewi inap men Yahudi inap iniknisi enebe sabalon Allah ibam tam wirig latfahon uwan halog tuk fugmu haruk latfahon arimanowen Allah ibam keron uwag kilaptukmu yet enesug lit o tamon fahet wenggel hibareg enele ine roho uba yatuk latfag.

¹³Uba yatuk ano enehiyehen yunggultuk ano ulug aben fuki roho hol ha fug tegma ap obog tohowen enele ngik-ngog turukmu enele yatman oho holtuk latfag.