Read Angguruk Yali EZRA 4 Bible Online

EZRA 4 - Angguruk Yali bible

EZRA 4

¹Welatfagma Samaria inap Yehuda inap men Benyamin inap men hili roho welatfahon arimanowen hol harukmen Israel inap o Babelen wilip atug inibam suhuloho waharuson arimanowen INIKNI Allah fahet o eke wituk urukmu holfareg.

²Samaria inap arimano Zerubabel men Israel inap onowesi men enembeg libareg hiyag isaruk lit, ”Asyur inap onowe suwon Esar-Hadon inowen nit tuma og eneplug nunumbahik watfag liyen tulug niren oho hit Hinikni Allah fam wenggel haruk lit At fahet wam waroho hubu lahaptuk lahe. Ari fahet niren hit men ambiyeg o aru wibuhuken wahe,” ibag.

³Ari ibagma Zerubabel men Yesua men Israel inap onowesi winon arimano menen hiyag isaruk lit, ”Nit men hit men ambiyeg Ninikni Allah fahet o aru wibuk fug teg lahe. O Persia inap onowe suwon Kores inowen hiyag nisarisi ane hikit toho nit nenemuwen Israel ninap NINIKNI Allah fahet o aru wibuhuk,” ibag.

⁴Ari ibagma ap o Yerusalem walinggoho welatfahon arimanowen Yahudi inap o Babelen suhuloho watfahonen Allah ibam wituk ane umbusukag ulug enele ying eneptuk latfag.

⁵Ari roho eneg turuk lit o Persia inap onowe Kores oluk welatfag liyen tulug ubalmangge Darius ap suwon lahibareg welatfag li oho ap arimanowen Yahudi inaben tuhuk peruk ane apmayap tukag ulug Persia inap onowe suwon otsi fano-fano angge og isaruk latfag.

⁶Hun Ahasweros ino we ket eneg o Persia inap onowe suwon lahibagma Yehuda inap men seli roho welatfahon arimanowen Yehuda inap men Yerusalem inap men alem unubam lombog enebul ulug Ahasweros fahet suwesingga eke haharoho imbibag.

⁷Welatfagma hun Artahsasta ino o Persia inap onowe suwon lahibagma at otsi Yehuda kinang fam welatfahon Bislam, Mitredat, Tabeel, onori winon menen Yahudi inap alem unubam umbuhuk ulug Aram inap enele men suwesingga hahatuk ane men hikit toho inikni Artahsasta fahet suwesingga eke haharoho imbibag.

⁸Welatfagma kinang Samaria seneg ahun Rehum men, at let turukon suwesingga hahatuk ahun Simsai menen o Yerusalemen teko libag ane fahet inikni Artahsasta fahet suwesingga haharoho imbibahon tu,

⁹”Suwesingga aru emberuk laheyon ulon tu: Rehum men Simsai men, nonori alem haloho emberukon men, hat hotsi o Erekh kinang famon, Babel kinang famon, o Elam inap o pumbuk Susan famon men,

¹⁰ap o pumbuk winon Asyur inap onowe Asnapar unuk suwon inowen og eneplug o Samaria kinang men ik Efrat hubula fil men imbisik libahon arimano menen hat hiyag humul peruk laheyon tu:

¹¹Nit hat humalikisi ik Efrat hubula fil welaheyonen hat ap suwon Artahsasta hi haptuk lahe.

¹²Yahudi inap arimano hat hangginang famen wilip atusareg inibam nit welahe ambeg o Yerusalem waharusa. O Yerusalem inap arimanowen siyag ane til-wil laruk lit ap obog toho enele ying eneptuk latfag ane ari fahet hun Nebukadnezaren o Yerusalem halog toho lin isibag ambeg ino nin wibuhuk ulug olun warusareg elehet obog toho wahuk ulug turuk ane fahet hat holuk toho welamin!

¹³O pumbuk ari nin wituk lit elehet walinggoho kilabehon obog toho wahup halug ap arimanowen hat ap suwon nungge-nungge og humon og hutuk lamuhup fugmu hat hanggengge tor aruhu.

¹⁴Nit hat men nininggik ahandip toho welamuhuk ulug sali emberukuk angge re aben hat siyahap haptukmu yet hiyalug nininggik lebe ruk fug angge welam fug teg lahe. Alem ari fahet suwesingga aru hat fahet emberuk lahe.

¹⁵Suwesingga hat hiknisi humbasi menen mun ane man ane teko libag ane obog toho haharoho emberuk latfahon fam fuki roho yami rurukmen o Yerusalem inap fahet hahareg ane kim hahuben hotsi hiyag isamihin. Hahareg ane ariyen o Yerusalem inap unubabut fahet holuk aruhu. Ap arimanowen ap suwon it fet enesuhon enele holuk fug angge indamen tulug ketiya oho ap suwon nit sen nenesuhon enepma welamuhuk fug ulug enele ying eneptukmen eneg wereg. Enele ying eneptuk ane ari fahet ayeg waroho inibam o Yerusalem ino halog tibisibag.

¹⁶Ari fahet niren ulon hat ap suwonen holeg lamin: O Yerusalem ari nin wituk lit elehet walinggoho kilabehon obog toho wahup halug kinang ik Efrat hubula filon haren seneg lahenon obog toho hat hinggikmuwen taluk toho hilahup,” ulug suwesingga fam hiyag itfag.

¹⁷Hiyag itfagma ap suwonen hebeloho suwesingga haharoho emberuk lit, ”Nori, Rehum o Samaria kinang seneg lahenon men, Simsai suwesingga hahatuk lahenon men, hit honori o Samaria men ik Efrat hubula fil men welahebon hinindi fano welamuhuben hi heneptuk lahi.

¹⁸Suwesingga hiren an fahet emberikibon ino notsiyen kim halug nit nenele roho hiyag nutukmu fuki roho holtikik.

¹⁹Holtikikmu anden notsi hiyag isarikik ane hikit toho suwesingga ap suwonen turuk latfag ane fahet haharoho imbibahon fam yami rurukmen o Yerusalem inap fahet hahatfag ane hiyaharusa. Hahatfag ane ari kim harukmen ap arimanowen indamen tulug ketiya oho ap suwon it fet enesuhon enele holuk fug angge it enepma welamuhuk fug ulug enele ying eneptukmen eneg wereg ane nonoluk atisi.

²⁰Indam o Yerusalem ino ap suwon inine anggolo reg lit kinang ik Efrat hubula fil werehon obog toho senegma unumalikisiyen nungge-nungge og isawon subangge roho og isaruk latfag ane oho nonoluk atisi.

²¹Ari fahet o Yerusalem ari nin wibuhup fug ulug hiyag isahup. Anden wibuhup uhuk halug eneg wiri fuhup.

²²Ap arimanowen an ap suwon siyahap nabuhup tohon hiren amusun tuk fug angge ihiyon ari hikit toho folo-folo hiyag isahup,” ulug suwesingga fam haharoho imbibag.

²³Suwesingga o Persia inap onowe suwon Artahsasta inowen haharoho imbibahon ino kim halug hiyag isibagma itano Rehum men Simsai men onori menen enesehen seneko o Yerusalem libareg Yahudi inap hiyag isaruk lit, ”Ninibam o pumbuk aru wituk lahep ane umbusuhup. Umbusuhup fug halug hunusuhuk,” ibag.

²⁴Ari ibagma o Yerusalem inaben Allah wel turuk ibam wituk latfag ane imbisibag. Allah ibam wibuk fug angge weregman eneg hun Darius o Persia inap onowe suwon lahibagma mo ilig am wirig am turukmen piren atfag.