Read Angguruk Yali EZRA 5 Bible Online

EZRA 5 - Angguruk Yali bible

EZRA 5

¹Welatfagma Allah amingmingangge nabi piren itano Hagai men hun Ido amloho Zakharia men in atfareg Yahudi inap o Yerusalem men o Yehuda kinang men fam welatfahon unubam Allah Israel inap Inikni unuk fam enele hiyag isaruk latfag.

²Hiyag isaruk latfagma hun Sealtiel amloho Zerubabel men Yozadak amloho Yesua menen o Yerusalemen Allah wel turuk ibam wituk ane imbisibahon ino nin ak tibag. Allah ibam ino witukmu nabi itano it iniraham wereg lit inindi inineyap eneptuk latfag.

³Ari roho turukmu hun Tatnai kinang ik Efrat hubula fil werehon seneg latfag ahun ino men hun Syetar-Boznai men onori men o Yerusalem watfareg, ”O aru wibuhup ulug san hiyag hisarisi?” ulug kapal isibag.

⁴Kapal isibareg nin enele uruk lit, ”Hit milal heneptukon ununuk sa-sa wereg?” ulug umung isibag.

⁵Ari ulug umung isarukmen Allah inowen Yahudi inap onowesi let enepmin ulug ap enembeg watfahon inindi kahal enepfagma iren Allah ibam wituk ane umbusuhup pibag angge famen ninikni ap suwon Darius fahet suwesingga fam hiyag umulteg aren hebeloho hiyag nisahu ane nonoluk aruhu halug eneg Allah ibam wituk ane umbusuhup ano ulug ninindimu wenggel haruk lamuhuk,” pibag.

⁶Ari pibareg Tatnai men Syetar-Boznai men onori ap suwon unuk fam ik Efrat hubula fil iniyabuk witukon menen inikni Darius fahet suwesingga haharoho imbibahon tu,

⁷”Ninikni Darius, hat ap suwon hindi fano roho welaruhun ulug hi haptuk lahe.

⁸Nit o Yehuda kinang pen ha larukuk ane hat ap suwon holuk toho welaruhun ulug niren hiyag hutuk laheyon aru holeg lamin: Larukukteg Allah unuk suwon wel turuk ibam helep humon palehon fam wituk lit o ubahat helep altap hinahan men e altap misig men fam witil laharukmu yet isarukuk. Ininggik fano reg lit mun ane man ane fuki roho witukmen eneg o ino folo-folo wiri fuhup.

⁹Ari turukmu yet isarukukteg niren, ’O aru wibuhup ulug san hiyag hisarisi?’ ulug kapal isarukuk.

¹⁰Kapal isarukukteg it milal eneptukon ununuk arimano hat fahet suwesingga fam haharoho umbul ulug, ’Hit sa-sa welahep?’ ulug umung isarukuk.

¹¹Umung isarukukmu iren hebeloho hiyag nisaruk lit, ’Nit Allah pohol ha kinang ha wal tibahon amingmingangge wereg lit Ninikni Allah fahet o aru nin hebeloho wituk lahe. Indam Israel ninap nonowe unuk suwon ekeyen o aru wiri fibag angge famen

¹²nunumbasi arimanowen Ninikni Allah Poholmon ino indi siyahap turuk latfagma indi oloken o Babilonia inap onowe suwon Nebukadnezar inggikmu imbibagma Allah wel turuk ibam aru halog tibisibareg nunumbasi arimano ininggik hele waroho o Babilonia kinang fam imbisik libagma welatfag.

¹³O Babilonia kinang fam weregman eneg hun Kores o Persia inap onowe suwon laharisiyon mo atamon fam aren nit nunubam, ’Hinikni Allah wel turuk ambeg nin hebeloho wiri fuhuben hinibam lalihip,’ ulug hiyag nisarisi.

¹⁴Ari ulug hiyag nisarisireg Ninikni Allah ibamen foroho angge emas perak men indam Nebukadnezaren o Yerusalemen hilalug watfareg aren nikni ulug wel turuk ibam imbik kibahon arimano wili fisibareg hun Sesbazar ap suwon Koresen Yehuda kinang seneg laruhun ulug lahapfahon ino og itfag.

¹⁵Og utuk lit, ’Emas perak fam wirig angge aruma walug o Yerusalemen Allah wel turuk ibam imbik lahun. O ari halog tibisibag angge re tam wirig latfag ambehen nin hebeloho wiri fuhuben hiyag isahun,’ ulug hiyag itfag.

¹⁶Hiyag itfag ane ari hikit toho Sesbazar ino o Yerusalem waharisireg Allah ibam uwag pilaptisi. Pilaptisi sambilen tulug ketiya oho Yahudi inap arimanowen o ari witukmen eneg fobik eneg obog toho wiri fuhup.

¹⁷Ari fahet hat ap suwonen fano puhun halug ap suwon Kores inowen we tem toho Yahudi inap hiyag isaruk lit, ’O Yerusalem Allah wel turuk ibam wiri fuhuben lalihip,’ ulug hiyag isarisi ano ulug nonoluk aruhuwen suwesingga foroho ambeg o Babel werehon ino fam hun Koresen suwesingga fam hahatisi ane ari wereg ano ulug yami ruhuben hotsi hiyag isahun. Ari roho tuhunteg haren alem ari fahet fano tukag puhun ane hiyag nisahun,” ulug suwesingga fam hiyag itfag.