Read Angguruk Yali EZRA 6 Bible Online

EZRA 6 - Angguruk Yali bible

EZRA 6

¹Ari ulug hiyag itfagma Persia inap onowe suwon Darius inowen, ”Suwesingga Kores inowen o Yerusalem Allah ibam wibuhup ulug haharoho imbibahon ino o Babilonia suwesingga winon foroho ambeg yami rilihip,” ulug otsi hiyag isibag.

²Hiyag isibagma yami ril libareg kinang Media fam o Ahmeta suwesingga ino weregma hiyahibag. Suwesingga ino fam haharoho imbibag ane tu,

³”Hun Kores o Persia inap fahet ap suwon laharisiyon mo atamon fam aren ele uruk lit, ’Israel inaben o Yerusalemen Inikni Allah fahet wam waroho hubu lahaptuk ambeg ulug At ibam halog tibahon ino nin hebeloho wibuhup. O wibuhubon ino lahabeg wirim tuhubon il teng misig 27 meter tubuhup, nunggulig wirim tuhubon oho il teng misig 27 meter tubuhup.

⁴O ubahat helep altap hinahan men e altap misig men fam witil lahakup. O wibuhubon fahet onggo an ap suwon Persia inap onowe inowen og isahuk.

⁵Allah ibam foroho angge emas men perak men fam wirihon Nebukadnezaren o Yerusalemen walug watfahon arimano oho hebeloho og isahukmu Allah ibam tam foroho latfag ambeg o Yerusalem imbik lahup,’ irisi,” ulug suwesingga fam haharoho imbibag.

⁶Suwesingga ino fam hahareg latfag ane ap suwon Darius inowen kim hibareg ot Tatnai ino men are Syetar-Boznai men onoriyet kinang ik Efrat paloho hubula fil wereg inap sen enesug latfahon arimano fahet suwesingga eke haharoho imbibahon tu, ”Nori, Yahudi inap sen enesuhon ino men onowesi suwon menen Allah ibam tam wirig latfag ambeg fano wibukag ulug o wituk ambeg la fug angge enele ying eneptuk lamuhup fug.

⁸Nin eke anden hiyag hisaminon tu: Yahudi inaben Allah ibam witukon fahet onggo hunumalikisi ik Efrat paloho hubula fil wereg inaben hit hininggikmu emberukon musun tuk fug angge minggiroho winon og isaruk lit let eneptuk lamuhup.

⁹Imam inap o Yerusalem werehon arimanowen wam sapi yuhambukon, domba suwon toron Allah Poholmon fahet waroho yaltukon men, suburu roti anggen, saho, ik anggur ahaluwe unduk fanowon, ahaluwe suburu inggila esetuk angge arimano men og nisahup ulug heng henebuhup ane hikit toho likiya hupmu og isaruk lamuhup.

¹⁰Henepeleg am fug angge og isaruk lamuhupmu iren likiya hupmu Ninikni Allah Poholmon indi fanowap tul ulug wam waroho hubu lahaptuk lit an ap suwon numalikisi men fahet oho sembahyang uruk lamuhup.

¹¹Nin eke iminon tu: Ap san nele uruk lahiyon tu pisan tuhu halug ap ino inggareg ibam uwag misig heneko walug ambiyang hilinggi felug ap ino hak tubusuhupmu ahako folok toho wilip aruhu. At ibam oho halog toho hik isahup.

¹²Ap suwon men pumbuk wal taneg werehon menen anden ihiyon aru pisan isalug o Yerusalemen Allahn an nunuk wel naptuk lamuhup ulug mumal tarisi ambeg wirig ibam ino halog toho siyaha fusuhup halug Allahn unusuhu. An Dariusen uruk lahiyon il misig oho umbusuk fug angge hikit toho turuk lamuhup,” ulug Darius inowen haharoho imbibag.

¹³Ik Efrat paloho hubula fil welatfag inap sen enesuhon Tatnai men hun Syetar-Boznai men it onori winon menen Darius inowen suwesingga fam haharoho imbibag ane kim hibareg hikit toho turuk latfag.

¹⁴Turuk latfagma Allah amingmingangge nabi Hagai men hun Ido amloho Zakharia menen inindi enehiyehap eneptukmu Yahudi inap onowesiyen Allah ibam witukmen eneg Israel inap Inikni Allah men Persia inap onowesi suwon Kores, Darius, Artahsasta menen hiyag isibag ane hikit toho wiri fibag.

¹⁵Hun Darius ap suwon weregman mo fuwaben libagma mo keron fam pikalem pirenehon inam atfagma[4] Allah ibam obog toho wiri fibag.

¹⁶Wiri fibareg imam inap men Lewi inap men Israel inap obog toho o Babelen suhuloho watfahon arimanowen enehiyeg toho Allah ibam sok husibag.

¹⁷Sok husuruk lit wam sapi teng uhan 100, wam domba teng likinen 200, wam domba umalik teng-teng angge teng nisanggo fumahen 400 Allah fahet waroho yaltuk lit Israel ninap obog tohowen siyag ane turukukon elehap timisi ulug it ununggul unuk nisanggowen welatfahon hikit toho wam kambing nisanggowen waroho hubu lahaptuk latfag.

¹⁸Hubu lahapfareg Musan suwesingga fam haharoho imbibahon hikit toho imam inap oho Lewi inap oho wal taneg palu enepfareg Allah ibam o le ke yabuk wal taneg waruk lamuhup ulug hiyag isibag.

¹⁹Mo atamon libagma fobikon fam pikalem misig larukmu hup nunggul hurikenam welatfareg Israel inap o Babelen suhuloho watfahon arimanowen seni Paskah esetfag.

²⁰Esebul ulug turuk lit imam inap men Lewi inap men ninindi hal atmisi ulug enehap ik fam umatfareg Lewi inaben it ininggareg men onori imam inap men o Babelen wilip atfahon arimano unubahet oho wam domba umalik watfag.

²¹Waroho esetfareg Israel inap o Babelen suhuloho watfahon arimanowen seni Paskah nibag. Narukmu kinang yug inap it onori menen siyag-siyag ane turuk latfahon embeselug Israel inap INIKNI Allah wel turuk lamuhuk ulug Israel inap men mangno roho welatfahon arimanowen oho seni Paskah ambiyeg naruk latfag.

²²Seni Paskah nibareg suburu roti suwap turuk angge ragi embeselug wirahowon naruk lit yunggultukmen eneg hup sabirenam atfag. NINIKNI Allahn Persia inap onowe suwon indi kahalfagma[5] ap suwon inowen let eneptukmu Israel inap Inikni Allah ibam wiri fibag ane fahet Israel inap enehiyehen yunggultuk latfag.