Read Angguruk Yali EZRA 7 Bible Online

EZRA 7 - Angguruk Yali bible

EZRA 7

¹Welatfagma hun Artahsasta Darius ubalma Persia inap fahet ap suwon lahapfag li imam onowe suwon Harunen ondohowonen ondohowon Ezra ino o Babel welatfag. Hun Ezra umbasi ununuk tuma emberuk lahe: Ezra ikni Seraya, Seraya ikni Azarya, Azarya ikni Hilkia,

²Hilkia ikni Salum, Salum ikni Zadok, Zadok ikni Ahitub,

³Ahitub ikni Amarya, Amarya ikni Azarya, Azarya ikni Merayot,

⁴Merayot ikni Zerahya, Zerahya ikni Uzi, Uzi ikni Buki,

⁵Buki ikni Abisua, Abisua ikni Pinehas, Pinehas ikni Eleazar, Eleazar ikni imam inap onowe suwon Harun welatfag.

⁶Harun umba Ezra inowen Israel inap INIKNI Allahn komo eneptuk latfag ane Musan haharoho imbibahon obog toho oluk teg latfag. Oluk teg lit weregma NINIKNI Allahn indi harukmu Persia inap onowe suwon inowen Ezran heng turuk latfag angge obog toho og utuk latfag.

⁷Hun Artahsasta ap suwon weregman mo falfaliken libareg sabiron fam Ezra ino o Babel embeselug o Yerusalem suhuloho libag. Larukmu Israel inap winon imam inap, Lewi inap, sini yunggultuk inap, Allah ibam sok foroho inap, Allah ibam o le ke yabuk waruk inap winon oho at men o Yerusalem libag.

⁸Pikalem misihon ket inam atukmu Ezra ori men o Babelen wilip atfareg kema larukmen Inikni Allah inggik ineyonen let enepfagma pikalem fuwabon ket inam atukmu o Yerusalem kibag.

¹⁰Kibareg Ezra inowen Musan haharoho imbibahon likiya hupmu indi pulmu roho wenggel haruk lit inggarehen oho hahareg ane hikit toho turuk lit Israel inap winonen oho NINIKNI Allahn komo eneptuk latfahon turuk lamuhup ulug amul eneptuk laruhuk peruk latfag.

¹¹Imam Ezra Allahn Israel inap komo eneptuk latfag ane fuki roho haruk latfareg oluk teg latfag ahun ino fahet Persia inap onowe suwon Artahsasta inowen suwesingga haharoho imbibahon tu,

¹²”An Artahsasta ap suwon obog toho onowe welahiyonen imam Ezra Allah Poholmonen komo eneptuk latfahon holuk teg hahun

¹³hubam nele hiyag hutuk lahiyon tu: Imam inap, Lewi inap, Israel inap winon an nangginangma wereg lit o Yerusalem suhuloho lahuk perukon obog toho hat men ambiyeg lahup.

¹⁴An notsi let naptukon sabiren itano menen hat mon haptuk lit Yehuda inap oho o Yerusalem inap oho enembeg lahunteg Allahn komo eneptuk latfag ane haren seneg lahenon hikit toho turuk ano ulug isa lahunen mon haptuk lahe.

¹⁵An notsi let naptukon itano menen Israel hinap Hinikni Allah o Yerusalem werehon ino fahet umbagpag turuk angge emas men perak men ninindimu nenehiyeg toho emberuk laheyon haren walug lahun.

¹⁶Nin winon o Babilonia wereg inap men Israel inap men imam inap arimano menen inindiyen HINIKNI Allah ibam fahet emas men perak men og hutuk lamuhubon oho haren o Yerusalem walug lahun.

¹⁷Walug lahun angge arimano fam wam sapi, wam domba suwon toron men roti anggen men ik anggur ahaluwe men onggo paloho wahunteg Allah ibam o Yerusalem wirihon fam Hikni Allah fahet hubu lahaptuk ambehen yaltuk laruhun.

¹⁸Perak men emas men og humuhubon obog toho waruk lit minggiroho umbuhunon arimano fahet Hikni Allahn hit hiyag hisaruk ane roho hat hori menen tul perukon eneg turuk lamuhup.

¹⁹Hikni Allah ibamen hubu lahaptuk lit enebene lahaptuk angge men ininggiken seneg angge men og humuhukon arimano oho haren o Yerusalem Hikni Allah olohotma imbik lahun.

²⁰Allah ibam fahet winon heng ele perukon wereg halug an nanggengge foroho ahun fam heng uhunmu og huruhu,” ulug haharoho imbibareg nin eke Ezra fam ele hiyag utuk lit,

²¹”An Artahsasta ap suwon welahiyonen nele tu an nanggengge foroho inap ik Efrat paloho hubula fil werehon unubam hiyag isaruk lahi: Imam Ezra Allah Poholmonen komo eneptuk latfahon oluk teg ahun inowen heng heneptukon hikit toho ninirim puk fug angge obog toho og utuk lamuhup.

²²Og utuk lit hili anden emberuk lahiyon tu fam wirim toho perak anggin 3.400 kilogram, roti anggen anggin anggolo 10.000 kilogram, ik anggur ahaluwe kubag teng-teng angge 2.000 liter, ahaluwe suburu inggila esetuk angge kubag teng-teng angge 2.000 liter, saho aren heng henebuhu ane roho anggolo og utuk lamuhup.

²³Allah Poholmonen olok peruk ane an men numalikisi men nunubam aruhu rohon mun angge man angge At ibam fahet asehet tohon heng heneptukmu fuki roho hol halug Ezra og utuk lamuhup.

²⁴Anden nele eke hiyag isaruk lahiyon tu: Imam inap, Lewi inap, sini yunggultuk inap, Allah ibam sok foroho inap, Allah ibam o le ke yabuk waruk inap winon unubam onggo imbiyek ulug heng eneptuk lamuhup fug.

²⁵Ezra nare, Hikni Allahn hat hindi anggarap haptisimu Hikni Allahn komo eneptuk latfag ane holtuk inap ik Efrat paloho hubula fil werehon obog toho fahet milal eneptuk inap men fet enesug inap men lahap enebuhun. Lahap enebuhunteg Allahn komo eneptuk latfag ane fahet enepeleg toho wereg inap haren amul eneptuk laruhun.

²⁶Ap san Allahn komo eneptuk latfahon men an ap suwon nele men pisan isaruk halug alem angginon unubam umbuhup. Alem wal taneg fuki roho hale felug winon ware feseruk lit, winon o winama hik isaruk lit, winon onggo og nesemek ulug heng eneptuk lit, winon ap hele waroho kilaptuk ambeg kilabe feseruk lamuhup,” ulug Artahsasta inowen suwesingga haharoho Ezra og itfag.

²⁷Og itfagma Ezra inowen kim hibareg ele uruk lit, ”Nit nunumbasi INIKNI Allahn ap suwon indi kahaltisimu aren NINIKNI Allah ibam o Yerusalem werehon ino unuk suwap tuhuk perisireg let neneptukon fahet NINIKNI Allah wel turuk lahi.

²⁸Allahn peruk ane roho ap suwon men otsi let turukon men umalikisi fet enesuhon menen an fahet inindi nasugmu NINIKNI Allah inggik ineyonen oho let naptuk latisi. Let naptukmu nindi wirik toho wereg lit anden Israel inap fet enesuhon unubam, ’Ninibam ambiyeg lahuk,’ ulug hiyag isarukmu ap anggolowen holtuk latusa,” ulug Ezra inowen ele uruk latfag.