Read Angguruk Yali EZRA 8 Bible Online

EZRA 8 - Angguruk Yali bible

EZRA 8

¹Ezra inggarehen haharoho imbibahon tu: Hun Artahsasta o Persia inap onowe suwon weregma an men ambiyeg o Babelen wilip atug ninibam larukukon ununggul unuk suwesingga fam haharehon iminon tu:

²Unggul unuk Pinehas ahun Gersom; unggul unuk Itamar ahun Daniel; unggul unuk Daud ahun Sekhanya amloho Hatus;

³unggul unuk Paros ahun Zakharia ori teng fuwaben 150 men;

⁴unggul unuk Pahat-Moab ahun Elyoenai hun Zerahya amloho ino ori teng sabiren 200 men;

⁵unggul unuk Zatu ahun Sekhanya hun Yahaziel amloho ino ori teng nanggoloben 300 men;

⁶unggul unuk Adin ahun Ebed hun Yonatan amloho ino ori teng piren 50 men;

⁷unggul unuk Elam ahun Yesaya hun Atalia amloho ino ori teng piren nubam hilag nisanggo fimahen 70 men;

⁸unggul unuk Sefaca ahun Zebaja hun Mikhael amloho ino ori teng hinahan 80 men;

⁹unggul unuk Yoab ahun Obaja hun Yehiel amloho ino ori teng likinen 218 men;

¹⁰unggul unuk Bani ahun Selomit hun Yosifya amloho ino ori teng falfaliken 160 men;

¹¹unggul unuk Bebai ahun Zakharia hun Bebai amloho ino ori teng misig nubam hilag misig 28 men;

¹²unggul unuk Azgad ahun Yohanan hun Hakatan amloho ino ori teng uhan 110 men;

¹³ununggul unuk Adonikam inap Elifelet, Yehiel, Semaya, onori teng piren nubam hilag falfaliken 60 men fobik waharusa;

¹⁴ununggul unuk Bigwai inap Utai men Zabud men onori teng piren nubam hilag nisanggo fimahen 70 men arimano obog tohowen an men ambiyeg ninibam lul perusa.

¹⁵Ninibam lul peruson arimano obog toho ik o Ahawa fil wirig atukon ayegma palu arik maniyek ulug wol eneptikikmu waharusareg o sabo wiroho weregman eneg o hinahanam atisi. O sabo wiroho wereg lit ap arimano kim isarukmen olma inap sehelimu Allah amingmingangge imam welatusa angge famen unggul unuk Lewi ahun misig oho welatisi fugmu yet isarikik.

¹⁶Yet isarikikteg Israel inap ununggul unuk onowesi Eliezer, Ariel, Semaya, Elnatan, Yarib, Elnatan, Natan, Zakharia, Mesulam men inindi anggat tehon Yoyarib men Elnatan men wol eneptikikteg

¹⁷unubam nele uruk lit, ”O Kasifya lalihipteg Kasifya inap onowe Ido men ori men hiyag isalihibon tu: Hit sehelimuwon winon nit men ambiyeg lahukteg Ninikni Allah wel turuk ibamen yabuk turuk lamuhuben mon enebik wamuhup ilihip,” ulug hiyag isarikik.

¹⁸Hiyag isarikikmu Allah inggik fanowonen wanggi wat nenesugmu o Kasifya inap arimanowen mon enebik waharuson ununuk tu: ap indi anggat tehon unuk Serebya hun Yakub amloho Lewi inowen endetfahon Mahli inowen ondohowonen ondohowon ino ori umalikisi men enebe num fimahen 18 men,

¹⁹hun Lewi amloho Merari inowen ondohowonen ondohowon Hasabya men Yesaya men onori unumalikisi men enebe likin fimahen 20 men,

²⁰Allah ibam o le ke yabuk eke hag eke hag witukon nunumbasi hun Daud men Israel inap onowesi menen Lewi inap let eneptuk lamuhup ulug hiyag isibahon enebe teng likinen 220 men mon enebik waharusa. Mon enebik waharuson arimano ununuk obog toho suwesingga fam haharehon

²¹nenembeg o Ahawa ik ayegma waharusa. Waharusama anden ap luhaleg latuson arimano hiyag isaruk lit, ”Nit abet hiyabet maliket nenenggengge obog toho men ninibam fano laruk lamuhuken let nenebukag ulug Allah olohotma apmayap tulteg hup misig fam hiyangangge wereg lit At ubam sembahyang uruk lamuhuk,” irikik.

²²An ninggaliyen ap suwon fam, ”Nit kalemma larukmen ap seliyonen nunusuhup tohon ulug humalikisi sehen senehon men wam kuda fam lahalug larukon men nit men ambiyeg laruk lamuhuken hiyag isamihin,” ulug heng tirikik fureg niren ap suwon fam nenele uruk lit, ”Ninikni Allah inggik ineyonen At yami rurukon obog toho wanggi wat enesug angge famen At ineyon inowen At enembol yig utukon obog toho olok ane unubam turuk,” urukuk.

²³Ari urukukteg nit hiyangangge wereg lit Allah fam sembahyang urukmu Aren holtuk lit let neneptuk latisi.

²⁴Ari roho turukukteg imam onowesi sehelimuwon nisanggowen men Serebya oho Hasabya oho onori numen men wol eneptikikteg

²⁵ap suwon men, otsi at komo rurukon men, Persia inap onowesi men, Israel inap o Persia kinangma werehon obog toho menen Ninikni Allah ibam fahet emberusa angge perak emas men Allah wel turuk lit wan turuk angge winon men warikikteg imam wol eneptikikon iniline anggin wirim turuk angge fam embelug wirim harikik.

²⁶Wirim harikik angge iminon tu: perak — 22.000 kilogram kubag, ikag, tebuwag perak fam wirihon teng uhan — 70 kilogram emas — 3.400 kilogram kubag emas fam wirihon likin fumahen — 8 kilogram kubag ine angge tembaga fam wirihon emas fam wirig angge men wirim tohon piren

²⁸Allah ibam fahet emberusa angge arimano obog toho ininggikmu og isik oho lit it unubam, ”NINIKNI Allahn hit mumal tarisi angge re At anggengge hit welahep. Ari hag toho NINIKNI Allah nunumbasiyen oho wel turuk latfahon fahet inindiyen emberusa angge perak emas aruma oho At anggengge wereg.

²⁹Ari fahet At anggengge anden og hisamin angge aruma misig oho longgo uhu rohon ulug fuki roho yet teg lit o Yerusalem walug lahupteg NINIKNI Allah ibam iraham hili wirig ambehen anggen wirim turuk angge fam embelug winag hahupteg imam onowesi men Lewi inap men Israel inap onowesi men ininggikmu og isahup,” ulug hiyag isarikik.

³⁰Hiyag isarikikteg NINIKNI Allah ibam fahet emberusa angge aruma o Yerusalem walug lahup ulug imam men Lewi inap men ininggikmu og isarikik.

³¹Welatukukteg pikalem atamon fam hup nisanggowen atisimu o Yerusalem lul ulug o Ahawa ik ayegma welatukuk ambeg embeselug larukuk. Kalemma larukmen Ninikni Allah inggik ineyonen wanggi wat nenesugmu ap seliyon men ap enengge hulul ulug hilaruk inap menen siyahap neneptusa fug.

³²Siyahap neneptusa fugmu o Yerusalem waharukuk. O hinahanam welatukukteg

³³o uhaneg angge Ninikni Allah ibam larukuk. Larukukteg perak emas men Allah ibam fahet emberusa angge winon men niren walug waharukukon arimano anggin wirim turuk angge fam embelug wirim harukukteg imam Meremot hun Uria amloho ino inggikmu og utukuk. Og utukmu itano hun Pinehas amloho Eleazar men Lewi inap piren ununuk Yozabad hun Yesua amloho ino men Noaja hun Binui amloho ino men oho welatusa.

³⁴It obog toho iniline niren walug waharukuk angge arimano obog toho winag haruk lit anggin wirim turukukteg suwesingga fam haharoho emberukuk.

³⁵Ari turukukteg nit o Babelen suhuloho ninibam waharukukon obog tohowen nit Israel ninap NINIKNI Allah fahet hubu lahabul ulug nununggul unuk nisanggowen welahe ane wirim toho wam sapi abon nisanggowen men, wam domba abon teng hinahanen nubam hilag nuwal fimahen 96 men, wam domba umalik teng pirenen nubam hilag fuwap fiman 77 men waroho hubu lahaptukuk. Hubu lahaplug Allahn siyag ane turukukon ambolmaya fusukag ulug wam kambing abon nisanggowen waroho indokma yaltukuk.

³⁶Yaltukukteg suwesingga o Persia inap onowe suwonen hahatisiyon arimano otsi ap suwon-suwon ik Efrat hubula fil werehon men kinang wal taneg senehon men og isa larukuk. Og isarukukmu iren suwesingga arimano fam hahatisi ane hikit toho nit Israel ninap let neneptuk lit Allah ibam fahet oho nungge-nungge emberuk latusa.