Read Angguruk Yali EZRA 9 Bible Online

EZRA 9 - Angguruk Yali bible

EZRA 9

¹Welatukukteg Yahudi ninap nonowesi an nambeg waharusareg hiyag nutuk lit, ”Kinang aru fam yug inaben Allahn ari tuk fug perukon turuk angge re nit nunumalikisi Yahudi inap arimano it men mangno roho welalep fug angge famen it men ininggik ahandip toho wereg. Kanaan inap, Het inap, Feris inap, Yebus inap, Amon inap, Moab inap, Mesir inap, Amori inap menen amben siyahon turuk hag toho nunumalikisi olma inap men Allah amingmingangge imam men Lewi inap men obog tohowen oho siyag ane turuk.

²Yahudi ninap sehelimuwonen hiyap iren tohon hilaruk lit nit Allah anggengge welaheyon men it Allah enepelehon men misihap eneptuk. Atam nit nonowesi winon men fet nenesug inap sehelimuwon menen Allah enembol yig utuk lit ket-ker ane ari ak turusama nunumalikisi winonen it onombolim ari hag toho turuk,” ulug hiyag nutusa.

³Hiyag nutusa ane ari holtikikteg an nindi siyahen nasum ebemon men sum hililip toho wan teg latikikon men tararag talug noruk men panisung men fil taruk lit war am hag toho heriyeg latikik.

⁴Heriyegma ap an walinggoho luhal arik waharuson arimanowen inindimuwen wenggel haruk lit, ”Ap o Babelen suhuloho waharusonen Allah enembol yig utuk latusa ane fahet nit Israel ninap Ninikni Allahn ele olok toho ibag ane hikit toho unubam tuhu,” ulug enekol toho wenggel haruk latusa. An it sehelimu ari hag toho heriyegman eneg hupmu Allah fahet hubu lahaptuk li horog atisi.

⁵Horog atisimu an nindi siyahen war am hag toho heriyeg latikik ambehen in atikikteg nasum tararag tohon wan teg lit nelenggen fam hur atikikteg ninggik leko NIKNI Allah fam sembahyang uruk lit,

⁶”Nikni Allah, niren Hat humbahalug siyag ane til-wil laruk laheyon ari poholma laharuken an ninggaliyen Haren yet niyamisi fug ulug nil poholma lahap ha fug teg lahi.

⁷Indamen tulug ketiya oho nunumbasi men nit menen siyag ane hum toho turuk lahe. Siyag ane turuk laheyon ari fahet niret nonowesi suwonet Hat hamingmingangge imamet ap o winamon onowesi ininggikmu atukuk. Atukukmu nit nunusuruk lit nenenggengge huhulangge hilaruk lit nininggik hele waroho og neneplug laruk lit ap obog toho iniline nininggaliyap neneptukmen eneg o yoho oho ari hag toho nunubam turuk.

⁸Ketiya eneg il misihim hat NINIKNI Allahn hindi nenesug lit nit we tor angge welaheyon windat neneptikinteg inindi yuwag toho welamuhup ulug Hat hangginang tu fam nunumbahik waharikin. Ninil hupnig hag toho weregma ninil fenggen neneptuk lit ap enemingmingangge welaheyon ninindi seyap neneptikin.

⁹Ap o winamonen mingming neneptuk angge famen Haren nit nunumbaharuk lahen fug. Haren o Persia inap onowesi suwon inindi kahal eneptikinmu iren nit inindi nenesug lit hinibam lahup ulug hiyag nisarusama nunubam se atisimu ninibam waharukukteg Hat wel haptuk ibam halog toho lin isibahon ino nin hebeloho wiri ferukuk. Wiri ferukukteg Haren inindi yuwag toho welamuhup perikin ambeg o Yehuda kinangma oho o Yerusalem tiya oho welahe.

¹⁰Ari roho welahe angge famen Hat Ninikni Allahn ari-ari turuk lamuhup ulug komo neneptikin ane sobir isarukukteg niren nungge ane uruk lamul?

¹¹Haren hamingmingangge nabi feneyen komo neneptuk lit, ’Kinang hit ngi arik kuhup ambeg yug toho wereg inaben An Allahn siyag peruk lahi ane til-wil laruk lit kinang atogman atogma siyahap turuk.

¹²Ari fahet hit heneholani it unumalikisiyen hila fug angge hit hunumalikisiyen oho it eneholani hilahup fug. Hit honoluk wereg li it fano roho welamuhuben let enebuk fug angge weregman eneg hit famen ondoko laruk lamuhubon oho it men ininggik ahandip toho welamuhup fug. Ari roho turuk lamuhup halug hit hinine roho wereg lit kinang tu famen wilip atuk angge fanowon narukmen eneg hiren endebuhubonen endebuhubon arimanowen oho kinang ari ngi roho welamuhup,’ ulug hiyag nisarikin.

¹³Haren hiyag nisarikin ane pisan isalug siyag ane hum toho turuk latukukon fahet alem angginon eke hag eke hag nunubam atisi. Niren siyag peruk lahen ane anggolo turuk latukukon fahet Haren mondabi siyahap neneplen angge famen nit tor angge welaheyon windat neneptikin.

¹⁴Haren windat neneptikin angge re niren nangginoho nin hebeloho Haren komo neneptikin ane sobir isalug ap o pumbuk winamon Haren tuk fug peruk lahen ane turukon eneholani hilarukmu iren nit neneholani hilaruk lamuhup? Ari roho turuk lamuhuk halug Haren holok haruk lit mondabi siyahap nenebuhunmu nit sehelimuwon misig oho oluk welaruhu fug.

¹⁵Nit obog toho siyag ala angge famen Israel ninap NINIKNI Allah, Haren hele tem toho mangno roho welamuhuk inag ane hikit toho nit o yoho tor angge luhaleg laheyon aruma windat neneptikin. Nit siyag ninap Hat halukeman in am fug teg lahe angge famen niren siyag ane turuk latukuk ulug Hat holohotman fag toho uruk lahe,” irikik,” ulug Ezra inowen sembahyang ibag.