Read Angguruk Yali NEHEMIA 1 Bible Online

NEHEMIA 1 - Angguruk Yali bible

NEHEMIA 1

¹Hun Hakhalya amloho Nehemia inowen inggarehen turuk latfag ane fahet suwesingga tu fam haharoho imbibag. Hun Artahsasta Persia inap fahet ap suwon raja weregman mo soho fiman larisireg likin fimahon 20 fam pikalem nanggolobon larukmu[1] an Nehemia o pumbuk suwon Susan welatikik.

²Weregma an nare Hanani men ori men o Yehudan an nambeg waharusa. Waharusama anden te, ”Yahudi inap ininggik hele waroho o Babel og eneplug larusa fuhon[2] o Yerusalem wereg lit nangginoho wereg?” ulug kapal isarikik.

³Kapal isarikikmu iren te, ”Elehet o Yerusalem walinggoho oho latisiyon halog tebeseruk lit sok oho indok yale feserusama haluk fug angge wereg lit Yahudi inap o Babel og eneplug larusa fuhon arimano mondabi siyahap neneptusa ulug inilaheg toho wereg,” ulug hiyag nutusa.

⁴Hiyag nutusa ane ino hol harikikteg nindi siyahen hup pirenam hinahanam suburu na fug angge heriyeg lit uba eneg yatuk latikik. Uba yatuk lit Allah Poholmon fam sembahyang uruk latikikon tu,

⁵”NIKNI Allah Poholmon, Hat suwon fahet nakol toho wereg lit nele hubam uruk lahi. Hat humalikisi hele holtuk lit inindi hasuhon Haren oho hindi enesug lit hele sali unubam emberikin ane hapeleg aruhu fug.

⁶An hamingmingangge likiya hupmu humalikisi Israel inap fahet Hat hubam sembahyang uruk lahiyon Haren hol hamihinteg hebeloho nit yet nisamihin. Nit Israel ninap obog toho, an nibam welaheyonen oho Hat holohotma siyag ane eneg turuk latukuk ulug fag toho hiyag hutuk lahi.

⁷Hat humalikisi komo eneptik inag ane hamingmingangge Musan haharoho imbibahon hikit toho tuk fug angge niren Hat hele ying haptuk latukuk.

⁸Haren Musa fam hiyag utuk lit, ’Hiren An wenggel niya fug angge welamuhup halug Anden o pumbuk winon seheli ke hik-hak hisahuk angge famen

⁹hit hebeloho An nubam wenggel niyaruk lit Anden emberikik ane hikit toho turuk lamuhup halug kinang atogma hik hisahubon oho nin Anden wol toho palu henebik waruhukteg An nunuk wel naptuk lamuhup ulug mumal tarikik ambeg og heneplug waruhuk,’ ulug hiyag itik inag ane hapeleg am fug.

¹⁰Hat hinggik hineyonen nit windat neneptikinmu Hat hamingmingangge welaheyon nunumbahakun fug!

¹¹Hat hamingmingangge enehiyeg toho wel haptuk inaben Hat hubam sembahyang uruk hag toho anden oho Hat hubam uruk lahiyon hol hamihinteg an let napmihinmu ap suwon raja ambeg lamin halug aren indi niyamisi,” ulug Allah fam sembahyang irikik. Irikik li itano an Persia inap onowe suwon amingmingangge wereg lit ik hinang utuk nahun welatikik.