Read Angguruk Yali NEHEMIA 10 Bible Online

NEHEMIA 10 - Angguruk Yali bible

NEHEMIA 10

¹Suwesingga atogma ununuk haharoho emberuson tu: hun Hakhalya amloho Nehemia o Yehuda kinang seneg ahun ino. Allah amingmingangge imam: Zedekia, Seraya, Azarya, Yeremia, Paskur, Amarya, Malkia, Hatus, Sebanya, Malukh, Harim, Meremot, Obaja, Daniel, Gineton, Barukh, Mesulam, Abia, Miyamin, Maazya, Bilgai, Semaya. Lewi inap: hun Azanya amloho Yesua, hun Henadad inowen ondohowon Binui, Kadmiel, it onori Sebanya, Hodia, Kelita, Pelaya, Hanan, Mikha, Rehob, Hasabya, Zakur, Serebya, Sebanya, Hodia, Bani, Beninu. Israel inap onowesi: Paros, Pahat-Moab, Elam, Zatu, Bani, Buni, Azgad, Bebai, Adonia, Bigwai, Adin, Ater, Hizkia, Azur, Hodia, Hasum, Bezai, Harif, Anatot, Nebai, Magpias, Mesulam, Hezir, Mesezabeel, Zadok, Yadua, Pelaca, Hanan, Anaya, Hosea, Hananya, Hasub, Halohes, Pilha, Sobek, Rehum, Hasabna, Maaseya, Ahia, Hanan, Anan, Malukh, Harim, Baana.

²⁸Israel inap winon arimanowen ununuk haharoho emberusa fug angge famen iren enele uruk lit, ”Nonowesi inine werehonen ununuk haharoho embeheson hag toho niren oho sali emberuk lahe. Sali emberuk laheyon hikit toho tuhuk fug halug war amuhuk,” urusa. It winon Allah amingmingangge imam men, Lewi inap men, Allah ibam sok foroho inap men, Allah wel turuk asini yunggultuk inap men, Allah ibamen yabuk eke hag eke hag wituk inap men, ap pohon Allah wene apma kuruk lit onori men hili atuk latfahon men, unuhesi unumalikisi hol halug wenggel ha rehon menen sali emberuson tu, ”Allahn amingmingangge Musa feneyen aben tuk teg ane fahet hiyag nisibag ane ninine roho seneg lit mun ane man ane alem obog toho fahet komo nenepfag ane hikit toho turukmen eneg welamuhuk.

³⁰Nit neneholani ap o winamon nit sehelimu werehon unumalikisi og isaruk lamuhuk fug, iren oho eneholani nit nunumalikisi og isaruk lamuhup fug.

³¹Ap o winamonen o sabit sambil ano Allah wel turuk sambil winon ano suburu roti anggen men iren angge winon men onggo og nisalusa ulug walug waharukmu niren hilaruk lamuhuk fug. Mo ilig am wirig am turukmen mo sabiron fam Allahn imbibag ane hikit toho niniyabuk wit ta fug angge wereg lit paleg angge werehon obog toho elehap turuk lamuhuk.

³²Mo eke fam eke fam Allah ibamen wel turuk ane fahet uang perak 5 gram imbik waharuk lamuhuk.

³³Uang emberuk lamuhukon tu: Roti anggen tag toho wirahowon Allah olohotma emberukon men, likiya hupmu suburu yaltukon men, wam waroho hubu lahaptukon men, o sabit sambil men pikalem keron ket inam atuk sambil men Allah wel turuk sambil winon men hubu lahaptukon men, Allah fahet emberuk angge eke hag eke hag men, Israel ninaben siyag ane turuk laheyon eleg amag ulug Allah fahet wam waroho hubu lahaptukon men, Allah ibamen yabuk eke hag eke hag witukon men fahet ili ruruk angge perak imbik waharuk lamuhuk.

³⁴NINIKNI Allah fahet likiya hupmu hubu lahaptuk lamuhuben indok war am fug angge narukmen eneg welaruhuwen ulug Allah wene fam haharoho imbibag sambil arimano e walug waharuk lamuhuk. Nununggul unuk wal taneg welaheyonen nosambil e arimano walug waharuk lamuhuk ulug nonoluk aruhuwen nit olma ninap men imam inap men Lewi inap menen mo eke fam eke fam enehangge nunubam hik turuk lamuhuk.

³⁵Mo eke fam eke fam niren suburu tam yahaltuk lamuhukon men e anggen tam tahantuk lamuhukon men NINIKNI Allah ibam imbik waharuk lamuhuk.

³⁶Allah wene fam haharoho imbibahon hikit toho nunumalikisi ap angge wandabon Allah fahet umbul ulug imam Allah ibam weregma walug waharuk lamuhuk. Nenembohom sapi kambing domba umalik wandabon arimano imam Allah ibamen yabuk witukonen naruk lamuhup ulug walug waharuk lamuhuk.

³⁷Mo eke fam eke fam roti anggen tam paltukon lilibug toho tag turuk lamuhukon men, e anggen, anggur anggen, e zaitun ahaluwe fanowon men imam arimanowen naruk lamuhup ulug Allah ibam hili foroho ambeg imbik waharuk lamuhuk. Niniyabukmu yahaltuk lamuhukon palu numen tebelug numon arimano Lewi inap niniyabuk walinggoho werehon narukon fahet ininggikmu og isaruk lamuhuk.

³⁸Ininggikmu og isaruk lamuhukon arimano kim hawag ulug imam ahun hun Harun inowen endetfahonen ondohowon eke Lewi inap iniraham weregma og isaruk lamuhuk. Og isaruk lamuhuk angge arimano Lewi inaben palu numen tebelug numon arimano Allah ibam hili fano-fano angge foroho ambeg imbik waharuk lamuhup.

³⁹Hili ino fam Allah wel turuk lit aliliyangge wan turuk angge forohoma imam inap, Allah ibam sok foroho inap, sini uruk inap men yabuk turuk li wereg ambeg ino nit Israel ninap men Lewi inap menen roti anggen men anggur anggen men e zaitun ahaluwe men imbik waharuk lamuhuk. Niren Allah ibam fahet nenepeleg aruhu fug,” ulug sali emberusa.