Read Angguruk Yali NEHEMIA 13 Bible Online

NEHEMIA 13 - Angguruk Yali bible

NEHEMIA 13

¹ O itano li Musa wene fam haharoho imbibahon winag halug Israel inap obog toho hiyag isaruk latusa. Winag harukmen o Moab inaben Israel inap unubam turuk latusa ane fahet haharoho imbibahon hiyaharusa. Israel inap o Mesiren wilip atug kalemma larukmu Moab inap arimanowen ik men suburu men og isibag fug angge famen Israel inap huluwap enebuhunmu onggo og humuhuk ulug hun Bileam wol tibagma huluwap enepmin ulug watfag angge famen Ninikni Allahn holmin fug pibagma aren fano welamuhup ulug At unuk fam hi enepfag. Ari teko libag ane fahet o Amon inap men Moab inap men Allah wel turuk inap enesehelimu mondabi welamuhup fug ulug haharoho imbibahon ino hiyaharusareg ap obog toho hiyag isarusa.

³Allah wene fam haharoho imbibag ane ari hiyag isarusama Israel inap arimanowen ap pohon men mangno roho welamuhuk fug ulug hiliyap eneptuk latusa.

⁴Ari uwanma imam Elyasib Ninikni Allah ibam hili arimano foroho ahun inowen umbali Tobia fahet

⁵hili suwon eke kolowap turuk latisi. Tam hili ino fam roti anggen Allah fahet emberukon men, amben fano angge Allah olohotma yaltukon men, kou kubag ikag hubu lahaptuk angge men, roti anggen, ik anggur ahaluwe, e zaitun ahaluwe palu numen tebelug numon Lewi inap men sini yunggultuk inap men Allah ibam sok foroho inap men fahet emberukon men, imam inap unubahet emberukon men foroho latusa.

⁶Foroho ambeg famen Tobia fahet kolowap tirisi ane ari an Yerusalem embeselug larikik li teko larisi. Hun Artahsasta o Persia inap onowe suwon laharisi sali mo ilig am wirig am turukmen teng misigmen nubam hilag fuwaben 32 larisimu an at ambeg lalug we tot amusun toho welatikikteg nibam laminen hiyag nimin ulug ubam heng tirikikteg eneg waharikik.

⁷O Yerusalem suhuloho waharikikteg yet harukmen imam Elyasib inowen Tobia fahet hili ino kolowap tirisimu yet harikik. Yet harikikteg amben siyahon tirisi ulug nindi siyag atisimu Tobia anggengge obog toho hili ino famen hik isarikik.

⁹Hik isarikikteg hili ino men iraham werehon men puhunap tilihip ulug ap hiyag isarikikmu puhunap teberusama kou kubag ikag hubu lahaptuk angge men, roti anggen Allah fahet emberukon men, amben fano angge Allah olohotma yaltukon men suhuloho imbik kirikik.

¹⁰Ari tirikikteg yet harukmen Lewi inap naruk lamuhup ulug Yehuda inaben nungge-nungge og isa waharuk latusa fugmu Lewi inap men Allah wel turuk asini uruk inap men Allah ibam embeselug yabuk wit taruk lamuhuk ulug inibam wal taneg larusama yet isarikik.

¹¹Yet isarikikteg Yerusalem inap onowesi unubam, ”Nungge fahet Allah ibam ari alpal isaruk lahep?” ulug pet eneptikikteg Lewi inap arimano wol eneplug tam Allah ibamen yabuk wal taneg wituk latikip hag toho nin hebeloho wituk lamuhup ulug hiyag isarikik.

¹²Ari ulug hiyag isarikikmu Yehuda inap obog tohowen roti anggen, ik anggur ahaluwe men, e zaitun ahaluwe men palu numen tebelug numon arimano hili Allah fahet emberuk angge foroho ambeg arimano imbik waharuk latusa.

¹³Ari roho turukmu hili Allah fahet nungge-nungge emberuk ambeg arimano foroho lamuhup ulug imam Selemya men Allah wene oluk ahun Zadok men Lewi ahun Pedaya men in eneptikik. In eneptikikteg ap aruma let eneptuk laruhun ulug hun Matanya inowen endetfahon Zakur amloho Hanan hiyag itikik. Aben it uhan fahet inindi wirik toho wereg perusa angge re honoriyen narukon fibir isaruk lamuhup ulug hiyag isarikik.

¹⁴Nikni Allah, anden Hat hibam foroho lit hibamen yabuk eke hag eke hag turuk ane fano lawag ulug haloho emberuk latikikon hambolmayap tubuk fug angge hindi niyimin!

¹⁵O itano li anden yet harukmen o Yehuda kinangman o sabit sambil famen aben anggur anggen paloho pete ruruk latusa. Winonen roti anggen paloho sum fam fani roho wam keledai fam imbik lahalug anggur anggen men, e ara anggen men, nungge-nungge winon men o Yerusalem walug waharukmu yet isarikikteg o sabir angge hiren tohon aruma onggo fahet walug wam fug ulug hiyag isarikik.

¹⁶O Tirus inap oho o Yerusalem pohon hag toho wereg lit ikan men nungge-nungge winon men walug watug o sabit sambil famen onggo fahet Yehuda inap men Yerusalem inap men og isaruk latusa.

¹⁷Ari roho turukmu yet isarikikteg anden Yehuda inap onowesi pet eneptuk lit, ”Nungge fahet hiren o sabit sambil ari siyahap turuk lit amben siyahon turuk lahep?

¹⁸Nit niniknisiyen oho ari hag toho turuk latusa ane fahet Ninikni Allahn nit men nit ninibam pumbuk aru men nunubam alem siyahon arimano obog toho emberisi. Allahn nin sebe roho nit Israel ninap nunubahet olok hawag ulug o sabit sambil ari siyahap turuk lahep ano?” ulug hiyag isarikik.

¹⁹Hiyag isarikikteg anden sok foroho inap arimano hiyag isaruk lit, ”O sabir angge ap misig oho o pumbukmu kuk wilip am tuk nowen ulug o sabit sambil uwanma mo ubuk uk fugmu elehet o pumbuk walinggoho kilabehon sok kurukon arimano lare feruk lit hup hunduhuk ilingge hunduhuk sok laregman eneg likiyamon husuruk lamuhup,” ulug hiyag isarikik. Hiyag isarikikteg o sabit sambil aben nungge-nungge o Yerusalem walug wamuhup tohon kahal enesug lamuhuben sok iniraham unduhuk lamuhup ulug notsi hiyag isarikik.

²⁰Ari ulug hiyag isarikikmu misihim ano pirenam ano ap ayeg waroho waruk inaben o sabit sambil nungge-nungge walug waharuk lit elehet sok kurukon larehen selma nohoruk latusa.

²¹Ari roho turukmu yet isarikikteg anden hiyag isaruk lit, ”Nungge fahet hit o sabit sambil famen waharuk lit selma nohoruk lahep? Hit nin eke wamuhup halug anden alem angginon hunubam umbuhuk,” irikik. Ari irikik sambil famen tulug it arimano o sabir angge waharuk latusa fug.

²²Ari regma anden Lewi inap hiyag isaruk lit, ”O sabir angge henebe ik umaho felug hunubabut haleg lit sok iniraham in arik watlug ap obog tohowen o sabit sambil siyahap tuhup tohon kahal enesug lamuhup,” ulug hiyag isarikik. Nikni Allah, anden turuk latikik ane ari oho wenggel haruk lit ap hindi anggolo enesug lahenonen an oho hindi niyimin!

²³O itano li anden yet harukmen Yahudi inap enesehelimuwonen o Asdod hiyap men Amon inap men Moab inap men og eneptukmu yet isarikik.

²⁴It unumalikisi winonen nit Yahudi ninap nenele holuk fug teg lit o Asdod inap enele ano ap o winamon enele ano uruk latusa.

²⁵Ari roho turukmu yet isarikikteg ap arimano pet eneptuk lit huluwap eneplug winon onoruk filoho yik angge unusulug hiyag isaruk lit, ”Allahn holeg lit weregma henele tem toho, ’Nit neneholani ap o winamon og isaruk lit it eneholani oho nit men nunumalikisi menen hilaruk lamuhuk fug,’ ulug sali embelihip!

²⁶Indam nit Israel ninap nonowe suwon Salomo inowen oho hiyap o winamon hilaruk lit siyag ane turuk latfag. Atam Allahn Salomo ino indi reg lit Israel inap obog toho fet enesug laruhun ulug lahapfag. At indi fanowon men ap o pumbuk kinang atogman atogma werehon onowesi suwon obog toho men ambi reg latfag fug. Ari reg latfag angge famen hiyap o winamon aren hilibahonen indi kahaltukmu Salomo inowen Allah ambol yig utuk latfag.

²⁷Ketiya niren hol harukmen hiren oho hiyap o winamon hilaruk lit Ninikni Allah henembol yig utuk lit siyag ane hum toho turuk latikip,” ulug pet eneptikik.

²⁸Pet eneptikikteg hun Elyasib inowen endetfahon imam onowe suwon Yoyada amloho ekeyen o Horoni ahun Sanbalat ahaloho hilarisiyon ino anden o Yerusalemen yanggaltikik.

²⁹Nikni Allah, Haren imam inap men Lewi inap men mangno roho welamuhuk ulug sali imbinahon ari ap arimanowen sobir isaruk lit imam inap ununuk siyahap turuk ane ari hapeleg aruhu fug!

³⁰Anden ari roho turuk lit Israel inap arimanowen ap o winamonen siyag-siyag ane turukon umbusukag ulug puhunap eneptikik. Puhunap eneptikikteg imam inap men Lewi inap men wal taneg yabuk wituk lamuhup ulug hiyag isarikik.

³¹Hiyag isarikikteg Allah ibam fahet e yaltukon walug waharuk sambil e imbik waharukon men anggen tam tahantukon walug waharukon men fahet kong toho emberikik. Nikni Allah, anden teberuk latikikon ari wenggel haruk lit hindi niyimin! irikik ulug Nehemia inowen haharoho imbibag.