Read Angguruk Yali NEHEMIA 2 Bible Online

NEHEMIA 2 - Angguruk Yali bible

NEHEMIA 2

¹Wereg lit pikalem uhan larisimu misihim sambil ap suwon Artahsasta suburu narukmu anden ik anggur ahaluwe hinanggoho og utuk latikik. Og utuk lit nahummu siyahen norohole wina sambil ap suwon olohotman amu reg latikik fug angge famen ari sambil eneg amu reg latikikmu ap suwonen an yet niyarisireg

²umung niyaruk lit, ”Hat hubam ouk elegman nungge fahet horohole hilik toho turuk lahen? Hat hindimu siyahen horohole hilik toho welahen peruk lahi,” irisi. Irisimu an nakol anggolo harikikteg

³hiyag utuk lit, ”Hat ap suwon mondabi weregman eneg welaruhun. Yerusalem an numbasi sal eneptuk latfag ambeg ino harep pisako siyaha feseruk lit elehet walinggoho oho lit sok wirig latuson obog toho indoken narisiyon fahet wenggel hihireg norohole hilik toho welahi,” ulug hiyag itikik.

⁴Hiyag itikikmu ap suwon inowen an kapal niyaruk lit, ”Ari fahet haren te nungge heng ele peruk lahen?” irisimu an nindimuwen Allah Poholmon fam sembahyang irikikteg

⁵ap suwon fam hiyag utuk lit, ”Nikni, haren an hamingmingangge hindi nasug lit anden iminon ari fahet fano pemihin halug an numbasi sal eneptuk latfag ambeg Yehuda kinang fam lahukteg o Yerusalem halog turuson nin ubalma wiruhuken mon napmihin,” ulug heng tirikik.

⁶Heng tirikikmu uhe iraham heriyegma ap suwonen an nubam kapal niyaruk lit, ”Lahunteg noenam welaruhunteg nin suhuloho waruhun?” ulug kapal niyarisimu anden, ”Amusun toho welaruhukteg waruhuk,” ulug sali ubam emberikikmu aren lamihin ulug hiyag nitisi.

⁷Hiyag nitisimu anden ap suwon fam, ”Nikni, hat suwonen fano pemihin halug an Yehuda kinang fam lahuk ulug kalemma larukmu let naptuk lamuhuben ap suwon-suwon ik Efrat paloho hubula fil wereg inap sen enesuhon wal taneg unubahet suwesingga embemihin.

⁸Allah ibam walinggoho elehet kuruk ambeg sok wiruhukon men, o pumbuk walinggoho elehet wahukon men, an welaruhuk ambeg wiruhukon men fahet e og nuruhuwen hun Asaf ohi haren tohon seneg ahun ino fahet suwesingga eke embemihin,” ulug heng tirikik. Nikni Allah inggik fanowonen an let naptukmu heng tirikik ane fahet ap suwonen fano ehen ulug

⁹otsi sehen seneg inap onowesi men unubam, ”Wam kuda fam lahalihipteg Nehemia hondoholug lalihip,” ulug mon eneptisimu it men ambiyeg ik Efrat paloho hubula fil laruk lit suwesingga Artahsasta inowen ap suwon-suwon unubahet emberisiyon arimano og isil larukuk.

¹⁰Nehemia ino Israel inap let enebuhuk ulug waharuk urukmu hol harusareg o Bet-Horon ahun Sanbalat men ap suwon amingmingangge Amon ahun Tobia ino men inindimu het atisi.

¹¹An Nehemia o Yerusalem waharikikteg o hinahanam kel taruk lit welatikik.

¹²Wereg lit Nikni Allahn, ”O Yerusalem suhuloho wiruhun,” ulug hiyag nitisi ane ap misig oho hiyag isa fug angge welatikikteg ninggik uhaneg angge hubanggo in atug ap we tor angge men wilip atukuk. Wilip atuk lit nori winon unuyug fam larukmu we an eneg wam keledai fam laharikikteg

¹³hubanggo eneg elehet o pumbuk walinggoho wibahon sok tonggo fil wilip atuk keyen wilip atukuk. Wilip atukukteg ik ambut fil wirig atug ik Pisanggo eleruk keyen tulug sok unuk Ololongge larukuk. Ari roho o pumbuk elehet iraham walinggoho laruk lit anden elehet halog toho lin isaruson men sok indoken narisiyon men kim hil larikik.

¹⁴Kim hil laruk lit ik eleruk fil ilihig sok ik elerukmu wirig latfag keyen ik sene ap suwonen tohon weregma larikik. Ik sene ino iraham larukmen elehet halog toho lin isaruson arimanowen wam keledai elehet iraham ke la fug teg latisimu

¹⁵ik Kidron ikma wambirikikteg hubanggo eneg ik som ilig atuk lit elehet fuki roho kim hil waharikikteg sok wilip atikik ke nin suhuloho kik waharikik.

¹⁶Yahudi inap Yerusalem inap fet enesuhon unubam, ”An elehet walinggoho kim hil lamin,” ulug hiyag isarikik fugmu kema laha ulug enepeleg toho welatusa. Enepeleg toho weregma kim hil larikikteg eneg anden nori Yahudi inap, imam inap, Yerusalem inap onowesi, iniknisi fet enesuhon, elehet waruk lamuhup perikik inap arimano unubam nele hiyag isaruk lit, ”O Yerusalem pin halog toho nunusuruk lit elehet kuruk ambeg sok wirig latfahon arimano indok yale feserusama ninilaheg toho welahereg o pumbuk winonen nininggaliyap nenebuk nowen elehet ino nin wahuk,” ulug hiyag isarikikteg

¹⁸nin eke hiyag isaruk lit, ”Allah inggik ineyonen an let naptukmu ap suwon Persia inap onowe inowen oho an nubam ele ari hag toho hiyag nitisi,” ulug aren irisi ane it hiyag isarikikmu iren te, ”Wahuk,” urusareg inine roho ak turusareg waruk latusa.

¹⁹Elehet wahuk urukon ino Sanbalat men Tobia men Arab ahun Gesyem menen hol harusareg nit apmayap neneptuk lit, ”Hiren turuk lahebon ari nangginuhuk ulug turuk lahep? Ap suwon ele ying tuhuk ulug turuk lahep?” ulug nininggaliyap neneptuk latusa.

²⁰Ari ulug nininggaliyap neneptukmu anden it unubam nele uruk lit, ”Allah Poholmonen nit let neneptukmu nit At amingminganggeyen elehet aru warukmen eneg obog toho oho fuhuk. Kinang tuma hiren tohon fug angge re hit henele uk fug! Hit hununuk oho nit nenepeleg,” ulug pet eneptikik.