Read Angguruk Yali NEHEMIA 4 Bible Online

NEHEMIA 4 - Angguruk Yali bible

NEHEMIA 4

¹Yahudi inaben elehet halog tebeseruson nin suhuloho waruk urukmu hun Sanbalat inowen hol harisireg indimu het-pet atisimu Yahudi ninap nunubahet ele siyag toho uruk lit

²ori men Samaria inap sehen senehon arimano unubam te, ”Yahudi inaben nungge-nungge tuk fug teg angge famen nanggintul ulug turuk? Yerusalem nin suhuloho wibuhuk ulug turuk ano? Allah fahet wam waroho umbuhuk halug elehet ino we o misihim eneg obog toho wahuk peruk ano? Helep elehet wil lahibahon indoken narisimu ul atisiyon arimano nin suhuloho werehap tuhupmu helep aruhu ano?” ulug nininggaliyap neneptuk latisi.

³Nininggaliyap neneptukmu hun Tobia ino Sanbalat iraham wereg lit, ”Elehet obog toho oho felep halug oho olomene eke hik toho palimu lahalepma helep lehet ino kululuk toho wambelep,” ulug nenebug uruk latisi.

⁴Ari roho urukmu anden Allah fam sembahyang uruk lit, ”Ninikni Allah, nit nininggaliyap neneptuk ane hol hamihinteg iren nit apmayap neneptukon ino Haren suhuloho ininggareg unubam og isamihin. It enenggengge huhulangge hilaruk lit enebe ininggik hele waroho ap winon inibam hik isa lahuben ap seliyon ininggikmu umbusuhun.

⁵Iren nit elehet waruk laheyon ninindi siyahap neneptuk lit siyag ane turukon hambolma hiraho fusuk fug!” ulug sembahyang irikik.

⁶Sembahyang irikikmu ap obog toho kurusareg elehet ino inine roho warukmen eneg pulmu imbik laharuk lit atogman atogma ahandip teberukuk.

⁷Yahudi inaben elehet ahandip teberusareg ketiya keyenteg latuk urukmu hun Sanbalat men Tobia men Arab inap, Amon inap, Asdod inap arimanowen hol harusareg onolok anggolo harusa.

⁸Onolok harusareg, ”O Yerusalem pin unusuruk lamuhukmu nonghong uhup,” ulug it obog tohowen enele misig ane eneg uruk latusa.

⁹Uruk latusama nit Ninikni Allah fam sembahyang urukukteg likiya hupmu it kik wamuhup ulug kahal eneptuk latukuk.

¹⁰Kahal eneptuk lit Yehuda inaben, ”Elehet tamon halog toho lin isaruson anggolo werehon ha rulug larukmen eneg ninine eleg atisimu elehet aru wa fug teg lahe,” ulug enele sahaltuk latusa.

¹¹Enele sahaltuk lit weregma ap seliyonen enele uruk lit, ”Iren nit yet nisa fug angge enepeleg toho weregma enesehelimu lahukteg elehet ino waruk ane umbusukag ulug unusuhuk,” uruk latusa.

¹²Ari urukmu Yahudi inap it iniraham wereg latusonen hol haruk latusareg, ”Ap seliyon inibam wal taneg wereg keyen wilip amuhupteg hunusik wamuhup,” ulug numenam hiyag nisa waharusa.

¹³Hiyag nisa waharusama anden sehen fit karog ap obog toho og isarikikteg elehet keyenteg lareg elehon iraham ke kahaltuk lamuhup ulug ununggul unuk wal toho unduhuk fisil larikik.

¹⁴Larikikteg yet isarukmen enekol toho weregma yet isarikikteg it men onowesi men iniknisi fet enesuhon men onolohotma unduhuk lit it unubam te, ”NINIKNI Allah suwon ap enekolap eneptukon fam wenggel haruk lit ap seliyon fahet henekol ha fug angge honori hunumalikisi men hunuhesi men hinibam men fahet tog abuhup,” ulug inindi seyap eneptuk latikik.

¹⁵Inindi seyap eneptuk lit weregma ap seliyonen hol harukmen Yahudi inap unusuhuk peruk ane fahet it onoluk atisi urukon hol harusareg tog abuhuk perukuk ane Allahn elehap tehek ulug embeserusama nit obog tohowen elehet tam waruk latukuk hag toho nin waruk latukuk.

¹⁶O ino sambil ak turukukteg an numalikisi minggiroho winonen elehet warukmu winonen sing wan teg lit sehen fit seneko kahalegma nonowesi arimano Yahudi inap elehet warukon enembolma unduhuk lit milal eneptuk latusa.

¹⁷Milal eneptukmu e helep warukonen ininggik fiman sehen seneg lit fiman eneg waruk latusa.

¹⁸Ari roho waruk lit ap elehet warukon obog toho karog enelunggu ke pug teg lit warukmu ap pinggong tog aptukmu ele uruk angge senehon an niraham unduhuk latisi.

¹⁹Unduhuk lit weregma anden ap arimano men onowesi men iniknisi fet enesuhon men hiyag isaruk lit, ”Elehet niren waruk laheyon aru yat tehen nenemu-nenemu waruk lit misihen misig yet ha fug toho waruk lahe angge re

²⁰hiren henemu-henemu wereg lit pinggong ele hol hahup halug nit wereg ambeg palu arik wamuhup. Allah nit ninibil aruhumu tog abuhuk,” ulug hiyag isarikik.

²¹Hiyag isarikikteg wereg lit mo ket lahik waharukmu ak tulug nit winonen sehen seneg lit weregma winonen elehet ino warukmen eneg suhal laharukmu embeseruk latukuk.

²²Itano li anden ap obog toho nele eke hiyag isaruk lit, ”Unukoho elehet waruk lit hubanggo nit nunusul ulug waharuk inap kahal eneptuk lamuhuben ap obog toho enemingmingangge men o Yerusalem eneg nohoruk lamuhup,” ulug hiyag isarikik.

²³Hiyag isarikikteg wereg lit an namu, nori, namingmingangge, ap seliyon kahal eneptukon an niraham welatuson obog tohowen sum elehet waruk lit wan teg latukukon likiya hupmu wan tegman eneg welatukuk. Nit obog tohowen sehen nininggikmu seneg lit eneg welatukuk.