Read Angguruk Yali NEHEMIA 5 Bible Online

NEHEMIA 5 - Angguruk Yali bible

NEHEMIA 5

¹Welatukukteg olma inap unuhesi menen onori Yahudi inap fahet enele hum toho ya nga urukmu holtikik.

²It winonen, ”Nit nunumalikisi ap anggeyet hiyap anggeyet anggolo welahe angge famen roti anggen naruk lamuhukon nininggikmu wereg eleg,” uruk latusa.

³It winonen, ”Suburu obok laharisimu niren nangginoho roti anggen onggo paloho hulul perukukteg aben uang og nisalusa ulug niniyabuk roti anggen yatuk ambeg men hele anggur yatuk ambeg men ninibam men ilamna roho seneg lamuhuben og isarukuk,” uruk latusa.

⁴Nin winonen, ”Ap suwon hundig-hundig uang og umon nininggikmu elehen ap unubam, ’Uang og nisamihinmu niren fobik hebeloho og hum fug teg lamuhuk halug yabuk niren tohon hat aruhun,’ ulug heng eneptuk latukuk,” uruk latusa.

⁵It obog tohowen enele uruk lit, ”Nit men nonori men nenemep minggirig lahe, nit nunumalikisi men it unumalikisi men enemep ambi reg angge famen nungge fahet nit nunumalikisi it enemingmingangge atuk? Neneholani winon oho siyahap eneptuk latusa. Nit niniyabuk ap winon ininggikmu wereg angge re niren nungge-nungge tuk fug teg lahe,” urusa.

⁶Iren enele ya nga urukmu holtikikteg an nahummu het-pet haruk latikik.

⁷Nindimu nangginmin ulug wenggel harikikteg Yahudi inap onowesi men it fet enesug inap men unubam, ”Nungge fahet honori inilaheg toho weregman uang anggolo og nesemek ulug heng eneptuk lit siyahap eneptuk lahep?” ulug pet eneptikik. Pet eneptikikteg alem ari fahet ap obog toho iniline nenele ul ulug Yahudi inap obog toho palu arik maniyek ulug wol eneptikikmu waharusama

⁸anden ap suwon-suwon unubam nele uruk lit, ”Nonori Yahudi inap winon paleg angge unubam werehen ap o winamon enemingmingangge atuson arimano niren windat enebul ulug sat toho yami ruruk lit anggoloenam iniknisi uang og isaruk latukukmu ininggik lol eneptuk latusa. Ari roho turuk latukuk angge famen nungge fahet hiren uang og nisawag ulug hit honori ayeg waroho ap og isaruk lahepma enemingmingangge atuk? Iniknisiyen ininggik lol enebuhuben an nori menen nin hebeloho uang og isaruk lamag ulug ari hag toho turuk lahep ano?” irikikmu iren nungge-nungge hebeloho uk fug tehen enele eleg angge welatusa.

⁹Welatusama anden it unubam, ”Hiren siyag ane turuk latikip. Hit Allah fahet henekol toho welalep! Ap o winamon nit men seli roho werehonen nininggaliyap nenebuhup tohon!

¹⁰An nori notsi menen oho ap inilaheg toho werehon arimano uang men roti anggen men og isaruk latukuk. Niren angge iren palehon obog toho elehap tulen kong toho umbul.

¹¹Ari fahet hiren oho o yoho tu fam eneg iniyabuk roti anggen, hele anggur, e zaitun men yatuk ambeg arimano men inibam men suhuloho og isalihip! Uang, roti anggen, ik anggur ahaluwe, e zaitun ahaluwe men og isarikipmu iren palehon arimano obog toho elehap tiyok!” ulug hiyag isarikik.

¹²Hiyag isarikikmu iren enele uruk lit, ”Haren ehenon hikit toho tul. Iniyabuket inibamet hebeloho og isaruk lit paleg angge unubam werehon elehap tul,” urusa. Urusama Allah amingmingangge imam wol eneptikikteg imam aruma iniline hiren ehebon hikit toho tuhuben henele tem toho ilihip ulug hiyag isarikik ane hikit toho sali emberusa.

¹³Sali emberusama anden nasum fam fani reg latikik angge kinangma tel isarikikteg nele unubam uruk lit, ”Nasum fam fani reg lahiyon tel isihi hag toho Allahn oho sali ehep ane pisan tuhuwon ino ibamet anggenggeyet tel isahumu we tor angge oho inggikmu welaruhu fug,” ulug hiyag isarikikmu ap palu roho welatuson obog tohowen, ”Amin, haren ehenon hikit toho teko lawag!” uruk lit NINIKNI Allah wel turusareg ap obog tohowen sali emberusa ane ari hikit toho turuk latusa.

¹⁴Hun Artahsasta o Persia inap onowe suwon laharisi sali mo ilig am wirig am turukmen likin fimahenam 20 larisimu an Yehuda kinang fahet ap suwon gubernur laharikik. Laharikik sambilen tulug an nori menen gubernur inaben narukon na fug angge weregman eneg mo nisanggowenam larisi.

¹⁵An uwanma Yehuda kinang seneg inap tam welatfahon arimanowen o misihim sambil suburu men ik anggur men narukon fahet uang perak teng misigmen nubam hilag nuwalen 40 likiya hupmu og nisaruk lamuhup ulug unumalikisi unubam heng eneptuk lit e paleg angginon hag toho unubam emberuk latfag. It onotsiyen oho unumalikisi fet enesuhon arimano sarap eneptuk latfag. An Allah fahet nakol toho wereg lit iren turuk latfag ane hikit toho turuk latikik fug.

¹⁶An nine roho elehet halog teberuson ino hale ferukmu notsi oho palu roho wituk latusa angge famen onggo kinang tor angge oho og nisarusa fug.

¹⁷Yahudi inabet notsi it milal eneptukonet enebe teng falfaliken 150 fahet anden likiya hupmu suburu isag isaruk lit ap o pumbuk wina ke werehon nit pen nisa waharukon arimano oho an nibam hondoko kilap eneptuk latikik.

¹⁸It arimano o misihim sambil narukon fahet wam sapi misig men, domba fanowon falfaliken men, suwe men isag isaruk latikik. Hup numen atuk sambil eneg ik anggur ahaluwe anggolo roho hinang isaruk latikik. Ari roho nindiyen turuk latikik angge famen Yehuda inaben yabuk lisag toho witukmu yet isarikikteg Yehuda kinang seneg inaben narukon an naruk latikik fug.

¹⁹Nikni Allah, anden ap aruma unubahet turuk latikikon obog toho wenggel haruk lit hindi niyimin!