Read Angguruk Yali NEHEMIA 6 Bible Online

NEHEMIA 6 - Angguruk Yali bible

NEHEMIA 6

¹O Samaria kinang seneg ahun Sanbalat men amingmingangge Tobia men o Arab ahun Gesyem men ap seliyon winon menen hol harukmen Nehemia inowen elehet o pumbuk Yerusalem walinggoho kilabehon wiri feruk lit halog tibisibag ambeg obog toho haltisi urukmu hol harusa. Hol harusa li itano elehet sok kurukon hembit haltukuk fug.

²Haltukuk fugmu Sanbalat men Gesyem menen otsi mon eneptusama nambeg waharusareg, ”Nenele ulen Ono tonggoma o pumbuk Kefirim watmihin,” ulug hiyag nisarusa. Urusa ane ari siyag ane nubam tul ulug hiyag nisarusa.

³Hiyag nisarusama anden notsi mon eneptikikmu, ”Anden yabuk suwon eke wituk lahi angge re yabuk ari embeselug henembeg wam fug teg lahi ehek,” ulug hiyag isa larusa.

⁴Ari hag toho iren ininggik uhanam ap nambeg mon enebik waharukmu anden oho ninggik uhanam ambi ane eneg hiyag isaruk latikik.

⁵Watmin fug ulug hiyag isaruk latikikmu Sanbalat inowen inggik fuwap angge amingmingangge eke monde ferisimu suwesingga eke aben kim hahup ulug lareg eleg angge walug waharisi.

⁶Suwesingga ino fam haharoho emberisiyon tu, ”Ap o pumbuk winamonen enele urukmu hun Gesyem inowen oho ambi ane eneg uruk lit, ’Yahudi inap onowe Nehemia menen o Persia inap ininggikmuwen wilip amuhuk ulug elehet o Yerusalem walinggoho kilabehon nin wiri feruk,’ urukmu holtikik. Iren te, ’Nehemia ino ap suwon raja lahakuk peruk lit

⁷otsi winon Allah amingmingangge nabi welamuhup ulug lahap eneptisi. It unubam hiyag isaruk lit, ’Nehemia inowen Yehuda kinang seneg laruhuwen ap suwon lahakek ulug Yerusalem inap obog toho hiyag isil lalihip,’ irisi,’ uruk. Enele uruk ane ari o Persia ninap nonowe suwon raja inowen hol hahu lit teg. Ari fahet nangginuhuk ulug nenele ulen watmihin,” ulug wol naptisi.

⁸Wol naptisimu anden not eke monde ferikikmu, ”Teko larisi fuhon fahet hele irikin. Hat hindimuwen wenggel haruk latikin ane eneg irikin ehek,” ulug hiyag irik larisi.

⁹It obog toho inindimuwen, ”Niren it enekolap eneptukmen eneg inine eleg atuken elehet waruk ane umbusuhup,” perusa angge famen an ninggik ine roho waruk latikik.

¹⁰Misihim sambil hun Mehetabeel inowen endetfahon Delaya amloho Semaya ino nambeg wam fug tehen an ibam larikikmu aren hiyag nutuk lit, ”Aben o yoho hubanggo hat huwabul ulug wamusa urukmu holihireg an men hat men Allah ibam lulteg sok laroho hiraho lamul,” ulug hiyag nitisi.

¹¹Hiyag nitisimu anden, ”An ap sa hag toho wereg lit hirag arik lamin? Ap an hahon eke Allah ibam kuruk halug war atukon hat hapeleg? Nirim, an lamin fug,” irikik.

¹²An nindimuwen, ”Hun aru Allahn monde fik waha fug angge famen hun Tobia men Sanbalat menen Allah unuk fam hele si ane ubam uhun ulug uang og erehesama ehek,” ulug noluk atisimu ele holtikik fug.

¹³It piren itanowen peruk lit, ”Semaya inowen uhu ane hol halug Nehemia ino akolen Allah ibam kuhu. Kuhumu niren at abug uruk lit, ’Ap at hahon Allah ibam kuk fug teg angge famen kehek,’ uruk lamuhukmu ap obog tohowen inggaliyap turuk lamuhup,” perusa ane fahet an nindi anggar atisi.

¹⁴Nikni Allah, hun Tobia men Sanbalat menen an nubam turuk latusa ane hapeleg aruhu fug! He Noaja nabi ino men nabi winon menen an nakolap naptukon fahet oho Haren wenggel haruk laruhun!

¹⁵Elehet o pumbuk Yerusalem walinggoho kilabehon warukmen eneg hup teng misigmen nubam hilag hinahaneg fimahen 52 atisimu pikalem unuk Elul fam o hinahaneg fimahon fam elehet obog toho oho ferukuk.

¹⁶Oho ferukuk ane fahet ap seliyon nit walinggoho werehon obog tohowen hol halug enekol harusareg Inikni Allahn let eneptukmu obog toho oho ferusa ulug onoluk atisimu ininggaliyen onorohole hirako welatusa.

¹⁷O itano li Yahudi inap onowesi winon men hun Tobia men suwesingga ekeyen walug la ekeyen walug wam turuk latusa.

¹⁸Tobia inowen hun Arakh inowen endetfahon Sekhanya ahaloho hilarisimu Tobia amloho Yohanan inowen hun Berekhya inowen endetfahon Mesulam ahaloho hilarisi angge re Tobia men Yahudi inap enesehelimuwon anggolo men ininggik ahandip toho welatusa.

¹⁹Wereg lit Yehuda inap onowesi arimanowen an nolohotman Tobia inowen fano ane tu men ari men turuk latisi ulug at wel turuk latusa angge famen an numbahalug laruk lit anden mun ane man ane uruk latikikon fahet Tobia ambeg huruwe laruk latusa. Ari roho turukmu Tobia inowen an fahet akolap timin peruk lit suwesingga anggolo haharoho emberuk latisi.