Read Angguruk Yali NEHEMIA 8 Bible Online

NEHEMIA 8 - Angguruk Yali bible

NEHEMIA 8

¹Israel inap o Babelen suhuloho waharusareg inibam weregma pikalem falfaliken larisireg sabiron ket inam atisi sambil ino it obog toho o Yerusalem waharusareg sok unuk Ik iraham palu atusa. Palu atusareg it arimanowen hun Ezra Allah wene oluk teg latisi ahun ino hiyag utuk lit, ”NINIKNI Allahn Israel ninap komo nenepfag ane Musan haharoho imbibahon walug watmihinteg hiyag nisimin,” ulug heng turusa.

²Heng turusama Allah fahet hubu lahaptuk ahun imam Ezra inowen suwesingga ino abet hiyabet malik toron hol halug wenggel ha rehonet luhaloho weregma walug waharisireg

³likiya ak tirisi angge komo enepfag ane suwesingga fam haharehon hikit toho ap arimano hiyag isarukmen o unukoho atisi. Hiyag isarukmu ap obog tohowen fuki roho holtuk latusa.

⁴Ezra inowen ele hiyag nisahu ambeg ulug pila wiri ferusa ambeg unduhuk lit hiyag isarukmu at inggik pikit fil hun Matica, Sema, Anaya, Uria, Hilkia, Maaseya unduhukmu inggik hare fil Pedaya, Misael, Malkia, Hasum, Hasbadana, Zakharia, Mesulam unduhuk latusa.

⁵Pila ino yat toho wiri fik laharusama Ezra palimu unduhukmu ap obog tohowen lahap haruk latusa. Lahap harukmen Ezra inowen suwesingga fam hahareg ane hiyag isamin ulug wiril harukmu ap obog toho in atusa.

⁶In atusareg unduhukmu Ezra inowen, ”NINIKNI Allah suwon,” ulug wel turukmu ap obog tohowen ininggik leho lit, ”Amin, amin!” ulug leg harusareg enelenggen fam hur atlug onorohole pilabeg kinangma yinggig lit Allah hi rurusa.

⁷Allah hi rulug in atusareg unduhuk lit weregma Lewi inap Yesua, Bani, Serebya, Yamin, Akub, Sabetai, Hodia, Maaseya, Kelita, Azarya, Yozabad, Hanan, Pelaya menen suwesingga ino fam hahareg ane hikit toho ap arimano amul eneptuk latusa.

⁸Amul eneptuk lit Allahn komo enepfag ane suwesingga fam haharoho imbibahon ino il misig-misig seleg toho hiyag isarukmu ap arimanowen fuki roho holtuk lit inindimuwen oho wenggel haruk latusa.

⁹Suwesingga ino fahet wenggel haruk lit tem toho uruk ulug uba yatuk latusa. Uba yatukmu onowe suwon gubernur Nehemia men imam Ezra Allah wene oluk teg ahun ino men Lewi inap arimano menen Israel inap unubam hiyag isaruk lit, ”O yoho NINIKNI Allah wel turuk sambil welahereg hit hinindimu siyag toho wenggel haruk lit uba yabuk fug.

¹⁰Uba yabuk fug angge hinibam lalihipteg henehiyeg toho wereg lit suburu men ik men ahil toho osoko nalihip! Naruk lit minggiroho winon ap enesuburu elehon og isalihip. O yoho Ninikni suwon wel turuk sambil welahereg hinindi anggin toho welam fug! NINIKNI Allahn hit hinindi henehiyehap heneptukmu hinine roho welamuhup,” ulug hiyag isarusa.

¹¹Hiyag isarusama Lewi inaben oho Israel inap inindi yuwahap eneptuk lit, ”Allah men mangno atuk sul welahereg hinindimu yat toho wenggeluk fug angge yuwag toho welamek!” urusa.

¹²Ari urusama Israel inap inibam larusareg suwesingga ino fam hiyag isarusa ane fahet enehiyeg toho inindimu wenggel haruk lit suburu men ik men naruk lit nin minggiroho ap winon og isarusa.

¹³Likiyamon Israel inap onowesi ununggul unuk wal taneg werehon men Allah amingmingangge imam men Lewi inap men Allahn ari-ari turuk lamuhup ulug imbibahon fuki roho hiyag nisamisi ulug Ezra ambeg palu arik waharusa.

¹⁴Palu arik waharusareg NINIKNI Allahn Musa hiyag itfagma hahatfahon ino kim harukmen pikalem sabiron fam Israel inap o saboma nohoruk lit Allah wel turuk lamuhup ulug haharoho imbibahon hiyaharusa.

¹⁵Hiyaharusareg o Yerusalem pumbuk walinggoho werehon obog toho hiyag isaruk lit, ”Tom fam lahalug e zaitun, e palma, e winon inggik inggila anggolo werehon fala roho walug watlihipteg suwesingga fam hahatfahon hikit toho o sabo witlihip,” ulug hiyag isarusa.

¹⁶Hiyag isarusama Israel inap arimano e inggik inggilar angge wak larusareg it inibam unggama oho owahalma oho Allah ibam iraham oho elehet o Yerusalem walinggoho ohowon sok kuruk ambeg unuk Ik men Efraim men iniraham oho o sabo witil larusa.

¹⁷Israel inap o Babilonian suhuloho watfahon obog tohowen o sabo wiroho nohoruk latusa. Hun Nun amloho Yosua welatfahon famen tulug o sabo ari roho witfag fuhon ketiya eneg wirehe ulug enehiyeg anggolo haruk latusa.

¹⁸Enehiyeg toho yunggultukmen eneg o sabirenam atisi. Likiya hupmu Ezra inowen suwesingga ino fam haharehon hikit toho hiyag isaruk latisimu o likinon sakan atisi sambil suwesingga fam imbibag ane roho Israel inap obog toho mangno atusareg Allah wel turuk latusa.