Read Angguruk Yali NEHEMIA 9 Bible Online

NEHEMIA 9 - Angguruk Yali bible

NEHEMIA 9

¹Pikalem ino fam hup uhaneg fimahen 24 atisi sambil Israel inap palu atusareg Allah olohotma siyag ane turukuk ulug inindi siyag toho wereg lit suburu na fug angge fesi lahaboho welatusa. Ap pohon men ambiyeg welamul fug ulug enemumu larusareg siyag ane nunumbasiyen tibahonet nininggarehen turuk latukukonet fag tul ulug unduhuk latusa.

³Unduhukmu INIKNI Allah inowen ari-ari turuk lamuhup ulug haharehon hikit toho tot amusun toho il hinahan 3 jam hiyag isarusama iren Allah olohotma siyag ane turukuk ulug fag turukmen il hinahan 3 jam atisimu kinangma ying atusareg INIKNI Allah hi rurusa.

⁴Hi rurusama Lewi inaben enele hiyag isaruk ambeg pila wirigmu Yesua, Bani, Kadmiel, Sebanya, Buni, Serebya, Bani ap amuwon, Kenani men unduhuk lit enele hi roho INIKNI Allah fam sembahyang uruk latusa.

⁵Sembahyang urusareg Lewi inap Yesua, Kadmiel, Bani, Hasabneya, Serebya, Hodia, Sebanya, Petahya menen Israel inap hiyag isaruk lit, ”In atihipteg Allah NINIKNI hi ruruk lamek! At eneg wel turuk lit welamuhup! At unuk suwon mondabi palimu werehon fog turuk lamek!” ulug hiyag isarusa.

⁶Hiyag isarusama Israel inaben Allah fam sembahyang uruk lit, ”Hat hamu eneg NINIKNI Allah welahen. Haren pohol wal tinareg suhal hutuk tibinag. Haren kinangma ikma werehon obog toho wal tinareg onoluk welamag ulug sat og isinag. Poholma werehon obog tohowen Hat wel haptuk.

⁷Hat Allah NINIKNI welahenonen nunumba Abram mumaltik inareg o Ur Babilonia kinangman hondoholug wilip atik inag. Wilip atik inareg unuk keron Abraham suwaltik inag.

⁸Abraham inowen nele holtuk ulug holuk atfagma at ubam sali emberuk lit, ’Kanaan inap, Het inap, Amori inap, Feris inap, Yebus inap, Girgasi inap enengginang hat humalikisiyen ngi amuhup,’ ulug sali imbinag. Hat hindi wirik toho wereg lit sali imbinahon hikit toho turuk latnag.

⁹Nunumbasi o Mesir asengseng toho weregma yet isinag. Ik Longgop[4] ayegman enele ya nga urukmu hol isinag.

¹⁰Mesir inaben An numalikisi Israel inap enele ying eneptuk ulug holuk atfagma Mesir inap onowe suwon amingmingangge umalikisi Mesir inap obog toho unubam Haren enehangge aben tuk fug tehon eke hag eke hag turuk latnag. Ari roho turuk lit Hat hinggareg hunuk palimuwap tinahon ketiya oho welahen.

¹¹Israel inap onolohotman Haren ik Longgop ahum minggiri finagma it arimano pul ke lilog tegma nindig atfag. Nindig atfagma Mesir inap mug eneplug laruk latfahon arimano Haren ik ahummu hik isinagma helep ik ahummu wamburuk hag toho ubuk ibag.

¹²Ilingge fano lawag ulug hina fam ler eneptuk lit hubanggo seleg tegma lalusa ulug indok fam hondog eneptuk latik inag.

¹³Hat poholman tom Sinai fam wambik watlug humalikisi Israel inap unubam hele uruk lit alem tu men tu men turuk lamuhup ulug seleg toho hiyag isaruk lit fano roho komo eneptuk latik inag.

¹⁴O sabiren angge Sabat kel taruk lit An wel naptuk lamuhup ulug hiyag isinag. Musa feneyen fano roho welamuhup ulug milal eneptuk latik inag.

¹⁵It suburu obok toho weregma Haren suburu roti poholman pilap isa waharuk latik inag. Ik nila perukmu helep famen ik wilip isinag. Haren kinang og hisahuk ulug sali imbinahon hikit toho Kanaan kinangma kuhupteg ngi roho welamuhup ulug hiyag isinag angge famen

¹⁶nit nunumbasi ununggul uwag arik teg lit Hat hele holuk fug angge enebe hemet toho welatfag.

¹⁷Haren it iniline enehangge aben tuk fug tehon turukmu yet haruk latfag angge famen wenggel ha fug angge ele holuhuk fug peruk latfag. It ununggul uwag arik teg lit, ’Nin suhuloho Mesir lulteg ap enemingmingangge welamuhuken hondog neneplug lahun,’ ulug ap eke lahapfag angge famen aben siyag ane turukmu Haren elehap turuk lahen. Inilaheg ulug ap obog toho hindi enesug lit ler eneptuk lahen. Ap siyag ane turukon fahet oho Hat hindi folo-folo holok am fug angge numalikisi nindiyen ulug unubam fano ane eneg turuk lahenonen nit nunumbasi hinggik kobog isinag fug.

¹⁸Iren wam sapi hag angge witfareg, ’Ninikni Allah o Mesiren hondog neneplug wilip atisiyon tu,’ ulug wirim turuk lit enemben siyag toho welatfag angge famen

¹⁹Haren hindi anggolo isaruk lit lek ke larukmu ilingge hunduhuk hup hunduhuk hina men indok men fam hondog eneplug laruk ane imbisinag fug.

²⁰It inindi anggar amag ulug hahime fanowon og isaruk lit suburu manna men ik men og isarukmu naruk latfag.

²¹It lekma wereg lit enesehet teg angge Haren og isarukmen eneg mo ilig am wirig am turukmu teng misihen nubam hilag nuwalen atfag. It enesum tararag tuk fug angge unuyug fibuk fug angge fano roho eneg welatfag.

²²O pumbuk ap winonen tohon Israel inap enengginang walinggoho werehon Haren og isarukmu ap suwon Sihon angginang Hesbon men Og angginang Basan men nit nunumbasiyen ngi atfag.

²³Haren it unumalikisi suhal poholma werehon winag isa fug tehon hag toho anggolowap eneptik inareg it unumbasi fam kinang og hisahuk inag ambeg hondog eneplug waharik inagma kinang ino it ngi atfag.

²⁴It ngi amag ulug Haren Kanaan kinang tam seneg latfag inap men onowesi fer enesug latfahonet nit nunumbasi ininggikmu og isaruk lit, ’Hiren unubam tila pehep ane tilihip,’ ulug hiyag isinag.

²⁵Hiyag isinagma o pumbuk elehet walinggoho ohowon men kinang fanowon men o fano-fano angge anggolo foroho ibam, ik fahet habulig ambeg, anggur yabuk, e zaitun yatuk ambeg, e anggen narukonet anggolo roho hilaruk latfag. Hilibareg enehum ouk toho naruk lit enebe fit taruk latfag. Haren fanowon eneg og isarukmu fano roho welatfag angge famen

²⁶iren Allah ele holuhuk fug ulug Hat enembol yig hutuk lit Haren ari-ari turuk lamuhup ulug hiyag isinag ane apmayap turuk latfag. Hat hamingmingangge nabi Allah ambeg suhuloho maniyek ulug hiyag isaruk latfag inap oho unusuruk lit enemben siyag toho welatfag.

²⁷Werehen Haren ap seliyon ininggikmu hik isinagma ap seliyonen enele ying eneptukmu iren let nenebin ulug enele hum toho uruk latfag. Uruk latfagma Haren poholman enele hol isalug hindi isaruk lit it ler eneptukon mon eneptuk latik inagma iren nit nunumbasi arimano windar eneptuk latfag.

²⁸Windar eneptuk latfagma it inindi yuwag toho wereg lir oho Haren telep fug peruk ane eneg turuk lit welatfag. Ari roho eneg turuken Haren nin ap seliyon ininggikmu hik isinagma iren ninibil amin ulug enele ya nga urukmu Haren poholman enele hol isalug hindi isaruk lit anggoloenam windar eneptuk latik inag.

²⁹Haren ari-ari turuk lamuhup ulug hiyag isarikikon ino holukag ulug komo eneptukmen Hat hele holuk fug angge enebe hemet toho welatfag. Ap san Haren komo eneptik inahon hikit toho turuk halug oluk toho fano welam teg angge famen it ununggul uwag arik teg lit Hat hele sobir isalug enembol yig hutuk latfag.

³⁰Mo-mo angge Hat hahime fanowon hamingmingangge nabi og isarukmu iren hawene nunumbasi hiyag isaruk latfag angge famen iren holtuk latfag fug. Holfag fugmu Haren it ap amuwon ininggikmu imbisinag angge famen

³¹nin hindi anggolo isaruk lit mondabi elehap eneptik inag fug. Haren ap obog toho hindi enesug lit ler eneptuk lahenonen it mondabi siyag amag ulug imbisinag fug.

³²Ninikni Allah, Hat suwon hineyon, aben Hat fahet enekol toho wereg! Haren tam sali imbiyahon pisan isamin fug peruk lit humalikisi hindi enesug lahen. Indam Asyur inap onowesi arimanowen nit siyahap neneptuk latfag liyen tulug nit niniknisi, nonowesi, hamingmingangge imam men nabi men nit nunumbasi, nonori obog toho asengseng haruk laheyon fahet Haren hayen puk fug.

³³Haren hindi nenesugmen eneg welatikin angge famen niren hubam siyag ane eneg turuk latukukon fahet Haren alem angginon nunubam fano emberuk latikin.

³⁴Nit nunumbasi, niniknisi, nonowesi, hamingmingangge imam arimanowen oho Hat hele embeseruk lit ari-ari turuk lamuhup ulug komo eneptik inag ane hondo rebeseruk latfag.

³⁵Haren kinang suwon fanowon hiyag isinareg fano-fano angge anggolo roho og isaruk lit ap suwon it fer enesuhon lahap eneptik inag angge famen niren siyag ane turuk laheyon embeselug Allah ubam wenggel hul peruk latfag fug.

³⁶Ari fahet nit kinang Haren nunumbasi hiyag isinahon fam wereg lit kinang aru famen wilip atukon nit naruk lit fano-fano angge tuma werehon niren foroho lala angge famen ap winon enemingmingangge welahe.

³⁷Niren Hat holohotma siyag ane eneg turuken Haren ap winon nit fet nenesuhon lahap eneptikinmu fano-fano angge kinang aru famon iren hilaruk. It arimanowen ap suwon welahe angge re nit ninindimuwen peruk ane eneg tul ulug nit nenembohomet nenebeyet apmayap neneptukmu asengseng anggolo haruk lahe,” ulug sembahyang uruk latusa.

³⁸Sembahyang urusareg Israel inaben enele uruk lit, ”Ari obog toho teko larisimu niren Allah men mangno roho welamuhuk ulug sali emberuk lahe. Sali emberuk laheyon ari suwesingga fam haharoho embelug suwesingga atogma Israel ninap nonowesi men Lewi inap men Allah amingmingangge imam men ununuk hahare felug sali ari tem toho embehe ulug enehangge umbulusa,” urusa.