Read Angguruk Yali ESTER 2 Bible Online

ESTER 2 - Angguruk Yali bible

ESTER 2

¹Welatfareg ap suwon Ahasweros inowen uhe Wasti fahet olok hibag ane eleg atfagma ap suwon ino indimuwen uheyen ele ying tibag ane men uhe ubam kong toho imbibag ane men fahet wenggel haruk latfag.

²Indimuwen wenggel harukmu yet hibareg amingmingangge at let turukonen enele uruk lit, ”Ap suwon fahet hiyap tuhumon aben oho elehon yami enebukag.

³Yami enebukag ulug ap suwon inowen o pumbuk wal taneg fahet ap in enebuhumu hiyap tuhumon onorohole fanowon obog toho hiyako og eneplug o Susan wamuhupteg humiya ap suwonen tohon fam kilap eneptuk lamuhup. Kilap eneptuk lamuhupmu hiyap enehap fanik-fano aruhuwen ap suwon amingmingangge Hegai humiya foroho ahun inowen e ahaluwe amben fanowon enebene are rurukon og isaruk lit fet enesug laruhu.

⁴Fet enesug lit weregma ap suwonen hiyap aru hilamin puhuwon ino hilahureg uhe tamon Wasti ubalma hiyap suwon lahabuhu,” ibag. Ibag ane ari fahet ap suwon inowen fano pibareg ari hikit toho tibag.

⁵O itano li Yahudi ahun unggul unuk Benyamin ahun Kis inowen endetfahon Simei inowen ondohowon Yair amloho unuk Mordekhai ino o Susan welatfag.

⁶O Babilonia inap onowe suwon Nebukadnezar inowen Yahudi inap winon men onowe Yekhonya men o Yerusalemen wiliboho ininggik hele waroho og eneplug laruk lit hun Mordekhai iknisi oho og eneplug libag.

⁷Mordekhai ikni are ahaloho Hadassa unuk eke Ester welatfag. Ester ino tuhum wereg lit orohole men ebe men fano anggolo reg latfag. At ikni isinga men war atfagma Mordekhai inowen ahalohowap tibag.

⁸Ari regma ap suwon Ahasweros inowen kong toho imbibag ane hiyag isil libagma hiyap tuhumon anggolo o Susan hondog eneplug watfareg hun Hegai inowen fet enesug laruhu ulug humiya ap suwonen tohon fam kilap eneptuk latfag. Kilap eneptuk lit he Ester oho kilapfag.

⁹Kilaptukmu humiya foroho ahun Hegai inowen yet harukmen Ester ino fano regma yet hibareg indi reg latfag. Indi reg lit Hegai inowen amusun tuk fug angge suburu fanowon eneko og utuk lit ahap fanik-fano aruhu ulug e ahaluwe amben fanowon oho og utuk latfag. Ari roho turuk lit ap suwon amingmingangge hiyap angge unubabut fanowon sabiren unubam Ester let turuk lamuhup ulug hiyag isibareg Ester fam hamingmingangge men humiya hili fanowon fam welamuhup ulug hiyag itfag.

¹⁰Hiyag itfagma wereg lit Mordekhai inowen hiyag itfag ane roho Ester inowen ap misig fam oho Yahudi hiyap welahi ibag fug.

¹¹Ari regma Mordekhai inowen nahaloho Ester wereg ane men ubam turuk ane men fahet holmin ulug likiya hupmu humiya owahalma la wam turuk latfag.

¹²Hiyap tuhumon arimano wal taneg ap suwon ambeg tam la fug lit enehap fano amag ulug e ahaluwe amben fanowon enebene lahaptukmen eneg pikalem falfaliken laruk latfag. Laruk latfagma nin pikalem falfaliken fahet amben fano atuk angge men enehap fanowap eneptuk angge winon men og isaruk latfag. Ari roho turukmen eneg pikalem nisanggowen laruk latfagma hiyap tuhumon arimano wal taneg ap suwon Ahasweros ambeg hondog eneplug laruk latfag.

¹³Hiyap eke ap suwon ambeg lik oho lit aren heng turuk ane hikit toho sum men aliliyangge men og utuk latfag angge wan talug ap suwon ibam kuruk latfag.

¹⁴Hupmu ap suwon ambeg kulug likiya o sakan turukmu ap suwon ibamen hondoholug humiya ekema ap suwon unuhesi wereg ambeg kilap enebik laruk latfag. Humiya ino fam ap suwon unuhesi men weregma hiyap tuhumon arimano ap suwon amingmingangge Saasgas inowen fet enesug latfag. Fet enesug lit weregma fobik ap suwon ambeg laruk latfag fug. We ap suwon inowen hiyap indi rehon unuk uruk lit hiyap ari nambeg wamag ulug wol turuk latfag halug eneg ambeg laruk latfag.

¹⁵Ari toho turuk latfag ane hikit toho ap suwon ambeg atam-tam kuruk sambil horog atfagma hun Mordekhai ikni are Abihail ahaloho Ester at inggarehen ahalohowap tibahon ino ap suwon ambeg lik oho lit hun Hegai hiyap tuhumon fet enesuhon fam nungge-nungge og nimin ulug heng tuk fug angge we hun Hegai inowen sum men aliliyangge men og itfag angge eneg wan talug ap suwon ambeg libag. Larukmu yet haruk lit ap obog tohowen at fahet fog iye turuk latfag.

¹⁶Ari roho turukmu Ahasweros ino ap suwon lahibag sambilen tulug mo ilig am wirig am turukmen sabiren atfagma pikalem numon fam Ester ino ap suwon ibam hondoholug libag.

¹⁷Hondoholug libagma ap suwon inowen hiyap tuhumon obog toho winon fahet irim peruk lit we Ester eneg indi haruk latfag. At eneg indi reg lit hiyap suwonen lahaptuk angge unggulmu wan teberuk lit Wasti ubalma hiyap suwon lahapfag.

¹⁸Lahapfareg hiyap suwon ino hi rulen maniyek ulug ap suwon-suwon at let turukon obog toho wol enepfareg seni humon esetfag. Ari tibareg indi fano reg lit umalikisi o pumbuk wal taneg welatfahon unubam, ”Hiren subangge roho nungge-nungge an hinikni og numon misihim embeselug eke sambil og nirik waharuk lamuhup,” ulug hiyag isaruk lit fano-fano angge anggolo og isil laruk latfag.

¹⁹Ari roho weregma Ester ino ebe totma ikni Mordekhai inowen hiyag itfag ane roho Yahudi hiyap welahi ulug ap misig oho hiyag itfag fug hag toho fobik ebe su atfareg oho ap misig oho hiyag itfag fug. Ikni Mordekhai ino hiyap tuhumon arimano ap suwon fahet og eneplug waharuk latfag li itano ap suwon amingmingangge atfag.

²¹Misihim sambil Mordekhai inowen ap suwon ibamen yabuk turukmu ap suwon amingmingangge at ebe forohowon ununuk Bigtan men Teres menen inikni Ahasweros fahet onolok hibareg ware fusul ulug turuk latfag.

²²Ware fusul ulug turuk latfag ane ari Mordekhai inowen oluk atfagma ap suwon uhe Ester hiyag itfag. Hiyag itfag ane ari hikit toho Ester inowen ahun Ahasweros hiyag irik libag.

²³Hiyag irik libagma tem toho ehek ano ulug yami rurukmen ap piren itanowen ap suwon ware fusul pibag ane ari inam atfag. Inam atfagma ap piren itano war amag ulug e fam lahap enepfag. Ari teko libag ane ino ap suwonen otsi hiyag isibag ane hikit toho suwesingga at ap suwonen mun ane man ane turuk laruk latfag ane fahet haharehon fam paloho imbibag.