Read Angguruk Yali ESTER 4 Bible Online

ESTER 4 - Angguruk Yali bible

ESTER 4

¹Ari obog toho teko libag ane fahet hun Mordekhai inowen holfareg indi siyahen sum wan teg latfahon tararag toho hik isalug ebene fesi lahapfareg uba nim-nim ele hum toho il o pumbuk pul ke laruk latfag.

²Laruk lit ap suwon ibam owahalma libareg ap fesi enebene lahaplug ap suwon ibam kuhup fug ulug kong toho imbibag ane roho ap suwon ibam kuk fug angge selma welatfag.

³Weregma o Persia kinang atogman atogma ap suwon unuk fam haharoho imbibag ane ino ap hiyag isil libag ambeg arimanowen Yahudi inaben uba yatuk lit suburu na fug angge fong watuk latfag. Fong watuk lit ap anggolo fesi lahaboho ulmu hur atuk latfag.

⁴Ari regma Mordekhai inowen ap suwon ibam owahalman ele hum toho ya nga urukmu Ester amingmingangge ap angge hiyap angge arimanowen holfareg inisinga hiyag itfagma Ester ino lagmag ibareg Mordekhai inowen fesi lahaboho fong watukon ino umbusukag ulug sum wan turukon og irik aliyek ulug otsi ambeg mon enepfag. Mon enepfag angge famen Mordekhai inowen sum ino wan tibag fug.

⁵Wan tibag fugmu Ester inowen ap suwon amingmingangge Ester let turukon unuk Hatah ino hiyag utuk lit, ”Mordekhai inowen alem nungge fahet ari hag toho turuk ulug kapal hamihinen lamihin,” ulug monde fibag.

⁶Monde fibagma Hatah ino Mordekhai ap suwon ibam owahalma weregma libareg kapal hibagma

⁷Mordekhai inowen teko libag ane obog toho hiyag utuk lit Haman inowen, ”Yahudi inap unusuhukmu fano-fano angge perak iren lin isahubon arimano obog toho ap suwon anggengge foroho inap ininggikmu og isahuk,” ulug sali imbibahon fahet oho hiyag itfag.

⁸Hiyag itfareg suwesingga fam Yahudi inap obog toho unusuhup ulug hahareg ane o Susan inap hiyag isibahon wirim toho suwesingga eke paloho imbibahon og itfag. Og itfareg Mordekhai inowen Ester amingmingangge Hatah fam ele uruk lit, ”Suwesingga aru hisinga fam unug ha lamihinteg anden ihiyon obog toho hiyag itmihin. Hiyag utuk lit Ester ino ap suwon fam nori Yahudi inap arimano ili og enepmihin ulug heng tik lawag ulug ele ine roho ehek imihin,” ulug hiyag itfag.

⁹Hiyag itfag ane ari Hatah inowen isinga Ester hiyag irik libag.

¹⁰Hiyag irik libagma Ester inowen Hatah ino nin lamihin ulug hiyag itfagma Mordekhai ambeg libareg

¹¹isingan hiyag itfag ane hikit toho hiyag utuk lit, ”Ap suwon amingmingangge men umalikisi o pumbuk obog toho werehon menen onolukon tu: Ap angge hiyap angge obog toho ap suwonen wol eneptuk elegman at ibam elehet walinggoho ohowon pisan toho kurukon arimano war amuhup. Ap eke wol turuk elegman kurukmu ap suwon indi fano rehen wanggun emas fam wirihon inggikmu senehon ino at fil pok hahu halug eneg war aruhu fug ulug kong toho imbibag. An ninggareg ap suwonen wol nabuk fug angge weregman eneg hup teng misig atisi ehek,” ulug hiyag itfag.

¹²Hiyag itfagma anden iminon Ester hiyag itmihinen nin lamihin ulug hiyag itfagma Hatah ino libareg Ester fam hiyag utuk lit, ”Yahudi inap obog toho unusuhupmu we an eneg ap suwon ibam welahi angge re numbahakup puk fug!

¹⁴Hat ketiya hele eleg angge welaruhun halug Yahudi ninap ninibil atuk lit windat neneptuk ahun winon in aruhu angge famen hat hori men war amuhup. Yahudi ninap windat nenebukag ulug hat hiyap suwon lahap haptusa ano ulug san oluk am teg?” ulug hiyag itfag.

¹⁵Hiyag itfagma Ester inowen Hatah feneyen Mordekhai hiyag utuk lit,

¹⁶”Lamihinteg Yahudi inap o Susan werehon obog toho wol enepmihinteg an fahet hiyangangge welamuhuben hiyag isamihin. Hup hunduhuk unukoho hunduhuk suburu men ik men na fug angge weregman eneg hup hinahanam aruhu. An namingmingangge oho hiyang welamuhuk. Ari roho weregman eneg hup hinahanam aruhumu ap suwonen kong toho emberisiyon sobir isalug ambeg lahuk. Lahukmu nuwaruhu halug fano war aruhuk,” ulug hiyag itfag.

¹⁷Hiyag itfagma Mordekhai ino libareg Ester inowen hiyag itfag ane hikit toho ori Yahudi inap hiyag isibag.