Read Angguruk Yali ESTER 7 Bible Online

ESTER 7 - Angguruk Yali bible

ESTER 7

¹Ap suwon men Haman men tam libag hag toho likiyamon oho ininggik pireneg angge hiyap suwon Ester inowen suburu eserehekon nul ulug ibam libareg

²ap suwon inowen ik anggur ahaluwe naruk lit, ”Ester hat hiyap suwon welahenon, haren nungge og netep pehenteg wol nabehen? Og netep pehenon imihinmu og hitmin. Kinang anden seneg lahiyon pul ke minggiroho og nimin ulug heng napmihin halug oho og hitmin,” ibag.

³Ibagma Ester inowen, ”Hat ap suwonen an hindi nasug lit he inowen an heng napmisiyon nahiyehen og itmin pemihin halug anden og netep peruk lahiyon fahet iminon tu: An men nori Yahudi inap men nonoluk welamuhuken ili og nenebin!

⁴Onggo fahet nit Yahudi ninap lilibug heheg pinggi nunusuhuk ulug kong toho emberusa. Onggo fahet nininggik lisoho nenemingminganggeyap neneplepma hahen alem toron ari hahon fahet ap suwon ele ying timin fug peruk lit nele ele fug,” ulug hiyag itfag.

⁵Hiyag itfagma ap suwon Ahasweros inowen hiyap suwon Ester fam, ”Ehen ane ari indimuwen wenggeltuk ahun sa? Ketiya kema wereg?” ulug kapal hibag.

⁶Kapal hibagma Ester inowen, ”Nit Yahudi ninap men seli roho wereg lit siyahap nenebuhuk perukon ino hun Haman ubabut siyahon tu wereg,” irikim Haman ino ap suwon men hiyap suwon men iniline lagmag ibag.

⁷Lagmag ibagma ap suwon ino ik anggur ahaluwe namin perukmen indi inahanen in atfareg o ino embeselug owahalma libag. Larukmu Haman ino ap suwonen an siyahap napmisi ane fahet kong toho embehek ulug indi anggar atfagma hiyap suwon Ester fam an war aruhuk tohon ili og nabin imin ulug olma pok atfag.

⁸Ap suwon ino owahalman suhuloho Ester ibam kibareg yet harukmen Haman ino Ester nohoruk ambeg heriyegma iraham yinggigmu yet hibareg undama ahe lahibagma, ”An nibam tuwen nolohotman hiyap suwon hun tuwen siyahap turuk!” ibag. Ari urukmu itano amingmingangge arimanowen Haman war amag ulug orohole sum fam hililip tibag.

⁹Hililip tibareg ap suwon amingmingangge Harbona inowen ele uruk lit, ”E uwag ap ililoho po ribisik laharukon wirimangge yat toho wirim turukon il falfalik fimahen 22 meter wirim tohon eke Haman ibam iraham yaho ferisi ulug honoluk toho! Haman inggarehen Mordekhai ap suwon windatisiyon ino e fam lahaptuk lit ware fesemin ulug e ino hutuk teberisi,” ibag. Ibagma ap suwon inowen, ”Haman aru e ino fam po ribisik lahiyek!” ibag.

¹⁰Ibagma Haman inowen Mordekhai e fam lahapmin ulug hutuk tibibag ahen fam at inggareg po ribisik lahibagma war atfag. War atfagma ap suwon indi inahan haruk latfag ane eleg atfag.