Read Angguruk Yali ESTER 8 Bible Online

ESTER 8 - Angguruk Yali bible

ESTER 8

¹Hun Haman Yahudi inap men seli roho welatfag ahun ino war atfag sambil ino ap suwon Ahasweros inowen at ibam men anggengge obog toho men hiyap suwon Ester og itfag. Ari tibag sambil Ester inowen ap suwon fam, ”Mordekhai ino an nikni nahalohowap naptisiyon wereg,” ulug hiyag itfag. Hiyag itfag ane ari wenggel haruk lit ap suwon inowen Mordekhai wol tibareg at ubam, ”Likiya hupmu an ap suwon men nenele ul peruk lahen ane hikit toho nambeg waharuk laruhun,” ulug hiyag itfag.

²Ari ulug hiyag itfareg Ahasweros inowen sehene tam Haman og itfag angge famen nin hebeloho hilibahon ino inggikmuwen ho roho Mordekhai og itfag. Og itfagma Ester inowen Mordekhai fam, ”Haman ibamet anggenggeyet ap suwonen og nerehekon arimano obog toho haren an fahet foroho laruhun,” ulug hiyag itfag.

³Hiyag itfareg ap suwon olohotma elenggen fam hur atug uba nim-nim heng turuk lit, ”Amalek ahun Agag inowen ondohowonen ondohowon Haman inowen Yahudi inap siyahap enebuhuk ulug wenggel harisi ane ari apmayap tin,” ibag.

⁴Ari urukmu itano ap suwon inowen fano ehen ulug wanggun emas fam wirihon inggikmu seneg latfahon ino at fil leg hibagma Ester in atfareg

⁵ap suwon hiyag utuk lit, ”Hat ap suwonen an hindi nasug lit anden heng hapminon fahet fano ehekma nahiyehen ari hikit toho timin pemihin halug anden heng hapminon tu holeg lamin: Agagen ondohowonen ondohowon Hamedata amloho Haman inowen Yahudi inap o Persia kinang atogman atogma werehon obog toho unusuhup ulug suwesingga haharoho emberisiyon elehap timihinen suwesingga eke haharoho embemihin.

⁶An nori Yahudi inap arimano siyag atukmu yet isalug nindi angginen war aruhuk tohon!” ibag.

⁷Ibagma ap suwon Ahasweros inowen hiyap suwon Ester men Yahudi ahun Mordekhai men unubam ele uruk lit, ”Haman inowen Yahudi inap siyahap enebuhuk perisi ane fahet e fam po ribisik lahakesama anggengge obog toho hat Ester og hirihi.

⁸Ari tibihi angge famen suwesingga an nunuk fam haharoho emberuk lit sehene anden tohon fam enehangge emberisiyon ino an namuwen uwag oko wa fug teg lahi. Oko wa fug teg lahi angge famen hiren fano pelihip halug hit hininggarehen nonori Yahudi inap windat enebul ulug an nunuk fam suwesingga eke hahatihipteg sehene anden tohon fam enehangge embelihip,” ulug hiyag isibag.

⁹Hiyag isibagma pikalem hinahanehon fam hup fuwap fimahen atfagma Mordekhai inowen Yahudi inap o Persia kinangma welatfahon men, ap suwon-suwon Ahasweros iraham werehon men, kinang India famen tulug Etiopia fam forohowon ap teng fuwaben 127 men, o pumbuk wal taneg senehon men suwesingga eke hahabul ulug ap suwon amingmingangge suwesingga hahatukon arimano wol enepfag. Wol enepfareg aren ele hiyag isarukmu Yahudi inap enele uruk ane men ap o pumbuk wal taneg werehonen enele uruk ane men suwesingga hahatuk ane men hikit toho haharoho imbibag.

¹⁰Imbibagma suwesingga aruma ap suwon Ahasweros unuk fam hahareg ulug Mordekhai inowen sehene enehangge emberuk angge ap suwonen tohon ino fam enehangge imbibag. Imbibagma suwesingga arimano ap suwon amingmingangge wam kuda ineyon ap suwonen tohon fam lahalug folo-folo larukonen walug laruk lit Persia kinang atogman atogma o pumbuk obog toho og isil laruk latfag.

¹¹Suwesingga arimano fam haharoho imbibahon tu, ”Yahudi inap o Persia kinang atogman atogma werehon arimano nenebe nunusuk nowen ulug o pumbuk wal taneg palu amuhupteg ap nunusul ulug turukon abet hiyabet unumalikisiyet obog toho lilibug heheg pinggi unusuhuk puhup ane fahet ap suwonen fano unusuhup peruk. Unusuhupteg enenggengge huhulangge hilahup.

¹²Unusuhup ane ari pikalem nisanggowon fam hup nuwalen aruhumu o pumbuk obog tohowen we misihim eneg unusuhubon fahet ap suwonen kong toho emberisi,” ulug haharoho imbibag.

¹³Suwesingga arimano o kema-kema walug libagma ap suwon-suwon kinang wal taneg seneg latfahon arimanowen ap o pumbuk obog toho hiyag isil laruk lit, ”Pikalem nisanggowon fam hup nuwalen aruhumu Yahudi hinap welahebonen ap hunusul ulug turukon obog toho unusuhuben wep toho welamok!” ulug hiyag isibag.

¹⁴Ari roho ap suwon amingmingangge wam kuda ap suwonen tohon fam lahalug folo-folo larukonen suwesingga ap suwon unuk fam hahatfahon arimano o kema-kema og isil libareg o Susan inap oho og isa libag.

¹⁵O ino sambil Mordekhai inowen sum ap suwon-suwonen wan turukon wan taruk lit sum ebemon il yinggirik-yenggereng urukon men wiyuk anggen palehon fam yihikon men, sum eke hililip toho wan turukon hekel sulumon men mut palehon men fam yihikon men wan talug unggulmu lahaptuk angge emas fam wirihon suwon eke langguk talug ap suwon ibamen wilip atukmu o Susan inap arimanowen yet hibareg enehiyehen enele hi roho uruk lit yunggultuk latfag.

¹⁶Ari roho teko libag ane fahet Yahudi inap arimano unubam se atukmu nin hebeloho palimu ahe ulug inindi enehiyeg haruk latfag.

¹⁷Ari hag toho suwesingga ap suwon unuk fam hahatfahon arimano o Persia kinang atogman atogma o pumbuk obog toho walug laruk latfag ambeg arimanowen oho Yahudi inap arimano palu atug inindi enehiyehen yunggultuk lit seni esetuk latfag. Ari roho turukmu yet isalug ap anggolo o Persia kinangma welatfahon arimanowen Yahudi inap fahet enekol hibareg nenemu ninap welahe angge famen nir oho Yahudi inap amuhuk ulug it sehelimu kuruk latfag.