Read Angguruk Yali ESTER 9 Bible Online

ESTER 9 - Angguruk Yali bible

ESTER 9

¹Pikalem nisanggowon fam hup nuwalen atfagma o Persia inap Yahudi inap men seli roho welatfahon arimanowen o yoho ap suwonen kong toho emberisi ane hikit toho Yahudi inap arimano apmayap enebul perukmen hebeloho Yahudi inaben nit fahet inirim teg inap arimano apmayap enebul ulug turuk latfag.

²Apmayap enebul ulug Yahudi inap arimano o Persia kinang atogman atogma o pumbuk wal taneg palu atfareg it unusul ulug turuk inap siyahap enebul ulug turukmu ap o pumbuk obog tohowen it fahet enekol hibareg ap misihen oho apmayap enebuk fug teg latfag.

³Ari regma Mordekhai ino ap suwon iraham wereg lit ele komo rurukmu ap suwonen holtuk urukon ap o Persia kinang fam welatfahon obog tohowen hol hibag. Hol haruk lit ap suwon otsi iraham welatfahon men, ap kinang wal taneg foroho latfahon men, o pumbuk wal-wal seneg latfahon men, ap suwon amingmingangge winon menen oho Mordekhai nin sebe roho ine anggolo atuk ulug onoluk atfareg at fahet enekol haruk lit ori Yadudi inap arimano inibil atfag.

⁵Inibil atfagma Yahudi inap arimano ap misihen oho sen enebuk fug angge weregma it fahet inirim teg inap arimano karog fam lebeg heheg pinggi unusibag.

⁶O Susan inowen ap teng soho fimahen 500 unusuruk lit

⁷hun Hamedata amloho Haman Yahudi inap men seli roho welatfahon umalikisi numen itano ununuk Parsandata, Dalfon, Aspata,

⁸Porata, Adalya, Aridata,

⁹Parmasta, Arisai, Aridai, Waizata men oho unusibag.

¹⁰It obog toho unusibag angge famen enenggengge hilibag fug.

¹¹O ino sambil eneg ap o Susan inowen unusibahon fahet ap suwon hiyag itfagma

¹²at inowen hiyap Ester fam ele uruk lit, ”O Susan tiyan Yahudi inaben ap teng soho fimahen men Haman umalikisi numen men unusehesa. O pumbuk winon fam enebe teng obog sehelet obog unusehesa lit teg. It obog toho unusehesama haren nin sebe roho an heng napmin peruk lahenon wereg ano? Haren og netep peruk lahenon hiyag nitmihin halug anden og hitmin,” ibag.

¹³Ibagma Ester inowen, ”Hat ap suwonen fano pemihin halug haren irikin ane hikit toho Yahudi inaben o yoho o Susan tiyan tehesa hag toho sono oho tuhup ane fahet imihin. Nin sebe roho heng haptuk lahiyon tu: Hun Haman umalikisi numen itano wareg angge e fam ililoho po unubahik lahusan in!” ulug hiyag itfag.

¹⁴Hiyag itfagma ap suwon inowen Esteren ehekon ari hikit toho tul ulug kong toho imbibag. Kong toho imbibag ane ari otsiyen ap obog toho hiyag isibareg Haman umalikisi numen itano wareg angge e fam lahap enepfag.

¹⁵Ari tibagma pikalem nisanggowon fam hup nunggul hurikenam atfagma Yahudi inap o Susan welatfahon arimano nin eke palu atfareg Susan inap enebe teng nanggoloben 300 unusibag. Unusibareg enengge hilibag fug.

¹⁶Ari uwanma pikalem ino fam hup nuwalen atfagma Yahudi inap o pumbuk winon fam welatfahon arimano palu atfareg nit fahet inirim teg inaben nenele ying neneptuk lit nenebe nunusuk nowen ulug it unusul ulug turuk latfahon enebe teng obog sehelet obog 75.000 unusibag. Unusibareg enenggengge hilibag fug.

¹⁷Likiyamon Yahudi inap o pumbuk winon fam welatfahon arimanowen tul perukukon obog toho teberukuk ulug kel taruk lit inindi enehiyehen seni esetfag.

¹⁸Ari hag toho tuk fug angge Yahudi inap o Susan welatfahon arimano pikalem nisanggowon fam hup nuwalen atfagma ak tibareg likiyamon oho unusurukmen eneg welatfareg o hinahaneg angge eneg kel taruk lit enehiyehen seni esetfag.

¹⁹Alem ari fahet mo eke fam eke fam pikalem nisanggowon fam hup nunggul hurikenam atuk sambil ino Yahudi inap inibam o pumbuk suwon Susan wereg elehon arimanowen indam ap seliyon unusulug kel tibag sambil welahe ulug inibam wal taneg wereg lit enehiyehen seni osoho felug ap obog tohowen minggiroho onori og isil laruk angge famen Yahudi inap inibam o Susan werehon arimanowen likiyamon eneg seni esetuk.

²⁰Welatfareg Mordekhai inowen teko libag ane ari obog toho suwesingga fam haharoho imbibareg Yahudi inap o Persia kinang fam yatma oho horogma oho werehon obog toho og isil lahup ulug otsi hiyag isibag.

²¹Suwesingga arimano fam Mordekhai inowen hiyag isaruk lit, ”Mo eke fam eke fam pikalem nisanggowon fam hup nunggul hurikenam atuk sambil men hup nuwal fimahen atuk sambil men o yabuk wibuk fug angge kel taruk lit welamuhup.

²²Kel taruk lit, ’O yoho tu fam Yahudi ninap ap seliyon onolohotman ninindi yuwag atukuk sambil welahe. Pikalem aru fam ninindi anggin toho welatukuk angge famen hebeloho nunubam se atisi, fesi lahaboho welatukuk ane nin atisimu fano atukukteg yunggultuk latukuk,’ ulug wenggel haruk lamuhup. O itano sambil hinibam wal taneg wereg lit hinindi henehiyehen seni osoho felug hit obog tohowen honori minggiroho og isil laruk lit ap enenggengge elehon oho fano-fano angge og isaruk lamuhup,” ulug hiyag isibag.

²³Mordekhai inowen hiyag isibag ane ari hikit toho Yahudi inaben mo eke fam eke fam o itano sambil o yabuk wibuk fug angge kel taruk lit indam oho ap seliyon unusulug kel tarukuk ulug wenggel haruk ane ak tibag.

²⁴Indam Amalek ahun Agag inowen ondohowonen ondohowon Hamedata amloho Haman Yahudi inap obog toho men seli roho welatfahon inowen Yahudi inap arimano siyahap enebuhuk ulug wenggel hibareg inindi yukap eneptuk lit unusuhuk sambil noluk atmisi ulug enehangge unuk Pur ino hik tibag.

²⁵Hik tibag angge famen Ester inowen Hamanen wenggel hibag ane ino ap suwon hiyag itfagma suwesingga eke haharoho emberuk lit, ”Haman inowen Yahudi inap alem siyahon unubam umbuhuk perukon hebeloho at inggareg ubam amag,” ulug imbibag. Imbibag ane ari hikit toho Haman men umalikisi men e fam ililoho po unubahik lahibag.

²⁶Alem ari obog toho teko libahon fahet Hamanen enehangge unuk Pur hik tibahon hikit toho Wam Purim esetuk lamuhuk uruk latfag. Yahudi inap arimano o Persia kinang fam welatfahon arimanowen enele uruk lit, ”Ari obog toho teko larukmu ninilen yet harukukteg Mordekhai inowen suwesingga fam hiyag nisarisiyon oho holtukukteg

²⁷mo eke fam eke fam Wam Purim esetuk sambil horog atukmu suwesingga ino fam haharoho imbibag ane hikit toho hup pirenam o yabuk wibuk fug angge kel taruk lamuhuk ulug sali emberuk lahe. Sali emberuk laheyon ari nit men niren endebuhukonen endebuhubon men nir oho Yahudi ninap amuhuk uruk lamuhubon obog toho menen il misig oho apmayap tuk fug angge senegman eneg welamuhuk.

²⁸Mondabi seneg lit mo eke fam eke fam kinang wal-wal, o pumbuk obog tohowen nit famen ondoko laruk lamuhubon ununggul unuk wal tanehen o Persia kinangma teko libag ane fahet wenggel hul ulug Wam Purim ino esetuk lamuhup. Ari roho nenepeleg am fug angge turukmen eneg Wam Purim esetuk ane ari nit Yadudi ninap sehelimuwen eleg aruhu fug,” ulug sali imbibag.

²⁹Sali imbibagma hun Abihail ahaloho hiyap suwon Ester inowen wenggel haruk lit Mordekhai inowen suwesingga fam hahatisiyon ineyap timin pibareg suwesingga eke haharoho emberuk lit, ”Wam Purim esetuk sambil fahet henepeleg am fug angge welamuhuben nele ine roho uruk lahi,” ulug haharoho imbibag.

³⁰Suwesingga ino fam ori Yahudi inap hi eneptuk lit, ”Hinindi yuwag toho fano roho welamuhup,” ulug hi eneplug, ”Nenere Yahudi ahun Mordekhai inowen hiyag nitisi ane men hit hininggarehen sali emberikip ane men hinine roho seneg lit Wam Purim esetuk sambil horog atukmu hiyangangge wereg lit piya sini yiko wam ino esetuk lamuhup,” ulug komo enepfag. Suwesingga fam komo eneptuk lahi ane ari Yahudi inap o Persia kinang atogman atogma o pumbuk teng fuwaben 127 fam werehon obog toho og isil lahup ulug otsi mon enepfag.

³²Ari tibagma Wam Purim esetuk sambil alem eke hag eke hag turuk ane hiyap suwon Ester inowen ineyap tibahon arimano suwesingga eke fam haharoho imbibag.