Read Angguruk Yali KELUARAN 11 Bible Online

KELUARAN 11 - Angguruk Yali bible

KELUARAN 11

¹NINIKNI Allahn Musa fam ele uruk lit, ”Anden alem angginon eke Mesir inap men onowe men unubam umbuhukmu ap suwon inowen, ’Lahup,’ ulug hiyag hisahu. We tik-tem toho, ’Hit obog toho folo wilip amek!’ ulug yanggal henebuhu.

²Ari fahet honori Mesir inap hiniraham werehonen eneliliyangge umbagpag turukon emas men perak men fam wirihon og nesemek ulug heng enebuhuben Israel inap unubam hiyag isamihin,” ibag.

³Ibareg NINIKNI Allahn Mesir inap inindi fanowap tibagma Israel inap unubahet ninindi peruk latfag. Musa fahet oho Mesir inap obog toho men onowesi menen ap suwon wereg peruk latfag.

⁴Ari peruk latfagma Musa inowen Mesir inap onowe suwon fam hiyag utuk lit, ”NINIKNI Allahn ele urukon tu holeg lamin, ’O yoho hup humanoho o Mesir inap inibam pumbuk ke walinggoho lamin.

⁵Laminmu Mesir inap unumalikisi ap angge wandabon obog toho war atuk lit hat hamloho hubalma Mesir inap onowe welaruhu peruk lahebon oho war atmisi, ap amingmingangge roti anggen lilibug turuk hiyap unumalikisi oho war amusa. Henembohom unumalik wandabon oho war amusa.

⁶War amusama Mesir kinang fam uba kulangge humon lahamisiyon ari atam oho hol harusa fuhon fobik oho hol hahup fuhon wilip atmisi.

⁷We Israel inap unubam eneg mene misihen oho unusimin ulug ele ar oho laruk lit abet wamet hilak enepmisi fug. Hilak enepmisi fugmu Israel inap INIKNI Allahn umalikisi inibikit atuk lit Mesir inap eneg unusuruk ulug honoluk aruhu,’ ehek,” il laruk lit,

⁸”Hat hotsi obog toho an nambeg wamuhupteg nolohotman kinangma ying atuk lit, ’Hat humalikisi Israel inap hondog eneplug o aru embeselug wilip amin!’ ulug hiyag numuhupmu lahuk,” ulug hiyag itfareg oloken ahummu het-pet haruk lit ap suwon embeselug wilip atfag.

⁹Musa ino Mesir inap onowe ambeg uwan la fugmu NINIKNI Allahn Musa fam ele uruk lit, ”Anden o Mesir kinang fam alem angginon enehangge anggolo turuk laruhukon fahet ap suwon inowen haren hiyag utuk laruhun ane holuhu fug,” ibag.

¹⁰Ibagma Musa men Harun menen enehangge arimano obog toho Mesir inap onowe olohotma turuk latfag angge famen NINIKNI Allahn indi imbik wambukag peruken ap suwon inowen, ”Israel inap o Mesir embeselug wilip amuhup,” ulug hiyag isibag fug.