Read Angguruk Yali KELUARAN 12 Bible Online

KELUARAN 12 - Angguruk Yali bible

KELUARAN 12

¹ NINIKNI Allahn o Mesir kinang famen Musa men Harun men unubam ele uruk lit,

²”Ketiya famen tulug fobik oho pikalem ketiyon tu fahet mo misig larukon fam pikalem tamon tu uruk lamuhup.

³Hiren Israel inap obog toho hiyag isahubon tu, ’Pikalem aru fam hup numen aruhumu o ngi hinap wal tanehen wam domba umalik fobik ninibam werehon men ambiyeg nahuk ulug hiyako umbat tahup.

⁴Umbat tahupteg nit ap nombaren wam esebulon ari nul ulug winag halug, ’Nenemu na fug teg lahe,’ puhup halug honori hinibam horog toho werehon men ambiyeg naruk lamuhup.

⁵Esebuhubon arimano wam domba ano kambing ano uwaliyon mo misig famon fanowon eneg eneko umbat tahup.

⁶Eneko umbat tahupteg hup uhanam noholug hupmu sinal ele urukmu Israel hinap obog tohowen wam arimano watuk lamuhup.

⁷Wam watuk lit mep wilip aruhuwon tot wahupteg wam nul ulug palu amuhup ibam ino sok kembilik pali filon men umbangguwag ke men are rubuhup.

⁸Hup ino sambil wam arimano indok ambulpul ke sulum pal heheg wirako yentuwal unduk sihon men roti suwap turuk angge wa fug angge wiratukon men naruk lamuhup.

⁹Wam arimano senggeluk fug angge unggul inggik uyug alet angge wiratuk lamuhup. Kubag fam esebuk fug angge indokma wirako nahup famen mep weregma nahup fug.

¹⁰Naruk lit wam nahubon arimano obog toho naruk lit henehum ouken umbusuhubon wereg halug sono hubet nahukon ulug tor angge oho umbat ta fug angge indokma yale fusuhup.

¹¹Folo-folo wilip amul ulug henesum tug toho suknig lit hunuyug hililip angge pug toho wanggun tomuk hininggik seneg lit folo-folo naruk lamuhup. Ari roho kem angge naruk lit NINIKNI Allah olohotma nahubon ari fahet wam Paskah uruk lamuhup.

¹²Hup nahup sambil ino An o Mesir inap inibam pumbuk ke walinggoho laruk lit unumalikisi ap angge wandabon abet wamet unusil lahuk. An HINIKNI Allah welahiyonen Mesir inaben nunumba ulug wel eneptukon arimano obog toho siyaha fusuhuk.

¹³Mep hinibam hit wereg ambeg sok o le ke are rubuhubon arimano hit fano welamag ulug enehangge aruhu. Anden Mesir inap unusil laruk lit hit hinibam enehangge werehen henebe hunusuk fug angge suhan hisahuk.

¹⁴NINIKNI Allahn suhan nisalug larisiyon ino fahet wel tul ulug mo eke fam eke fam hiren oho hunumalikisi fobikonen oho wam Paskah ino naruk lamuhup.

¹⁵NINIKNI Allahn ele uruk lit, ”Hup wam Paskah nahup sambilen tulug sabirenam roti suwap turuk angge ragi fam tag toho wiratukon naruk lamuhup fug. Wam Paskah nul peruk sambil ino roti suwap turuk angge pingga hulu angge hahon olma foroho lahebon obog toho selma hik isaruk lamuhup. Ap san hup sabirenam itano roti suwap turuk angge fam tag toho wiratukon naruk laruhu halug Israel ninap sehelimu welaruhu fug ulug hik isahup.

¹⁶Hup misihon men o sabit sambil men Allah fam sembahyang ul ulug palu atuk lamuhup. Palu atuk lamuhup sambil ino o yabuk wibuk fug angge we suburu nul perukon eneg isag taruk lamuhup.

¹⁷Hup misihon ino fam NINIKNI Allahn nit o Mesiren wiliboho hondog nenepfag ulug hiren oho hunumalikisi fobikonen oho mo eke fam eke fam An wel naptuk lamuhup.

¹⁸Pikalem tamon inam atukmu o nunggul hurikenam atuk sambil hupmu famen tulug hininggik sabirenam roti yuhun-at wiratukon eneg naruk lamuhup. Hup sabirenam fam roti suwap turuk angge pingga amben turukon hahon olma foroho lamuhup fug. Hit Israel hinaben oho ap pohonen oho roti suwap turuk angge fam tag toho wiratukon nahu halug Israel ninap sehelimu welaruhu fug ulug hik isahup,” ibag.

¹⁹

²⁰

²¹Musa inowen Israel inap onowesi wol enepfareg ele uruk lit, ”Hinibam wal tanehen wam Paskah nalihiben domba umalik misig-misig warik aliyek!

²²Waroho mep kubag elma kilaplihibon fam musan inggila yuhul halug hinibam sok kembilik pali filon men umbangguwag ke men are rebelihip. Are rebelihipteg ap misig oho selma la fug angge hinibam weregman eneg o sakan tuhu.

²³ NINIKNI Allahn Mesir inap unusimin ulug inibam pumbuk ke walinggoho laruk lit mep hinibam sok o le ke werehon yet hamisireg ot ap unusurukon fam, ’Enehangge wereg ibam arima kuruk lit unusuk fug!’ ulug hiyag utuk lit suhan hisalug lamisi.

²⁴O yohowen tulug hunumalikisi fobikonen oho anden ihiyon aru hikit toho turuk lamuhup.

²⁵Fobik NINIKNI Allahn hiyag hisahuk ulug sali irisi ambeg ino kuhupteg oho wam Paskah ihiyon aru hag toho naruk lamuhup.

²⁶’Nungge fahet wam Paskah aruma naruk lahe?’ ulug hit hunumalikisiyen kapal hisahup halug

²⁷hiren hebeloho, ’NINIKNI Allahn Mesir inap unumalikisi wandabon unusik oho laruk lit Israel ninap nunusuk fug angge ninibam suhan isalug larisiyon fahet wel tul ulug wam Paskah aruma At olohotma esetuk lahe,’ uruk lamuhup,” ibag. Ari ibagma Israel inap arimano enelenggen fam hur atuk lit eneluke pilabeg kinangma ying atfareg Allah wel tibag.

²⁸Allah wel tibareg laruk lit NINIKNI Allahn Musa men Harun men feneyen hiyag isibahon hikit toho turuk latfag.

²⁹O ino sambil hup humanoho NINIKNI Allahn Mesir inap unumalikisi ap angge wandabon abet wamet obog toho unusibag. Mesir inap onowe amloho ikni ubalma ap suwon welaruhu peruk latfahon oho, penjara ininggik hele waroho wereg inap unumalikisi monggiyon oho unusibag.

³⁰Hup ino sambil ap suwon men otsi men umalikisi Mesir inap obog toho in atfareg inibam obog toho fam malik ap angge waregma pen isibareg uba kulangge humon laharuk latfag.

³¹Hubanggo uba yatuk lit itano ap suwon inowen Musa men Harun men wol enepfareg ele uruk lit, ”Ketiya in atug aliyek! Hit men hunumalikisi obog toho nit wereg ambeg aruma embeselug wilip atlihip. Atam heng naptikip hag toho HINIKNI Allah fam sembahyang uhuben folo aliyek!

³²Henembohom sapi, domba, kambing hilalug folo aliyek! Hiren sembahyang uruk lit an fahet oho uhup,” ulug hiyag isibag.

³³Ari ulug hiyag isibagma Mesir inaben, ”Hit amusun toho welamuhupmu nit obog toho war amuhuk tohon hit Israel hinap folo-folo nenengginang embeselug wilip amek!” ulug enele ine roho uruk latfag.

³⁴Uruk latfagma Israel inaben roti suwap turuk angge embeselug wirabuhuk ulug imbibahon arimano kubag elma yunggaroho sum fam pug tebelug unumaloma ha roho laruk latfag.

³⁵Musan hiyag isibag ane hikit toho Israel inaben umbagpag turuk angge emas perak men sum men Mesir inaben tohon heng enepfag.

³⁶Heng enepfahon arimano Israel inap og isawag ulug NINIKNI Allahn Mesir inap inindi fanowap eneptukmu og isibag. Ari roho tibag ane ariyen Mesir inap enengge Israel inaben hilalug wilip atfag.

³⁷Israel inap o Raamses embeselug unuyug fam o Sukot libag. It libahon arimano hiyap men malik men winag isa fug angge ap eneg teng-teng angge 600.000 libag.

³⁸It arimanowen enembohom sapi, domba, kambing anggolo hilalug larukmu ap Israel inap fuhon eke anggolo ambiyeg laruk latfag.

³⁹Mesir inaben, ”Folo-folo wilip atlihip,” ulug yanggal eneptuken roti suwap turuk angge ragi men kema laruk lit naruk angge winon men hilibag fureg ragi kilabuk fug angge wirabuhuk ulug o Mesiren walug libahon arimano eneg wiratil laruk latfag.

⁴⁰Israel inap o Mesir kinang fam welatfag ane mo ilig am wirig am turukmu teng-teng angge 430 welatfag.

⁴¹Welatfagma mo ilig atug heriyeg sambil ino NINIKNI Allah umalikisi Israel inap obog toho Mesir kinang embeselug wilip atfag.

⁴²O ino sambil hubanggo NINIKNI Allahn Israel inap hondog eneplug wilip atmin ulug ilen fuki roho yet isibag. Indamen tulug ketiya oho mo ilig am wirig am tirikim o ino sambil hikir atukmu NINIKNI Allah hubanggo fuki roho yet nisibahon wel tul ulug Israel inap arimano hubanggo nohuk fug angge inil wirik toho wereg.

⁴³NINIKNI Allahn Musa men Harun men fam ele uruk lit, ”Wam Paskah esetukon fahet kong toho emberuk lahiyon tu: Ap pohon misihen oho wam Paskah naruk laruhu fug.

⁴⁴Ap pohon Israel ahun ekeyen ayeg waroho amingminganggeyap turukon ambilahap paleg laruhu halug eneg wam ino na reg laruhu.

⁴⁵Ap pohon hit sehelimu yug atukon men ap yabuk wit hisarukon menen wam ino naruk lamuhup fug.

⁴⁶Wam Paskah ino tor angge oho selma walug la fug angge we olma esetuk ambeg inowen naruk lamuhup. At uwag misig oho sengge ruk fug angge naruk lamuhup.

⁴⁷Israel hinap obog tohowen wam Paskah ino naruk lamuhup.

⁴⁸Ap pohon hit sehelimu yug atukon ekeyen an HINIKNI Allah nolohotman wam Paskah namin puhu halug at ino men ap angge at iraham werehon obog toho men enembilahap paltuk lamuhup. Enembilahap palehon eneg yug inap hag toho wereg ulug wam ino naruk lamuhup. Enembilahap paleg elehon arimanowen wam ino naruk lamuhup fug.

⁴⁹Wam Paskah esetuk ane fahet emberuk lahiyon aru hit yug hinaben oho ap pohon hit sehelimu yug atukonen oho seneg lamuhup,” ulug hiyag isibag.

⁵⁰NINIKNI Allahn Musa men Harun men hiyag isibag ane hikit toho Israel inap obog tohowen tibag.

⁵¹Ari tibag sambil eneg NINIKNI Allahn Israel inap asan wal taneg werehon iraroho hondog eneplug o Mesir kinangman wilip atfag.