Read Angguruk Yali KELUARAN 13 Bible Online

KELUARAN 13 - Angguruk Yali bible

KELUARAN 13

¹NINIKNI Allahn Musa fam ele uruk lit,

²”Israel hinap hunumalikisi ap angge wandabon men wam umalik yuhambukon wandabon men An nanggengge werehen obog toho An nubahet emberuk lamuhup,” ulug hiyag itfag.

³Hiyag itfagma Musa inowen Israel inap hiyag isaruk lit, ”O yoho NINIKNI Allah inggik ineyonen hit Mesir inap enemingmingangge welatikip ambehen hondog heneplug wilip aha. O tu sambil NINIKNI Allahn hondog neneplug wilip atisi ulug hiren oho hunumalikisi fobikonen oho mo eke fam eke fam Allah wel turuk lamuhup. O ino sambil suburu roti suwap turuk angge pingga amben turuk hahon fam wirahowon naruk lamuhup fug.

⁴O yoho pikalem tamon fam o Mesir kinangman wilip ahe.

⁵Ari fahet fobik NINIKNI Allahn nunumbasi kinang og hisahuk ulug sali imbibag ane hikit toho hit hondog heneplug Kanaan inap, Het inap, Amori inap, Hewi inap, Yebus inap men enengginang fam hunumbahik laruk lit kinang ag owe men kin ahaluwe men eleg am fug angge mondabi anggolo wereg ambeg og hisahu halug mo eke fam eke fam pikalem tamon fam Allah wel turuk lamuhup.

⁶Pikalem tamon inam atukmu hininggik sabirenam roti anggen saplangge wiratukon eneg naruk lamuhup. Naruk lit o sabit sambil NINIKNI Allah fahet henehiyehen yunggultuk lamuhup.

⁷Roti anggen saplangge wiratukon hup sabirenam naruk li roti suwap turuk angge pingga amben turuk hahon men roti suwap turuk angge fam tag toho wiratukon men hit henengginang atogman atogma olma foroho lamuhup fug.

⁸Roti anggen saplangge wiratukon naruk li horog atukmu hiren hunumalikisi hiyag isaruk lit, ’NINIKNI Allahn nit ili og neneptuk lit o Mesir kinang famen hondog neneplug wilip atisi ulug wenggel haruk lit ari hag toho turuk lamul,’ ulug hiyag isaruk lamuhup.

⁹NINIKNI Allah inggik ineyonen hondog neneplug wilip atisi ane henepeleg aruhu fug ulug hininggikmu men hinilahuwagma men pug toho foroho lamuhup. Pug toho foroho lit NINIKNI Allahn tu men ari men turuk lamuhup ulug komo neneptisi ane henembiliken uruk lit wenggel harukmen eneg welamuhup.

¹⁰Anden hiyag hisaruk lahi ane ari hiren seneg lit mo eke fam eke fam pikalem tamon inam atuk li Allah wel turuk lamuhup,” ulug hiyag isibag.

¹¹Hun Musan nin ele uruk lit, ”NINIKNI Allahn kinang og hisahuk ulug hunumbasi men hit men hunubam sali emberisi ane hikit toho Kanaan inap enengginang fam hondog heneplug lahureg kinang ino og hisahu halug

¹²hunumalikisi monggiyon men henembohom umalik yuhambukon tam endetukon men NINIKNI Allah fahet emberuk lamuhup.

¹³Wam keledai umalik tamon oho Allah fahet embelep angge famen ubalmangge wam domba emberuk lamuhup. Ubalmangge umbul fug puhup halug wam keledai umalik anggolop kong toho ware feruk lamuhup. Hit hunumalikisi ap angge wandabon oho An fahet embelebon unubalmangge nungge-nungge emberuk lamuhup.

¹⁴Ari turuk lamuhubon fahet fobik hunumalikisiyen, ’Nungge fahet ari hag toho turuk lahep?’ ulug kapal hisahup halug hiren hiyag isaruk lamuhubon tu, ’NINIKNI Allah inggik ineyonen nit Mesir inap enemingmingangge welatukuk ambehen hondog neneplug wilip atisi.

¹⁵Hondog eneplug wilip aruhuk perukmen Mesir inap onowe suwon indi arik teg lit lalihip ulug hiyag nisarisi fugmu NINIKNI Allahn Mesir inap unumalikisi ap angge monggiyon men enembohom umalik yuhambukon tamon men obog toho unusirisi. Ari tirisi ane fahet niren wam umalik tamon NINIKNI Allah fahet emberuk lahe, nunumalikisi monggiyon oho Allah fahet imbila angge famen unubalmangge nungge-nungge emberuk lahe,’ ulug hiyag isaruk lamuhup.

¹⁶Ari roho hunumalikisi hiyag isaruk lit NINIKNI Allah inggik ineyonen nit o Mesir kinangman hondog neneplug wilip atisi ane henepeleg aruhu fug ulug hininggikmu men hinilahuwagma men pug toho foroho lamuhup,” ulug hiyag isibag.

¹⁷Mesir inap onowe suwon inowen, ”Israel hinap wilip atlihip,” ulug hiyag isibag sambil ino Allahn te, ”Israel inaben Filistin inap men tog aptuk lit yihi ulug o Mesir suhuloho wamuhup tohon,” pibag. Ari pibareg o Filistin kinang keyen larukon horog teg angge famen Allahn ke ari hondog eneplug la fug angge,

¹⁸”Kalem lek keyen ik unuk Longgop yenggelehon fil[7] hondog eneplug lahuk,” pibag. Hondog eneplug wilip atfag sambil ino Israel inap tog abuk oho lit laruk hag toho enesehen seneko laruk latfag.

¹⁹Atam unumba Yusuf oluk wereg li Israel inap unubam ele hiyag isaruk lit, ”An war aruhukmu Allahn hit windat henebuhu sambil ino hit wilip atuk lit an nuwag walug laruk lamuhuk ulug sali ilihip,” ibag ane hikit toho Musa inowen hun Yusuf ino uwag walug laruk latfag.

²⁰Libareg Israel inap o Sukot embeselug o pumbuk Etam lek atogma wereg ambeg ino o sabo wirik libag.

²¹Wirik larukmu kalem hiyag isamin ulug NINIKNI Allah it enelukema laruk lit o unukoho hina alem unduhukon sehelimu, hubanggo indok ambulpul lahabeg umbagpag turukon sehelimu laruk latfag. Ari turukmu eneg unukoho men hubanggo men laruk latfag.

²²O unukoho hina alem unduhukon inowen let eneptukmu hubanggo indok ambulpul inowen let eneptuk latfag.