Read Angguruk Yali KELUARAN 15 Bible Online

KELUARAN 15 - Angguruk Yali bible

KELUARAN 15

¹Wenggel haruk lit Musa men otsi Israel inap menen NINIKNI Allah wel turuk lit sini yunggultuk latfahon tu, ”NINIKNI Allah suwon ino palimu atisimu At sini fam wel turuk latmin. Wam kuda men emberimu lahalug heriyeg inabet ik ahummu hik isarisi.

² NINIKNI Allahn ine roho ili og neneptuk latisi. Aren eneg windat neneptuk latisi. Nit Ninikni At wereg ulug hi ruruk latmin. An numbasi Inikni Allah ino anden palimuwap turuk latmin.

³At ahako roho tog aptuken Unuk NINIKNI Allah suwaleg.

⁴Mesir inap sehen senehonet keretayet obog toho ikma hik isarisi. Tog olohotma laruk inap arimano oho ik Longgop ahummu ubuk urusa.

⁵Ik ahum yaronen hondo eneptisimu it helep wamburuk hag toho ik ahum apma wamburusa.

⁶Hat hinggik mondabi ineyonen ap seliyon lilibug-lalabag toho unusuruk lahen.

⁷Hat mondabi palimu welahenonen Hele ying haptuk inap obog toho siyahap eneptuk lahen. Hat hundama ahe laharukon indok ambulpul hag toho werehen ulu angge indoken naruk hag toho inawag ulug unubam hik isaruk lahen.

⁸Ik ahum hambiliken fu ririkinmu elehet hag toho in arik laharisireg kinang ik ahummuwon lilog atisi.

⁹Ap seliyonen enele uruk lit, ’It muko lulteg sen enebul. Tog sap tulteg sele roho lin usul. It enengge obog toho huhulangge hululteg fibir amulmu ninindi yuwag atmisi,’ urusa angge famen

¹⁰Hat hambilik aheyen fu ririkinmu Mesir inap arimano obog toho iken hondo eneptisi. Helep simbuk wamburuk hag toho ik haglabut watuk ambeg ubuk urusa.

¹¹Aben nunumba ulug wel eneptukon arimano enesehelimuwon sa Hat NINIKNI Allah hahon wereg? Hebe usa fulu reg lit Hat eneg palimu welahen. Aben tuk fug teg ane men yihi ulug enekol haruk ane men Haren turuk lahen hag toho ap san tuk teg?

¹²Hat hinggik pikiron pok harukmu ap seliyon kiling elma longgo uruk hag toho eleg atusa.

¹³’Israel inap An numalikisi welamuhup,’ ulug sali emberikinon hikit toho Haren windat neneptikinteg og neneplug laruk lahen. Hat hinggik ineyonen kinang fanowon Haren tohon fam hondoko imbisik lahun.

¹⁴Haren turuk lahen ane fahet ap o pumbuk wal taneg werehonen hol haruk lit enekolen hirimuruk turuk. Filistin inap men Edom inap onowesi men enekolen unuwag elek turuk. Moab inap inine roho werehon arimanowen oho yuk lagmag uruk. Kanaan inap oho enekolen inindi pong-pong angge turuk.

¹⁶Hat NINIKNI Allahn hine roho turukmu yet hiyaruk lit it arimanowen yihi ulug inindi anggin atuken humalikisi Israel inap larukmu unum enebuk fug teg lamuhup. Ap Haren windat eneptikinon arimano lawag ulug inil embeseruk lamuhup.

¹⁷Israel inap hondog eneplug Hat welaruhuk ulug hiyako emberikin ambeg imbisik lahunteg punu Haren tohon fam o hinggareg hinggiken witikin ibam iraham yug toho welamuhuben yag enebuhun.

¹⁸Hat NINIKNI suwon Hunuk palimu welahenonen nit fet nenesugmen eneg welaruhun,” ulug yunggultuk latfag.

¹⁹Israel inap ik fimag fil nindig amul ulug ik pul ke kinang lilog teg keyen nindig atfagma Mesir inap enembohom kuda men kereta men kereta waruk inabet obog toho ik ahummu kurukmen NINIKNI Allahn ik ino hur isibagma waharuk lit hondo enepfag.

²⁰Hondo enepfagma hiyap Miryam hun Harun owe Allah amingmingangge nabi inowen waruk wibareg teltukmu hiyap obog toho at ombolim waruk tel til laruk lit yunggultuk latfag.

²¹Miryam inowen sini wilipfahon tu, ”NINIKNI Allah suwon ino palimu atisimu At sini fam wel turuk lamek! Wam kuda men emberimu lahalug heriyeg inabet ik ahummu hik isarisi,” ulug yunggultuk latfag.

²²Welatfareg Musa inowen Israel inap ik Longgop ayegman hondog eneplug o Syur lekma libareg o hinahanam lekma laruk lit ik elehen na fug angge libag.

²³Libareg o unuk Mara libag ambeg ino ik sig anggolowen na fug teg latfag. Ik sihon eneg werehen o ino unuk Mara[9] suwaleg.

²⁴Israel inap ik oboken Musa fam enele siyag toho uruk lit, ”Ik nungge nul?” uruken

²⁵Musan ele ine roho NINIKNI Allah fam sembahyang ibagma NINIKNI Allahn e paleg eke hiyag itfag. Hiyag itfagma Musa inowen e ino ikma hik isarukmen ik unduk fano atfag. O Mara inowen NINIKNI Allahn, ”Hunubabut fano roho wereg lit tu men tu men turuk lamuhup,” ulug hiyag isaruk lit An nubam wenggel niyalusa ano ulug wal isibag.

²⁶Wal isibareg ele hiyag isaruk lit, ”An nele fum toho holtuk lit Anden fano perukon eneg turuk lamuhup! Hiyag hisihiyon hininggik ine roho senetuk lamuhup halug Anden Mesir inap ouk fam unusuruk latikik hag toho hir oho ouk alem winon-winon fam unusuhuk fug. Ouk hit hunubam werehon hihit heneptukon HINIKNI Allah An tu welahi,” ibag.

²⁷Ari ibagma Israel inap o unuk Elim libag. O Elim ino ik eleruk nisanggowen men e kurma wiramna hahon teng piren nubam hilag 70 men weregma ik iraham o sabo wiroho welatfag.