Read Angguruk Yali KELUARAN 18 Bible Online

KELUARAN 18 - Angguruk Yali bible

KELUARAN 18

¹”Allahn umalikisi Israel inap o Mesiren hondog eneplug wilip atuk lit Musa men Israel inap men unubam mun ane man ane turuk latisi,” urukon Musa iyamal hun Yitro Allah fahet hubu lahaptuk ahun imam inowen hol hibareg

²iyamal ambeg laruk lit Musa uhe Zipora o Midian embeselug libahon ino men

³umalikisi piren ununuk Gersom men Eliezer men hondog eneplug libag. Amloho wandabon ino ikni Musa inowen, ”An pog ibam welahi,” ulug unuk Gersom suwalfag.

⁴Amloho fobikon, ”Mesir inap onowe inowen nuwatlep angge famen an numbasi Inikni Allah inowen let naptuk lit windat naptisi,” ulug unuk Eliezer suwalfag.[13]

⁵Yitro ino Musa uhe umalikisi men hondog eneplug lekma Allahn Musa fam ele hiyag itfag antom horogma Musan o sabo wiroho weregma libag.

⁶Kalemma laruk lit, ”Nit waharuk lahereg hiyag irik lalihip,” ulug ap mon enepfagma hiyag irik libagma

⁷Musa ino ibamen wilip atug onolohotma libareg Yitro alukema elenggen fam orohole kunuk toho hur atfareg nin in atuk lit iyamal mako pug toho hi ribag. Hi ribareg enebe wereg ane fahet umung-umung atfareg olma kibag.

⁸Olma kibareg NINIKNI Allahn numalikisi Israel inap windat enebuhuk ulug Mesir inap onowe men unubam tibag ane fahet Musa inowen iyamal hiyag utuk latfag. Israel inap kalemma laruk lit alem eke hag eke hag unubam atukmu NINIKNI Allahn let eneptuk latfahon fahet oho hiyag utukmu

⁹Yitro inowen hol hibareg ahiyeg haruk lit,

¹⁰”NINIKNI Allah Mesir inap onowe men ininggikmuwen windat heneptisiyon ino wel turuk lamul! Mesir inaben mingming heneptukmu hininggik lisoho hunumbaharisi ulug NINIKNI Allah hi ruruk lamul!

¹¹Mesir inaben ininggareg winik-wonog toho wereg lit Israel hinap henele ying heneptukmu NINIKNI Allahn let heneptisi ane ari famen aben nunumba ulug wel eneptukon arimano obog toho apma regma NINIKNI Allah eneg mondabi palimu wereg ulug an noluk aha,” ibag.

¹²Ari ibareg Yitro inowen Allah olohotma wam winon waroho yaltuk lit winon esetuk latfag. Esetukmu Harun men Israel inap onowesi obog toho men watfareg Yitro men ambiyeg Allah olohotma wereg lit suburu naruk latfag.

¹³Likiyamon Musa inowen Israel inap unubam alem werehon haltuk lit heriyegma ap anggolo alem hal nisawag ulug Musa olohotma unduhuk lit weregman hup atfag.

¹⁴Musa inowen sat toho alem haltukmu iyamal Yitro inowen yet hibareg Musa ubam ele uruk lit, ”Ap aruma unubam nanggintuk lahen? Nungge fahet hat hamu eneg alem haltuk lit heriyegma ap aruma holohotma unduhuk lit weregman hup atuk?” ulug hiyag itfag.

¹⁵Hiyag itfagma Musa inowen iyamal ubam ele uruk lit, ”Ap aruma Allahn peruk ane hiyag nisawag ulug nambeg waharuk.

¹⁶Alem unubam werehen waharukmu Allahn, ’Hunubabut fano roho wereg lit tu hag toho turuk lamuhup,’ ulug komo neneptuk ane anden ap aruma hiyag isaruk lit alem unubam werehon haloho emberuk lahi,” ulug hun Yitro hiyag itfag.

¹⁷Hiyag itfagma Yitro inowen, ”Fano turuk lahen fug.

¹⁸Yabuk ari roho turuk lahenon ariyen hat hinggareg sarap taruk lit ap aruma oho angginap eneptuk lahen. Sat toho turuk lahenon ari hat hamu eneg wereg lit angginen tehen ha fug teg.

¹⁹Ketiya anden komo hapminon holmihin halug Allah hat men welaruhu. Hat Israel inap fahet Allah olohotma unduhuk lit alem angginon it unubam werehon fahet Allahn hiyag numag ulug kapal haruk laruhun.

²⁰Allahn komo heneptuk ane haren milal eneptuk lit fano roho welamuhuben turuk lamuhup ane hiyag isaruk laruhun.

²¹Obog toho ari hat hinggarehen turuk laruhun angge famen alem seyon haloho emberuk lamuhubon fahet Israel inap sehelimuwon inindi anggat teg lit Allah fahet enekol toho werehon, enele tem toho uruk lit ninibil amag ulug uang og isaruk ane ninirim peruk inap en enebuhun. It arimano wal taneg ap teng-teng angge 1.000 men ap teng uhan 100 men ap teng piren 50 men ap numen men milal eneptuk lamuhuben in enebuhun.

²²Ap arimano unumalikisi unubam alem weregma it wal tanehen hundig-hundig kong turuk lamuhup. Alem angginon weregma iren hat hiyag hutuk lamuhupmu hat hinggarehen haltuk laruhun angge famen alem seyon weregma it ininggarehen haloho emberuk lamuhup. Iren hat let haptukmu hat hiyabuk se aruhu.

²³Allahn oho fano peruk halug anden ihiyon hikit toho turuk laruhun. Ari roho turuk lit hat hiyabuk hine roho waruk laruhunmu ap obog toho Musan fano let nenebehek ulug inibam laruk lamuhup,” ulug Yitro inowen Musa hiyag itfag.

²⁴Iyamal Yitro inowen hiyag itfag ane Musan holfareg

²⁵Israel inap sehelimuwon inindi anggat tehon eneko wal taneg ap teng-teng angge 1.000 men ap teng uhan 100 men ap teng piren 50 men ap numen men milal eneptuk lamuhup ulug in enepfag.

²⁶In enepfahon arimano wal tanehen alem Israel inap unubam werehon hundig-hundig kong turuk latfag. Alem angginon weregma Musan halukag ulug at ubam hiyag utuk lit alem seyon it ininggarehen haloho emberuk latfag.

²⁷Ap arimano in enepfareg Musa inowen iyamal Yitro lamihin ulug hiyag itfagma ibam libag.