Read Angguruk Yali KELUARAN 22 Bible Online

KELUARAN 22 - Angguruk Yali bible

KELUARAN 22

¹Allahn Musa fam ele uruk lit, ”Ap san wam eke yoholiyangge hilahureg ap fam ayeg watmin ano waroho esetmin ano puhu halug wam sapi hilarukon misig fahet onggo wam fuwaben, wam domba hilarukon misig fahet wam uhan ap ino fam heng turuk lamuhup.

²Ap misihen hubanggo ap enenggengge yoholiyangge hilarukmen ap ekeyen senetuk lit ware feserukmu ap ino war aruhu halug ap ware fesehu ahun fam alem umbuhup fug.

³O unukoho ap misihen yoholiyangge hilarukmen ap ekeyen ware fesehu halug at ubam unggum umbuhup. Ap yoholiyangge hilarukon ino oluk wereg halug yoholiyangge hilaruk angge fahet onggo heng turuk lamuhup. Heng turuk lamuhupmu ap inowen nanggengge elehen onggo og hisa fug teg lahi uhu halug ap amingmingangge welaruhu ulug ap fam ayeg wabuhup.

⁴Yoholiyangge hilarukon wam sapi ano keledai ano domba ano onoluk wereg halug wam hilarukon misig-misig fahet onggo wam piren-piren ap ino fam heng turuk lamuhup.

⁵Ap eke ambohom fano roho foroho elegman ap iniyabukmu lahureg suburu men anggur men nahu halug wam ngi ahun ubam onggo aren yatuk angge suburu men anggur men fanowon eneg heng turuk lamuhup.

⁶Ap ekeyen harep pisatukmu indoken hoholangge nil laruk lit aben yaho angge ano yahaloho emberukon ano wiyaluhu halug harep pisatuk ahun fam onggo heng turuk lamuhup.

⁷Ap misihen aren tohon uang ano anggengge winon ano ilamna roho foroho laruhun ulug are og uruhumu areyen olma forohoman ap ekeyen yoholiyangge hilahumu ap ino senebuhup halug hilahu ahun fam wahu angge hikit toho onggo pirenam heng turuk lamuhup.

⁸Hilahu ahun senebuhup fug halug areyen angge foroho ahun ino Allah olohotma lahureg we tik-tem toho nare anggengge hilarikik fug uhu.

⁹Wam sapi, keledai, domba ano sum ano nungge-nungge winon longgo urukon hiyahakupteg ap pirenen suwahal uruk lit ekeyen anden tohon hirag tarikin urukmen ekeyen oho haren hirag tarikin uruk lamuhup halug ap piren itano Allah olohotma laruk lamuhupmu Allahn hirag tarisi uhu ahunen are anggengge longgo urukon fahet onggo pirenam og utuk laruhu.

¹⁰Ap misihen ambohom keledai sapi domba ano wam winon ano ilamna roho fet nasug laruhun ulug are og uruhumu areyen forohoman wam ino uyug fala ruruk ano, war atuk ano, aben yet haruk elegman ap ekeyen yoholiyangge hilaruk halug

¹¹ap wam forohowon inowen are fam, ’Anden hat hambohom hilarikik fug ulug NINIKNI Allah olohotman nele tik-tem toho uruk lahi,’ uhumu wam ikniyen tem toho ehek puhureg are fam onggo heng turuk laruhu fug.

¹²Wam ino ap ekeyen yoholiyangge hilarisi ulug onoluk aruhumu wam ngi ahun inowen are wam foroho ahun fam onggo heng tuhu.

¹³Wam ino olomene olokonen waroho senggel taruk halug ap wam forohowon inowen wam wareg angge nareyen yet hawag ulug walug waruhureg are onggo og uruhu fug.

¹⁴Ap misihen are fam hambohom eke ilamna roho foroho laruhuken og nimin ulug heng tuhumu og uruhu ambohom ino ikni elegma war aruhu halug oho, uyug fala ruhu halug oho, wam ikniyen are fam onggo heng tuhu.

¹⁵Wam ino ikni weregma siyag atuk halug wam ikniyen are fam onggo heng tuhu fug. Wam ikniyen ambohom ino areyen ilamna roho foroho laruhu ulug ayeg waruhu halug onggo hilahuwon eneg seneg laruhu.

¹⁶Hiyap tuhumon ap ekeyen hilahuk ulug elenggen kuk fugmu ap ekeyen ele ying turuk lit at men ambiyeg nohoku halug ap inowen hiyap onggoma wahureg hiyap ino hilahu.

¹⁷Hiyap ikniyen ele ine roho nahaloho hilahu fug uhu halug ap hiyap ino men nohorukon inowen hiyap tuhumon fahet onggoma waruk ane hikit toho ikni og uruhu angge famen hiyap ino hilahu fug,” ibag.

¹⁸Pamongge fam unusuruk hiyap arimano war amag.

¹⁹Ap wam yarohorukon war amag.

²⁰Ap san NINIKNI Allah fahet eneg hubu lahabuk angge famen tu Allah hag toho wereg ulug wel eneptukon winon fahet hubu lahaptuk ahun ino war amag.

²¹Allahn ele uruk lit, ”Hit indam o Mesir kinang fam ap pohon hag toho welatikip angge re ap pohon hit sehelimu werehon arimano enele ying eneptuk lit apmayap eneptuk lamuhup fug.

²²Hiyap yuwohon men malik suwarehon men enele ying eneptuk lamuhup fug.

²³Hiren enele ying eneptuk lamuhup halug iren An nubam enele hi roho urukmu Anden hol isaruk lit

²⁴An nundama ahe laharukmu ap seliyon hit hunusukag ulug mon enebik waruhukmu hit hunuhesi yuwog atuk lit hunumalikisi suwarehon amuhup.

²⁵Hiren An numalikisi sehelimuwon inine elehon uang og isaruk lit hebeloho og numuhup sambil unon sebe roho og numag puk fug angge let eneptuk lamuhup.

²⁶Hiren henereyen paleg angge fahet fobik og nuruhuwen anden oho nare asum wan turukon foroho latmin ulug wahup. Wahup angge famen ap ino ebe hililip toho nohoruk angge winon elehen hubanggo sum ino fam nohukag ulug hiren te mo uwan ubuk uk fugmu sum ino hebeloho og irik lahup. Hiren henere ele ying turuk lamuhup halug aren An nubam ele hi roho urukmu An nindi reg lahiyonen hol hahuk,” ibag.

²⁸Allahn Musa fam nin ele uruk lit, ”Allah fahet abug uruk lamuhup fug. Hiniknisi suwon oho huluwap eneptuk lamuhup fug.

²⁹Suburu yahaltuk lahebon men anggur anggen tahantuk lahebon men minggiroho An og numon og nirik waharuk lamuhup. Hunumalikisi ap angge monggiyon An fahet emberuk lamuhup.

³⁰Henembohom sapi men domba men unumalik tamon oho An nubahet emberuk lamuhup. Wam umalik arimano indag atuk lit hup sabirenam inisinga men weregman eneg hup likinon fam An nubahet imbik waharuk lamuhup.

³¹Hit An numalikisi mumal heneptikikon welahepma wam anggenman olomeneyen waroho senggeltukon hiren naruk lamuhup fug. Meneyen nawag ulug og isaruk lamuhup,” ibag.