Read Angguruk Yali KELUARAN 23 Bible Online

KELUARAN 23 - Angguruk Yali bible

KELUARAN 23

¹Ibareg Allahn Musa fam nin ele uruk lit, ”Aben fuki roho yet ha fug angge enele si ane urukmu hiren hol halug ap hiyag isil lahup fug. Ap siyag ane turukon inibil atuk lit ili og enepmin ulug henele si ane uruk lamuhup fug.

²Ap obog tohowen siyag ane turukmu hiren yet isaruk lit it onombolim laruk lamuhup fug. Alem kong turuk lit ap obog tohowen un ane urukmu hiren hol isaruk lit iren uruk ane hikit toho uk fug angge we tem ane uruk lamuhup.

³Ap inine elehon alem unubam wereg halug hiren inilaheg ulug inibil amuhup fug.

⁴Hit men seli roho wereg ahun ambohom eke longgo urukmu hiren yet hahup halug hiren wam ino ap seliyon ambeg suhuloho hondoko imbisik lahup.

⁵Hit fahet nirim peruk ahun ambohom keledai ekeyen anggin angge ha roho walug larukmen ine elehen sahung til larukmu hiren yet hahupteg hiren an fahet nirim peruk ahun ari let timin fug ulug at embeselug la fug angge at ambohom in atug lamisi ulug let tuhup.

⁶Ap anggengge elehon alem ubam werehon kong turuk lit ap tu anggengge elehon ulug apmayap tuk fug angge alem ubam wereg ane hikit toho kong turuk lamuhup.

⁷Aben ap eke ubam un ane lombohap tuhup halug hiren holtul fug ulug iniraham welamuhup fug. Alem kong turuk ambehen ap siyag ane turuk elehon war amag ulug henele uruk lamuhup fug. Hiren ari hag toho uhup halug alem hunubamap tahubon ari Anden elehap tuhuk fug.

⁸Nit ninibil amag ulug fano-fano angge og husul ulug waharukmu hiren hilahup fug. Fano-fano angge og hisarukon arimanowen hinil hupniyap henebuhupmu ap pikir ane turukon apmayap enebuhup tohon.

⁹Hit o Mesir kinang fam ap pohon hag toho welatikip ane ariyen hiren ap pohon o kema-kema werehon inindimuwen wenggel haruk ane honoluk atisimu ap pohon hit sehelimu werehon enele ying eneptuk lamuhup fug.

¹⁰Hiren hiniyabuk wituk lit suburu yaho feheg yahal teheg turukmen eneg mo ilig am wirig am turuk lit falfalikenam lahumu

¹¹mo sabiron fam hiren nungge-nungge yaho fuk fug angge weregma amu wilip atuk angge ap enenggengge elehonen yahal taruk lamuhup. Yahal taruk lit umbusuhubon wam eli, pak, olomene menen naruk lamuhup. Ari hag toho hiniyabuk anggur men e zaitun men yatuk ambehen oho turuk lamuhup.

¹²O falfalikenam hiniyabuk wituk lit o sabir angge kel taruk lamuhup. Kel tahup sambil ino henembohom sapi men keledai men henemingmingangge hinibamen indag atukon men ap pohon hinibam werehon men oho kel taruk lamuhup.

¹³Anden nele uruk lahiyon obog toho fuki roho hol halug seneg lamuhup. Tu Allah hag toho wereg ulug wel eneptukon fam wenggel hul fug ulug ununuk uruk lamuhup fug,” ibag.

¹⁴Allahn Musa fam ele uruk lit, ”Mo eke fam eke fam hinahanam An wel naptuk lit henehiyehen sini yunggultuk lamuhup.

¹⁵Pikalem tamon nit o Mesiren wilip atukukon ino fam hiren An wel naptuk lit hiyag hisarikik ane hikit toho suburu roti suwap turuk angge ragi embeselug wiratukon eneg narukmen hup sabirenam atuk laruhu. Hiren ari roho tul ulug An nambeg waharuk lit hininggikmu eleg angge waharuk lamuhup fug.

¹⁶Roti anggen tamon paluhup sul ino oho henebe mangno atuk lit An wel naptuk lamuhup. Mo ilig atug heriyeg li anggur anggen men e anggen narukon men obog toho tahantuk lamuhup sul ino An wel naptuk lamuhuben palu atuk lamuhup.

¹⁷Ari roho turuk lit mo misig fam hinahanam Israel hinap ap angge obog toho An hit HINIKNI Allah wel nabul ulug nambeg waharuk lamuhup.

¹⁸Hiren An nubahet wam eke umbul puhup halug wam amep men roti anggen suwap turuk angge fam tag toho wiratukon men wirim teg elehen roti ari sebe roho umbuk fug angge we wam ino waroho amep An nubahet emberuk lamuhup. Umbuhupteg wam sei hubanggo forohoman o sakan tuhu rohon ulug o ino sambil eneg obog toho indokma yaltuk lamuhup.

¹⁹Mo eke fam eke fam kinangman anggen wilip atukon tamon fanowon NINIKNI Allah ibam walug waharuk lamuhup. Wam domba kambing umalik unu ino isinga ag owe men mangno roho esetuk lamuhup fug,” ulug hiyag itfag.

²⁰Allahn ele uruk lit, ”Anden hit let henebukag ulug not malaikat eke monde fuhukmu hit kalemma larikim honolohotma laruk lit fet henesugmen eneg Anden og hisahuk irikik ambeg hondoko hunumbahik lahu.

²¹An not ino fahet henekol toho wereg lit aren komo heneptuk laruhu ane fuki roho holtuk lamuhup. Allah inggarehen ot ino feneyen ele hiyag nisaruk ulug at ele sobir isahup fug. Sobir isahup ane ari An not inowen ambolmaya fusuhu fug.

²²Hiren at ele fuki roho hol haruk lit Anden not ino feneyen hiyag hisaruk laruhuk ane obog toho turuk lamuhup halug hit henele ying heneptuk inap Anden enele ying eneptuk lit hit men seli roho wereg inap An men seli roho wereg ulug unusuhuk.

²³An not ino hit honolohotma laruk lit Amori inap, Het inap, Feris inap, Kanaan inap, Hewi inap, Yebus inap men enengginang fam hondoko hunumbahik larukmu Anden ap arimano obog toho elehap enebuhuk.

²⁴Ap arimano onombolim laruk lamuhup fug. Iren tu Allah hag toho wereg ulug wel eneptukon onolohotman hiren henelenggen fam hur atuk lit wel eneptuk lamuhup fug. Iren sembahyang uruk hag toho hiren sembahyang uk fug angge usangge helep fam laltuson arimano halog toho siyaha feseruk lamuhup.

²⁵Hiren we An HINIKNI Allah wel naptuk lamuhup. Wel naptuk lamuhupmu Anden hit hinine roho welamuhuben suburu men ik men anggolo og hisaruk lit ouk hit sehelimu werehon obog toho elehap tuhuk.

²⁶Hit henengginangma hiyap ibili rehon men umalik wareg angge indag atukon men eleg lamuhup. Anden hinineyap heneptukmu hit sabal atuk lit war atuk lamuhup.

²⁷Anden ap hit lahup ambeg werehon obog toho inindi nonghonga fusuhukmu ap arimano enekolen hit henelukeman linggik-longgo uhup.

²⁸Anden ap obog toho enekolap eneptuk lit Hewi inap, Kanaan inap, Het inap men hit honolohotman yanggal enebuhuk.

²⁹Mo misig fam ap arimano obog toho yanggal enebuhuk fug. Yanggal enebuhuk ambeg arimano ap elehen fare aruhumu wam eli men olomene men anggolo atuk lit hit siyahap henebuhup tohon!

³⁰Anden ap arimano misig heheg yanggal enebil larukmen eneg hit henebe anggolo atuk lit kinang obog toho ilmig til laruk lamuhup.

³¹Kinang ilmig til laruk lamuhubon ari Anden hili imbil laruk lit ik Longgop famen tulug ik saho ahik suwon fam, lek ik ambut filon famen yali fil ik Efrat fam imbil lahuk. Imbil laruk lit ap kinang ari fam werehon hininggikmu umbuhukmu hiren yanggal enebuhupteg enengginang ari obog toho hit ngi amuhup.

³²Ngi atuk lit kinang yug inap men iren tu Allah hag toho wereg ulug wel eneptukon men nininggik ahandip toho welamuhuk ulug sali umbuhup fug.

³³Yug inap arimanowen hinindi ninap heneptukmu hiren An henembol yig nutuk lit iren nunumbasi ulug wel eneptukon niren oho wel eneptuk lamuhuk puhup ane ariyen yebangge elma kuhup tohon kinang yug inap arimano hit hiniraham kinang ino fam welamuhup fug,” ibag.