Read Angguruk Yali KELUARAN 25 Bible Online

KELUARAN 25 - Angguruk Yali bible

KELUARAN 25

¹ NINIKNI Allahn Musa fam ele uruk lit,

²”Haren Israel inap hiyag isahunon tu: Allah fahet fano-fano angge imbik maniyek! Hit hinindimuwen imbila peruk lahebon eneg embelihip.

³Imbik watlihibon iminon tu: Ili ruruk angge emas, perak, tembaga men,

⁴sum il hik toho yihikon wiyuk anggen, mut, polu men fam palehon, sum il sulumon kindik hein fam yihikon men, wam kambing oruk men,

⁵wam domba ahap mut fam palehon men, o ungga saltukon inag ahap hag angge men, e sahi men,

⁶hindali ahaluwe iral faheron men, amben fano angge ap ununggulmu hililtukon men hubu lahaptuk angge men,

⁷helep il uningga rohon men, helep ili faya urukon winon sum Allah amingmingangge imam onoweyen wan turuk asum fam topno reberukon men, sum imamen amigmu sukni ferukon fam topno reberukon men ari obog toho walug watlihip ulug hiyag isahun.

⁸Ari hiyag isahunmu obog toho walug wamuhupteg An hit sehelimu welaruhuk ambeg ulug o sabo fanowon eke wit numuhup.

⁹O sabo fanowon men undama foroho angge men fano roho wit numag ulug Anden ketiya eneg wirimangge hubam unug hamin. Wirimangge unug haminon hikit toho ari obog toho wiri fuhup,” ulug hiyag itfag.

¹⁰Allahn Musa fam ele uruk lit, ”Israel inaben e sahi sali roho peti eke wiri fuhup. Peti ino wirimangge yat toho wirim tuhubon il piren 110 sentimeter, horog toho wirim tuhubon men lahabeg wirim tuhubon men ambi roho il misig 60 sentimeter wirim toho wiri fuhup.

¹¹Peti ino selma oho undama oho ili ruruk angge emas orohole mondabi fanowon fam hililip toho lombog tubuhup. Lombog tubuhupteg peti inggapkap pali filon fene hesenggengge emas fam wirihon topno rubuhup.

¹²Peti ino paya roho walug laruk ahen fahet indok fam emas wirako sehene uhan lale fuhunteg peti fuma-fuma sehene piren-piren hunduhuk ke ulug indit uhan fam topno rebehun.

¹³Topno rebehunteg paya roho walug laruk ahen ulug e sahi piren oko emas fam hililip toho lombog tubuhun.

¹⁴Lombog tubuhunteg e paya roho walug laruk ahen piren itano sehene uhan itano fam kilabe fuhun.

¹⁵Mondabi kilaboho welaruhu angge re e piren itano nin hebeloho lisoho wilibuhup fug.

¹⁶Peti ino obog toho wiri fuhupmu Anden Wene Numen helep piren fam hahare ferikikon hat og huruhukon itano haren peti elma kilabuhun.

¹⁷Peti ele latuk angge emas orohole mondabi fanowon fam wituk lit peti wirimangge yat toho wirim tuhubon men horog toho wirim tuhubon men hikit toho wiri fuhun.[16]

¹⁸Wiri fuhunteg kik turuk angge fam emas teloho malaikat hag angge piren ilit toho wiri fuhun. Malaikat wiri fuhunon itano peti ele latuk angge atog fuma-fuma unduhuk fuhun.

¹⁹Malaikat piren itano peti emberimu unduhuk feruk lit ele latukon men ahandip toho misihap tuhun.

²⁰Malaikat piren itano fuma-fuma unduhuk lit onorohole peti ele latukon fil pilaboho weregma eneherabul peti ino palimu wiriloho hondo reg lamuhup.

²¹Ari obog toho wiri fuhunteg Anden helep piren Wene Numen hahare ferikikon hat og huruhukon itano haren peti elma kilaboho ele lare fuhun.

²²Peti ino fam An hat men ambi atuk lamuhuk. Ambi atuk lit An malaikat peti emberimu unduhuk fuhunon itano honggolegma welaruhuk ambehen hat hubam nele uruk laruhuk. Nele uruk lit Israel inaben turuk lamuhubon fahet milal eneptuk laruhun ane obog toho hiyag hutuk laruhuk,” ibag.

²³Nin Allahn Musa fam ele uruk lit, ”E tuwalehon suburu roti tag toho wirahowon emberuk ambeg ulug e sahi seng toho wirimangge yat toho wirim tuhunon il misig, horog toho wirim tuhunon il misig pul ke minggiroho, lahabeg wirim tuhunon il misig pul ke minggiroho nin tot sebe roho wiri fuhun.

²⁴Wiri feruk lit e ino emas orohole mondabi fanowon fam hililip toho lombohap tebehunteg inggapkap fene hesenggengge emas fam wirihon topno rebehun.

²⁵Topno rebelug e tuwalehon ino walinggoho e seng toho wirimangge lahabeg wirim tuhunon inggik misig wirim toho palehon eke imbik lahakun. E seng tohon ino fene oho hesenggengge emas fam paloho wirihon topno rebehun.

²⁶E tuwalehon ino paya roho walug laruk ahen fahet sehene uhan emas fam lale fuhunteg e seng tohon walinggoho imbik lahakunon apma e tuwalehon uyug uhan fam hunduhuk fuhun.

²⁸Hunduhuk fuhunteg paya roho walug laruk ahen ulug e sahi piren oko emas fam hililip toho lombog tebehun.

²⁹Lombog tebehunteg An Allah nolohotma ik anggur ahaluwe hililtukon fahet kou, kubag, ikag, fili hag angge men emas orohole mondabi fanowon fam lale fuhun.

³⁰Ari obog toho wiri fuhunteg e tuwalehon fam An Allah fahet roti anggen tag toho wirahowon umbuhun hag toho fobik oho hundig-hundig emberukmen eneg welamuhup,” ibag.

³¹Nin Allahn Musa fam ele uruk lit, ”Haren kik turuk angge fam emas orohole mondabi fanowon teloho iral emberuk angge eke lale fuhun. Laltuk lit uyug men uwag men hesenggengge e owil hahon men ahandip til la fug angge we misihim mangno roho lale fuhun.

³²Iral emberuk angge uwag misig fam fuma fil inggik hinahan, fuma fil inggik hinahan wiri fuhun.

³³Inggik wal taneg fam hesenggengge e owil hahon hinahan topno reg laruhu.

³⁴Iral emberuk angge uwag fam hesenggengge e owil hahon uhan topno rebehunteg

³⁵inggik fuma-fuma wilibig ambeg hinahan itano apma e owil hahon misig-misig topno rebehun.

³⁶Iral emberuk angge ino emas orohole fanowon fam teloho lale feruk lit inggiket hesenggenggeyet misihim eneg mangno roho lale fuhun.

³⁷Lale fuhunteg hindali ahaluwe hundutuk ambeg ulug kou sabiren wiri fuhun. Wiri fuhunteg hindali ahaluwe hundutukon seleg ino aluke fil umbagpag tukag ulug kou sabiren itano iral emberuk angge palimu umbuhun.

³⁸Iral haltuk angge men indok ware feseruk ahik foroho anggubag men emas orohole fanowon fam laluhun.

³⁹Iral emberuk anggeyet haltuk angge obog tohowet emas orohole mondabi fanowon anggin te 35 kilogram fam wibuhup.

⁴⁰Ari obog toho wiri feruk lit wirimangge Anden punu tu famen hubam unug hihiyon wirim toho wibukag ulug haren yet teg laruhun,” ulug hiyag itfag.