Read Angguruk Yali KELUARAN 26 Bible Online

KELUARAN 26 - Angguruk Yali bible

KELUARAN 26

¹Allahn Musa fam ele uruk lit, ”Haren o sabo eke wit nuruhun. O sabo ino hulubit ulug sum il sakowon hik toho urukon mut men polu men fam palehon numen yihik fuhunmu ilit toho wituk inaben sum arimano fam malaikat ahuhe ilit tuhup.

²Sum itano wal taneg wirimangge yat toho wirim tuhunon il nisanggowen, onggorik wirim tuhunon il piren wirim toho yihik fuhun.

³Sum yihik fuhunon fuwaben-fuwaben seleben toho ahandip tuhun.

⁴Sum seleben toho ahandip tuhunon piren itano il hunduhuk fuhunen enelulukmu ahale polu fam palehon wal taneg teng piren yihik fuhun.

⁶Yihik felug ahale sum piren fam werehon itano ahandip turuk angge ulug emas fam kanti hag angge teng piren wiri fuhun.

⁷Wiri fuhunteg o sabo ungga fahet wam kambing oruk fam sum nanggoloben yihik fuhun.

⁸Sum yihik fuhunon itano wal taneg wirimangge yat toho wirim tuhunon il nuwalen, onggorik wirim tuhunon il piren wirim toho yihik fuhun.

⁹Sum yihik fuhunon fuwaben seleben toho misihap tuhunteg sum falfaliken winon oho ahandip turuk lit falfalikon ino sok pali fil welaruhu ulug pul ke si roho seleben tuhun.

¹⁰Sum misihap tuhunon piren itano hunduhuk ferukon fahet sum piren enelulukmu ahale wal taneg teng piren yihik fuhun.

¹¹Yihik felug sum piren itano ahandip turuk angge ulug ine angge tembaga fam kanti hag angge teng piren wiri fuhunteg sum piren itano o ungga saltukon fahet kanti itano fam ahandip tuhun.

¹²Sum ungga saltukon inowen sum hulubit hag toho werehon arimano hondo reg lit sum ungga saltukon ino yat tehen sum wirimangge il misig wirim toho werehon o sabo ambolma lisoho sal aruhu.

¹³O sabo fuma-fuma sum wirimangge il misig pul ke minggiroho wirim toho ungga oholuk hikir aruhu.

¹⁴O sabo ungga altap toho hondo reg lamag ulug wam domba ahap mut fam palehon imbik lahalug ahap ino palimu altap toho inag ahap hag angge imbik lahakun.

¹⁵Ari obog toho wiri felug o sabo ubahat fahet e sahi wep toho umbuhun.

¹⁶E sahi arimano wal taneg wirimangge yat toho wirim tuhunon il uhanen, horog toho wirim tuhunon il misig wirim toho seng tuhun.

¹⁷E seng tuhunon arimano ambiyang piren toho kabale fil lahunteg umbuhun.

¹⁸E umbuhunon arimano ubahat ik eleruk filon men ambut filon men fahet wal taneg likin fumahen wep toho umbuhun. Umbuhunteg anduli fo roho ambiyang pilaptuk ambeg ulug ili ruruk angge perak fam anduli teng misigmen nubam hilag nuwalen wiri fuhun. Wiri felug ubahat wal taneg werehon ambiyang piren itano anduli fo reg ambeg itano piren-piren pilabe fil lahun.

²²Ubahat ambol fil hubula fil werehon fahet e falfaliken wep toho umbuhun.

²³Ubahat ambolma indit fuma-fuma werehon fahet e anggeyon piren sali roho wiri fuhun.

²⁵E ubahat ambolma werehon falfaliken men e anggeyon indit wibukon piren men hutuk teberuk ambeg ulug ili ruruk angge perak fam anduli nisanggo fumahen wiri felug ubahat misig-misig anduli piren-piren fam pilabe fil lahun.

²⁶Pilabe fil lahunteg e anggeyon tik hag toho ahandip turukon ulug ubahat ik eleruk filon, ambut filon, hubula filon wal taneg fahet e anggeyon tik hahon fuwaben seng toho wiri fuhun.

²⁸E anggeyon tik hahon misig ubahat pik-pulmu emberuk lit indit fuman fuma watil lahun.

²⁹E ubahat men tik ahandip turuk ahen arimano men emas fam hililip toho lombog tebelug sehene emas fam wirihon ubahat wal taneg hunduhuk fuhunon fam kilabe fil lahun.

³⁰Ari obog toho wituk lit Anden tom tu famen hiyag hirihiyon hikit toho o sabo fanowon ino obog toho wit nuruhun.

³¹O sabo obog toho wiri felug peti elma Wene Numen haharehon kilabeg ambeg mapmu roho ulug aluke fil sum tuhuloho pilabeg asum il sakowon hik toho urukon mut men polu men fam palehon eke yihik fuhunmu ilit toho wituk inaben sum ino fam malaikat ahuhe ilit tuhup.

³²Sum ino tuhuloho pilaptuk ambeg ulug e sahi uwag uhan emas fam hililip toho lombohap tubuhunteg o undama hutuk teberuk ambeg ulug ili ruruk angge perak fam anduli uhan wiri fuhun. E sahi anduli uhan itano fene laha fuhunteg sum ino emas kanti hahon ambiyangman suknoho pilabe fuhun.

³³Pilabe fuhunteg peti Wene Numen haharehon elma kilabeg angge ino walug sum ino ambolma imbik kuhun. Imbik kuhunmu sum ino hili regma aluke fil unuk ’Fanoma’, ambol fil unuk ’Mondabi Fanoma’ suwaleg laruhu.

³⁴Ari obog toho tubuhunteg peti ele lare fuhun.

³⁵Lare fuhunteg sum tuhuloho pilabehon ino alukema hinggik hare fil e tuwalehon An fahet roti anggen tag toho wirahowon emberuk angge ino embelug sum ino alukema hinggik pikit fil iral emberuk angge ino unduhuk fuhun.

³⁶Unduhuk fuhunteg o sabo sok ulug sum il sakowon hik toho urukon mut men polu men fam palehon yihik fuhun.

³⁷Yihik fuhunteg sum ino tuhuloho pilaptuk ambeg ulug e sahi uwag fuwaben emas fam hililip toho lombohap tubuhunteg hutuk teberuk ambeg ulug ine angge tembaga fam anduli fuwaben wiri fuhun. E sahi anduli fuwaben itano fene laha fuhunteg sum ino emas kanti hahon ambiyangman suknoho pilabe fuhun,” ulug hiyag itfag.