Read Angguruk Yali KELUARAN 27 Bible Online

KELUARAN 27 - Angguruk Yali bible

KELUARAN 27

¹Allahn Musa fam ele uruk lit, ”An fahet wam waroho hubu lahaptuk angge ulug e sahi seng toho wiri fuhun. Wiri fuhunon wirimangge yat toho wirim tuhunon men ayuhuk fil wirim tuhunon men ambi roho il hinahan, lahabeg wirim tuhunon il piren wirim toho wiri fuhun.

²Wiri feruk lit hubu lahaptuk ambeg ambiyang uhanet we misihim eneg mangno roho wiri fuhunteg hubu lahaptuk angge obog toho ine angge tembaga fam hililip toho lombohap tebehun.

³Lombohap tebehunteg ine angge tembaga fam indok anggen kilaboho walug laruk angge men, fa men, kubag mep hinangguruk angge men, ul arep men, kou ul hik isa laruk angge men wiri fuhun.

⁴Wiri fuhunteg hubu lahaptuk angge hililip turukon ulug tembaga fam sum hag angge indit tehon eke lale felug indit uhan fam sehene tembaga fam wirihon hunduhuk fuhun.

⁵Hunduhuk fuhunteg sum hag angge inowen hubu lahaptuk angge apma fil hililip tukag ulug kinangman laharuk lit hiliyangge pulmu werehon ino fam imbik lahakun.

⁶Imbik lahakunteg hubu lahaptuk angge paya roho walug laruk ahen ulug e sahi piren oko tembaga fam hililip toho lombog tebehun.

⁷Lombog tebehunteg paya roho walug laruk ahen itano sehene hubu lahaptuk angge fuma-fuma hunduhuk fuhunon fam kilabuhun.

⁸Anden punu tu famen hiyag hirihiyon hikit toho haren hubu lahaptuk angge ino wiri feruk lit undama kolo reg laruhu ulug e paleg fam wiri fuhun,” ulug hiyag itfag.

⁹Allahn Musa fam nin ele uruk lit, ”O sabo fanowon owahalma ap palu atuk lamuhup ambeg walinggoho elehet huk toho warukon fahet sum yaron il sakowon hik toho yihik fuhun. Elehet ik ambut filon fahet sum yihik fuhunon wirimangge yat toho wirim tuhunon il teng piren wirim toho yihik fuhun.

¹⁰Yihik fuhunteg sum ino tuhuloho pilaptuk ambeg ulug e uwag likin fumahen wep toho embelug e uwag hutuk teberuk ambeg ulug ine angge tembaga fam anduli likin fumahen oho wiri fuhun. Wiri fuhunteg sum ino hele fuman fuma lisil lahabik umbuhunon famen kanti hahon ambiyangman suknoho pilabe fuhunon ulug heleyet kanti hag anggeyet ili ruruk angge perak fam wiri fuhun.

¹¹Ari roho elehet ik ambut filon wiri fuhun ane hag toho elehet ik eleruk filon oho sumet e uwahet heleyet kanti hag anggeyet wiri feruk lit elehet wirimangge ilihig wirim tuhunon il teng piren wirim toho wiri fuhun.

¹²Elehet hubula filon wirimangge nunggulig wirim tuhunon il hinahaneg fumahen wirim toho wiri fuhunteg sum tuhuloho pilabeg ambeg ulug e uwag numen wal taneg anduli tembaga wirihon fam hutuk tebehun.

¹³Elehet yali filon wirimangge nunggulig wirim tuhunon oho il hinahaneg fumahen wirim toho wiri fuhun.

¹⁴Elehet yali filon sok pulmu weregma sok ino fuma-fuma wal taneg elehet asum wirimangge yat toho wirim tuhunon il sabiren wirim toho yihik fuhunteg sum tuhuloho pilabeg ambeg ulug e uwag hinahan anduli hinahan fam hutuk tebehun.

¹⁶Hutuk tebehunteg sok ele latukon fahet sum il sakowon hik toho urukon mut men polu men fam palehon yihik feruk lit sum wirimangge yat toho wirim tuhunon il numen wirim toho yihik fuhunteg sok ele latuk asum tuhuloho pilabeg ambeg ulug e uwag uhan anduli wal taneg fam hutuk tebehun.

¹⁷Anduli o sabo fanowon walinggoho yaho fuhunon arimano obog toho ine angge tembaga fam wirihon eneg yaho fuhun. Yaho fuhunteg hele fuman fuma lisil lahabik lahakunon famen kanti hahon ambiyangman elehet asum ino suknoho pilabe fuhun. Hele ino men kanti hag angge arimano men ili ruruk angge perak fam wiri fuhun.

¹⁸Ari roho o sabo fanowon walinggoho elehet huk toho waruk lit wirimangge ilihig wirim tuhunon il teng piren, nunggulig wirim tuhunon il hinahaneg fumahen, lahabeg wirim tuhunon il hinahan wirim toho wiri fuhun.

¹⁹Wiri fuhunteg o sabo fanowon fam foroho angge obog toho ine angge tembaga fam wiri fuhun. Ari hag toho o sabo fanowon hililip turuk asum men elehet walinggoho wahun asum men fahet posiyemanggen kinangma yatukon arimano oho tembaga fam wiri fuhun,” ulug hiyag itfag.

²⁰Allahn Musa fam nin ele uruk lit, ”O sabo fanowon fam iral ino misihim oho umbusuk fug angge umbagpag turuk lit eneg welaruhu ulug Israel inaben hindali ahaluwe il fanowon eneg walug waharuk lamuhuben hiyag isahun.

²¹Hiyag isahun ane hikit toho turuk lamuhupmu iral sum peti Wene Numen haharehon elma kilabeg angge mapmu roho aluke fil pilabehon olohotma hunduhuk fuhunon ino hupmu famen umbagpag turukmen eneg o sakan turuk laruhu. Hun Harun umalikisi menen iral ino foroho lamuhup. Ari turuk lamuhubon fahet hiyag hirihiyon ari Israel hinaben endebuhubonen endebuhubon arimanowen oho mondabi senegman eneg welamuhup,” ulug hiyag itfag.