Read Angguruk Yali KELUARAN 28 Bible Online

KELUARAN 28 - Angguruk Yali bible

KELUARAN 28

¹Allahn nin Musa fam ele uruk lit, ”Howe Harun umalikisi Nadab, Abihu, Eleazar, Itamar men Israel inap sehelimu An namingmingangge imam welamuhuben wol enebuhun.

²Wol enebuhunteg Harunen An niyabuk wituk lit sum wirim tohon wan teg laruhuwon fahet sum il mondabi fanowon yihik fuhuben sum uruk inap ininggik fanowon Anden inindi anggarap eneptikikon obog toho hiyag isahun.

⁴Sum hiyag isahunon arimano imam Harun men umalikisi at ubalmangge in atuk lamuhubon menen wan teg lamuhup ulug sum ebemon men, undamon il hik tehon men, amigmu hililip toho wan tehon unuk efod men, sum eke amigmu sukni ferukon men, unggulmu langguk turukon men, pahaluk alunggu ke pug turukon men yihik fuhup.

⁵Sum arimano yihik fuhuk ulug hekel wiyuk anggen fam palehon men, mut fam palehon men, polu fam palehon men, hekel ili ruruk angge emas suwalehon men, sum sulumon il sakowon men wep toho umbuhup.

⁶Wep toho umbuhup angge arimano fam sum ilit toho uruk inaben yihik feruk ane hikit toho sum amigmu hililip toho wan turukon unuk efod ino yihik fuhup.

⁷Sum ino misihim mangno roho uk fug angge olohotma wan turukon men ambolma wan turukon men amu-amu yihik felug sum piren itano ahandip turuk angge ulug ahale umaloma emberukon piren yihik fuhup.

⁸Ahale itano yihik felug hele alunggu ke pug turukon eke yihik fuhun. Hele yihik fuhunon ino sum efod ino yihik fuhun ane wirim toho hekel sulumon men, wiyuk anggen, mut, polu men fam palehon men, hekel ili ruruk angge emas suwalehon men fam yihik felug sum efod ino men ahandip toho misihap tuhup.

⁹Ari obog toho wiri felug haren helep ili faya rurukon piren oko walug helep paltuk inaben enehangge ilit toho paltuk ane hikit toho helep piren itano fam Israel inap ununggul unuk tamon famen tulug nisanggowon fam paloho emberuk lit helep wal taneg fam ununuk falfaliken paloho umbuhun. Paloho umbuhunteg helep piren itano sum efod ahale piren fam topno rebelug helep piren itano walinggoho lisarep hag angge emas fam wirihon eke topno rubuhun. Ari obog toho wiri fuhunon ari hun Harun inowen umaloma wan turuk laruhumu An HINIKNI Allahn Israel inap ununggul unuk helep fam haharehon arimano obog toho yet isaruk lit it fahet wenggel isaruk laruhuk.

¹³Sum efod ino obog toho wiri felug hekel suwaltuk ane hikit toho ili ruruk angge emas orohole fanowon fam hele piren suwaluhunteg sohomangge emas fam wirihon piren fam kilaboho sum efod ahale fam topno rebehun.

¹⁵Sum efod ino yihik fuhun hag toho sum enehangge hik turukon fani roho emberuk ambeg ulug sum ilit toho uruk inaben yihik feruk ane hikit toho hekel sulumon men, wiyuk anggen, mut, polu men fam palehon men, hekel ili ruruk angge emas suwalehon men fam sum amigmu sukni ferukon eke yihik fuhun.

¹⁶Sum ino pul ke si roho yihik feruk lit wirimangge yat toho wirim tuhunon men onggorik wirim tuhunon men ambi roho inggik misig wirim toho yihik fuhun.

¹⁷Sum yihik fuhunon fam helep ili faya rurukon iraroho topno reberuk lit sum ino ilan fil helep il ip orohole hahon, il puhulik palehon hahon, il piyanu palehon hahon men,

¹⁸helep ilan fil umbuhunon iraham helep il mut palehon hahon, il sing pohol hahon, il ik wirik anggolowon hahon men,

¹⁹helep itano iraham e ahaluwe helep hag atfahon, helep hesenggengge ohowon hahon, il wiyuk anggen hahon men,

²⁰sum ino atogma helep il polu palehon hahon, il singon men yanggowon men altap tohon, sili umbagpag turukon men topno rebehun. Helep arimano topno reberuk lit helep wal taneg walinggoho lisarep hag angge emas fam wirihon eke topno rebehun.

²¹Helep topno rebehunon nisanggowen wal taneg fam helep paltuk inaben paltuk ane hikit toho Israel inap ununggul unuk nisanggowen ununuk man-man paloho umbuhup.

²²Paloho umbuhupteg sum amigmu sukni ferukon ino fahet hekel suwaltuk ane hikit toho emas orohole fanowon fam hele piren suwaluhun.

²³Suwaluhunteg emas fam sehene piren lale felug sum ino awirihigmu fuma-fuma topno rebehun.

²⁴Topno rebelug hele piren itano sehene itano fam kilaboho umbuhun.

²⁵Kilaboho umbuhunteg sum amigmu sukni ferukon ino sum efod alukema ahandip amag ulug hele piren itano atog wal taneg sohomangge sum efod ahale piren fam topno rebehunon itano fam kilaboho umbuhun.

²⁶Kilaboho umbuhunteg emas fam sehene piren eke lale felug sum amigmu sukni ferukon ambol fil onggorik fuma-fuma topno rebehun.

²⁷Topno rebelug sehene emas fam wirihon piren eke sum efod ahale piren fam sum awirihigmu horogma hele alunggu ke pug turukon emberimu topno rebehun.

²⁸Topno rebelug sum amigmu sukni ferukon ino hele alunggu ke pug turukon pali fil suknigmu loloho lahu rohon ulug sehene sum ino fam werehon men sehene sum efod fam werehon men hele wiyuk anggen palehon fam ahandip tuhun.

²⁹Ari obog toho wiri fuhunon hun Harun inowen sum Israel inap ununuk hahareg asum ino amigmu indi horogma suknig lit likiya hupmu An nibam kuruk laruhu halug An HINIKNI Allahn yet haruk lit it fahet wenggel isaruk laruhuk.

³⁰Sum amigmu sukni ferukon elma enehangge hik turukon ununuk Urim men Tumim men fani ruhun. Enehangge fani ruhun asum ino Harun inowen amigmu suknig lit An HINIKNI Allah nolohotma kik waharuk laruhu. Ari roho turuk lit Harun inowen NINIKNI Allahn enehangge tu feneyen alem nit Israel ninap nunubam werehon hal nisawag ulug likiya hupmu at indi horogma foroho laruhu.

³¹Sum efod unda fil wan turuk asum ino abirangge hekel polu palehon fam il hik toho yihik fuhun.

³²Yihik feruk lit sum ino pulmu ap unggul fahet yendeg ambeg ino tararag tuhu rohon ulug sing yihik feruk ane hikit toho keyenteg ele ino walinggoho awirihig ineyon fam yihik fuhun.

³³Sum ino yihik felug hekel wiyuk anggen fam palehon men, mut palehon men, polu palehon men fam yanggila anggen hahon lale fuhunteg sum ino onggorikmu walinggoho ilili fil lahun. Yanggila anggen hahon ilili fuhunon misig-misig sehelimu pinggong hahon emas fam wirihon song tibisil lahun.

³⁵Sum haren yihik fuhunon ino Harun inowen yabuk wituk lit wan teg laruhu. An HINIKNI Allah nolohotma wan teg lit o fanowon fam kuk wam wilip am turuk lit war aruhu rohon ulug pinggong ele urukmu eneg laruk laruhu.

³⁶Nin eke haren emas orohole fanowon fam suwesingga hag angge eke lale felug helep fam paltuk ane hikit toho suwesingga hag angge ino fam ’NINIKNI Allah fahet’ ulug paloho umbuhun.

³⁷Suwesingga hag angge ino hekel polu palehon fam sum Harunen unggulmu langguk turukon alukema ilili fuhun.

³⁸Suwesingga ilili fuhunon ino Harunen likiya hupmu ilahema wan teg lit Israel inaben An nubahet emberuk angge An nolohotma walug waharuk laruhu. Walug waharukmu Israel inaben An nubahet siyag toho emberuk ane fahet nambit pele angge famen Anden suwesingga fam haharehon ino yet haruk lit siyag ane ino Harunen ha ruruk ulug wenggel halug iren emberukon fahet fano embehesa peruk laruhuk.

³⁹Nin eke hekel sulumon il hik toho sum undamon men sum unggulmu langguk turukon men yihik fuhunteg sum ilit toho uruk inaben yihik feruk ane hikit toho pahaluk hag angge eke yihik fuhun.

⁴⁰Yihik fuhunteg Harun umalikisiyen oho An niyabuk wituk lit sum wirim tohon wan teg lamuhubon ulug sum undamon men pahaluk hag angge men sum ununggulmu langguk eneptukon men fano roho yihik fuhun.

⁴¹Sum yihik fuhunon arimano obog toho howe Harun umalikisi men wan enebuhun. Wan enebuhunteg e ahaluwe amben fanowon ununggulmu are ruruk lit An namingmingangge imam welamuhup ulug in enebuhun.

⁴²Nin eke ininggaliyangge mapmu reg laruhu ulug Harun umalikisi men unubahet hekel sulumon fam sum uyugmon enelenggen famen tulug eneho fam hililip turukon yihik fuhun.

⁴³Yihik fuhunmu Harun umalikisi menen siyag ane turuken war amuhup tohon ulug An nibam o sabo fanowon fam kuruk lir oho hubu lahaptuk ambeg horogma laruk lir oho sum uyugmon arimano wan teg lit eneg laruk lamuhup. Sum arimano wan teg lamuhup ane fahet imbihiyon ari Harunen endebuhubonen endebuhubon arimanowen oho mondabi seneg lamuhup,” ulug hiyag itfag.