Read Angguruk Yali KELUARAN 29 Bible Online

KELUARAN 29 - Angguruk Yali bible

KELUARAN 29

¹Allahn Musa fam nin ele uruk lit, ”Harun umalikisi men An namingmingangge imam welamuhup ulug in enebuhun ane iminon tu: Wam sapi hunon kabiniyon misig men wam domba yuhambukon siyag teg elehon piren men wahun.

²Wahunteg roti anggen fano roho lilibug tohon suwap turuk angge embeselug tag tuhun. Tag tuhunon minggiroho winon e zaitun ahaluwe mangno roho wiratuk lit winon e zaitun ahaluwe embeselug, winon e zaitun ahaluwe are roho wiraruhun.

³Roti tag toho wiraruhunon arimano obog toho kubag elma kilaboho wam wahunon itano men An fahet umbuhun.

⁴Umbuhunteg Harun umalikisi men o sabo sok kuruk ambeg iraham watlihip ulug wol enebuhunteg enebe ik umag enebuhun.

⁵Ik umag enebuhunteg sum undamon men ebemon men, sum amigmu hililip toho wan turukon efod men, sum amigmu sukni ferukon men, pahaluk hag angge efod onggorikmu werehon ino men hun Harun wan tebehun.

⁶Wan tebehunteg sum unggulmu langguk tulug sum ino alukema suwesingga hag angge emas fam wirihon ’NINIKNI Allah fahet’ haharehon ino ilili fuhun.

⁷Ilili fuhunteg e ahaluwe amben fano angge unggulmu are reberuk lit imam unduhuk fuhun.

⁸Unduhuk fuhunteg Harun umalikisi oho hat hiraham wamuhuben wol enebuhunteg sum enebemon imamen wan turukon wan enebuhun.

⁹Wan enebuhunteg pahaluk enelunggu ke pug enebuhunteg lit sum ununggulmu langguk enebuhun. Ari roho turuk lit Harun umalikisi men An namingmingangge imam welamuhup ulug in enebuhunmu iren endebuhubonen endebuhubon oho An namingmingangge mondabi welamuhup.

¹⁰Harun umalikisi men in enebuhunteg wam sapi An fahet umbuhunon ino o sabo fanowon iraham walug waruhunmu Harun umalikisi menen wam unggulmu ininggik umbuhup.

¹¹Umbuhupmu wam ino An HINIKNI Allah nolohotman o sabo sokolma kuruk ambehen ware fuhun.

¹²Ware fuhunteg wam amep tor angge oko walug hinggik tum fam hubu lahaptuk ambeg ambiyang fima-fima werehon are rebelug wam amep winon hubu lahaptuk ambeg uyugmu hililoho hik isahun.

¹³Hik isahunteg wam amiyon si men kiyatni men anggirang piren men asimbulal men hubu lahaptuk ambeg emberimu indokma yale fuhun.

¹⁴Yale fuhunteg wam sapi unu obog toho men ahap men al men sek hasu men Israel inap wereg ambehen walug wilip atlug it imamen siyag ane turukon eleg amag ulug indokma yale fuhun.

¹⁵Yale fuhunteg wam domba hunon misig Harun umalikisi menen ininggik unggulmu umbuhup.

¹⁶Umbuhupmu wam domba ino waroho amep hubu lahaptuk ambeg walinggoho hik isil lahun.

¹⁷Hik isil lahunteg wam ino senggeloho hubu lahaptuk ambeg palimu emberuk lit undamangge men ahinanggen men ik umaho felug wam senggeleg ino unggul men emberimu imbik lahakun.

¹⁸Imbik lahakunteg wam domba ino abirangge hubu lahaptuk ambeg emberimu indokma yaltuk lit hubu lahabuhunmu An HINIKNI Allahn amben somug haruk lit fano ulug nindi yuwag aruhu.

¹⁹Indokma yale fuhunmu Harun umalikisi menen wam domba itano eke ininggik unggulmu umbuhup.

²⁰Umbuhupmu wam ino waroho amep tor angge oko walug Harun umalikisi inisanggo muluk pikit filon men ininggik fuwap pikit filon men unuyug tum pikit filon men are rebelug wam amep winon hubu lahaptuk ambeg walinggoho hik isil lahun.

²¹Mep hik isil lahunon tor angge men e ahaluwe amben fanowon men oko walug Harun umalikisi men enebeyet enesum wan tehonet Allah anggengge ulug it enebe men enesum wan tehon men fene hilili fehun.

²²Wam domba imam itano in eneptuk lit ware fuhunon ino ahaye sei werehon men amiyon si men kiyatni men anggirang piren men asimbulal men uyug pikit filon men wahun.

²³Wahunteg roti suwap turuk angge embeselug wiraho felug An HINIKNI Allah nolohotma kubag fam kilaboho umbuhunon e zaitun ahaluwe mangno roho wiraruhunon men e ahaluwe embeselug wiraruhunon men e zaitun ahaluwe are roho wiraruhunon men wahun.

²⁴Wahunon arimano obog toho Harun umalikisi men ininggik indanggenma umbuhunteg NINIKNI Allah fahet umbul ulug At olohotma leho felihip ulug hiyag isahun.

²⁵Leho fuhupmu ininggik fam umbuhunon arimano obog toho oko walug wam tamon waroho hubu lahabuhunon ino emberimu An fahet indokma yale fuhun. Indokma yaltuk lit hubu lahabuhunon An HINIKNI Allahn amben somug haruk lit fano ulug nindi yuwag aruhu.

²⁶Ari obog toho tubuhunteg wam pirenon iliyapma NINIKNI Allahn tohon ulug An nolohotma leho fuhun. Iliyapma leho fuhunon ari fobik hat hinggarehen nahun.

²⁷Ari roho Harun umalikisi men in eneptuk lit wam domba waroho An nubahet umbuhunon iliyapma men uyug men Allah anggengge ulug An nolohotma leho fuhupmu fobik imam arimanowen naruk lamuhup.

²⁸Fobik oho Israel inaben Allah olohotma wam esebul ulug waharuk lamuhup halug wam An nubahet emberuk lamuhubon iliyapma men uyug men imam inaben nalusa ulug Harun umalikisiyen endebuhubonen endebuhubon arimano oho og isaruk lamuhup. Ari turuk lamuhup ane ari Israel inaben mondabi seneg lamuhup.

²⁹Hun Harunen An Allah niyabuk wituk lit wan teg asum arimano fobik at umalikisi ngi amuhup. Ngi amuhupteg Harun ubalmangge imam welamuhup ulug in eneptuk lamuhup sambil wan teg lamuhup.

³⁰Harun umalikisi sehelimuwon at ubalmangge aruhureg o sabo fanowon fam kulug An niyabuk wituk laruhuwon ino imam in aruhu sambil sum Harunen tohon arimano wan tegman eneg o sabirenam aruhu.

³¹Wam domba hunon pirenon unu ino o sabo fanowon iraham osoho fuhun.

³²Unu osoho fuhunon ino men suburu roti kubag elma kilabuhunon ino men Harun umalikisi menen o sabo sok olman nahup.

³³Nahubon ino Harun umalikisi menen siyag ane turukon eleg amag ulug it in enebuhun sambil An fahet umbuhunon it eneg nahup. Allah fahet embeheson ulug ap winonen nahup fug.

³⁴Harun umalikisi menen wam unu men roti ino men obog toho naruk lit enehum ouken umbusuhubon wereg halug hubet nahukon ulug umbat tahup fug, Allahn tohon ulug likiyamon indokma yale fusuhup.

³⁵Ari obog toho teberuk lit Harun umalikisi men in enebuhun ane ino Anden hiyag hirihi ane hikit toho turukmen eneg o sabirenam aruhu.

³⁶Aben siyag ane turukon eleg amag ulug likiya hupmu wam domba hunon misig-misig waroho yaltukmen eneg o sabirenam aruhu. Ware feruk lahunon amep oko walug hubu lahaptuk ambeg hik isaruk lit fanowap turuk laruhun. Fanowap turuk lit hubu lahaptuk ambeg ino Allah anggengge ulug e ahaluwe amben fano angge are reberuk laruhun.

³⁷Ari hag toho o sabirenam turukmen eneg hubu lahaptuk ambeg ino mondabi fano aruhu. Ap san hubu lahaptuk ambeg mondabi fanowon ino sen harukon arimano enebe abirangge Allah anggengge amuhup,” ulug hiyag itfag.

³⁸Allahn Musa fam nin ele uruk lit, ”Likiya hupmu subangge roho wam domba mo misig atukon piren waroho hubu lahaptuk ambeg emberimu indokma yale feruk lamuhup.

³⁹Wam misig likiya yale feruk lit misig mo ubuk ik ohoma yale feruk lamuhup.

⁴⁰Ari roho likiya hupmu wam misig-misig yale feruk lit roti anggen fano roho lilibug tohon sum toron men e zaitun ahaluwe fanowon men mangno roho tag turukon oho yale felug hele anggur ahaluwe kubag misig hilili feruk lamuhup. Ari obog toho An fahet emberuk lit hubu lahaptuk lamuhupmu Anden amben somug haruk lit fano ulug nindi yuwag aruhu.

⁴²Ari hag toho hiren endebuhubonen endebuhubon arimanowen oho An HINIKNI Allah nolohotma o sabo fanowon sokolman likiya hupmu subangge roho hubu lahaptuk lamuhup. O inowen An hit men ambi atuk lit nele hat hiyag hutuk laruhuk.

⁴³Ari roho turuk laruhuk ambehen An hit Israel hinap men mangno atuk lamuhuk. Mangno atuk lamuhuk ambeg o sabo fanowon ino An usa fulu nahun waruhuk ane ariyen usa aruhu.

⁴⁴Ari hag toho Anden hubu lahaptuk ambeg ino oho Anden tohon ulug usayap turuk lit Harun umalikisi men An nanggengge ulug mumal tahukmu An namingmingangge imam welamuhup.

⁴⁵An hit Hinikni Allah wereg lit Israel hinap sehelimu welaruhuk.

⁴⁶Welaruhukmu hit hinindimuwen wenggel haruk lit Allah NINIKNI inowen nit Israel ninap sehelimu welaruhuk ulug o Mesir kinang famen hondog neneplug wilip atisi ulug honoluk aruhu. An Allah HINIKNI inowen nele ihi,” ulug hiyag itfag.