Read Angguruk Yali KELUARAN 3 Bible Online

KELUARAN 3 - Angguruk Yali bible

KELUARAN 3

¹O misihim sambil Musa inowen iyamal Midian ahun Yitro Allah fahet hubu lahaptuk ahun ino ambohom foroho lit wam arimano hondog eneplug lekma pisan isalug libareg tom Horeb unuk eke Sinai Allah antom ino alma welatfag.

²Wereg lit yet harukmen NINIKNI Allah ot malaikat ino e folim indok ambulpul turukon fam inam atfag. E folim indok ambulpul turuk latfag angge famen indoken naruk elegma Musa inowen yet hibareg,

³”Yihi, nakol-e, e ari fam indok ambulpul turuk famen indoken naruk elehen an horogma laminteg kim hamin,” ulug

⁴horogma larukmu NINIKNI Allahn yet hibareg alog ahen ino famen ele uruk lit, ”Musa, Musa,” ibagma Musan, ”Wo,” ibag.

⁵Wo ibagma NINIKNI Allahn, ”Hat horogma wam fug! Hat unduhuk lahen ambeg An Allah welahireg huyug hililip angge lole felug unduhuk latmihin.

⁶An nele uruk lahiyon aru humbusagsi Abraham, Ishak, Yakub Inikni Allah An welahi,” ulug hiyag itfagma Allah hamin fug ulug Musa ino akolen inggiken orohole salfag.

⁷Orohole salegma NINIKNI Allahn ele uruk lit, ”An numalikisi Mesir kinang fam asengseng toho weregma yet isaruk lahi. ’Mesir inaben alem angginon nunubam emberukon ininggikmu angge tel nenebin,’ ulug enele hum toho An nubam urukon holtuk lit simbuk toho wereg ane fahet noluk toho welahi.

⁸Mesir inap ininggikmuwen windat enebuhuk ulug wambik wahi. Mesir kinang ari famen wiliboho hondog eneplug kinang fanoma hiyaleg ambeg ag owe men kin ahaluwe men eleg am fug angge mondabi anggolo wereg ambeg imbisik lahuk. Kanaan inap, Het inap, Amori inap, Feris inap, Hewi inap, Yebus inap wereg ambeg hondoko imbisik lahuk.

⁹Mesir inaben Israel inap unubam anggin ane turukmu ngi hum urukon Anden hol haruk lit yet isaruk lahi.

¹⁰Alem ari fahet ketiya An numalikisi Israel inap arimano o Mesiren wiliboho hondog eneplug lahunen Mesir inap onowe suwon ino fam heng tik lahunon fahet Anden hat mon haptuk lahi,” ulug hiyag itfag.

¹¹Hiyag itfagma Musa inowen Allah ubam ele uruk lit, ”An ap sa hag toho welahireg Mesir inap onowe ambeg nambong se roho lahukteg, ’Israel inap hondog eneplug wilip aruhuk,’ ulug heng tuhuk?” ibagma

¹²Allahn, ”An hat men welaruhuk. Hat Israel inap o Mesiren hondog eneplug wilip aruhunteg tom tu famen An nubam sembahyang uhun sambil Allahn mon naptuk lit tem toho irisi puhun,” ulug hiyag itfag.

¹³Ari ibagma Musa inowen, ”An nori Israel inap enembeg lahukteg unubam hiyag isaruk lit, ” ’Nunumbasi Inikni Allah inowen an hit henembeg mon naptisi,’ ulug hiyag isahukmu iren hebeloho an nubam, ’Mon haptisi ahun ino unuk sa?’ ulug kapal niyahupmu anden it unubam nungge uhuk?” ulug Allah umung hibag.

¹⁴Umung hibagma Allahn Musa fam hiyag utuk lit, ” ’An nunuk ’An welahiyon An fobik oho nin aruhuk fug,’[5] urukon inowen mon naptisimu wahi,’ ulug hiyag isahun.

¹⁵’Nunumbasi Abraham, Ishak, Yakub INIKNI Allah inowen monde nubaharisi,’ uhun. An nunuk HINIKNI aru aben wol naptukmen eneg welamuhup.

¹⁶Lahunteg Israel inap onowesi obog toho wol enebuhunteg palu amuhupmu unubam hiyag isaruk laruhunon tu, ’NINIKNI Allah, nunumbasi Abraham, Ishak, Yakub Inikni ino an nambeg inam atisireg ele nubam uruk lit, ’Mesir inaben Israel inap unubam anggin ane turukmu yet isaruk lahi.

¹⁷It Mesir kinang fam asengseng toho werehen Anden hondog eneplug wilip aruhukteg kinang Kanaan inap, Het inap, Amori inap, Feris inap, Hewi inap, Yebus inap wereg ambeg ag owe men kin ahaluwe men eleg am fug angge mondabi anggolo wereg ambeg hondoko imbisik lahuk,’ irisi,’ ulug hiyag isahun.

¹⁸Haren hiyag isahun ane holuhup halug hat men Israel inap onowesi men Mesir inap onowe suwon ambeg lahupteg hiyag utuk lit, ’NINIKNI Allah, Ibrani ninap Ninikni nit weregma inam atisireg ele hiyag nisarisi. Ari fahet fano pemihin halug nit hup hinahanam lekma lahukteg Allah NINIKNI fahet wam esebuhuk,’ ulug hiyag umuhup.

¹⁹Ari roho hiyag umuhup angge famen Mesir inap onowe inowen, ’Lalihip,’ ulug hiyag hisahu fuhon An noluk. Anden alem angginon ubam emberuk laruhuk halug eneg wilip atlihip ulug hiyag hisahu.

²⁰An ninggik ineyon fam Mesir inap aben tuk fug ane roho unusuhukmu eneg, ’O aruwen wilip amek!’ ulug hiyag hisahumu lahup.

²¹Hit lahup sambil ino Anden Mesir inap inindi fanowap enebuhukmu Israel inap ininggikmu eleg angge wilip amuhup fug.

²²O ari sambil Israel hiyap wal tanehen Mesir hiyap it men horog toho werehon men o misigmu werehon men unubam, ’Ili ruruk angge men umbagpag turuk angge men sum fanowon men og nisalihip,’ ulug heng enebuhupmu og isahup. Og isahup angge arimano unumalikisi wan enebuhup. Ari roho tuhup ane ari Mesir inap enengge huhulangge hilaruk hag toho Israel inaben turuk lit wilip amuhup,” ulug NINIKNI Allahn Musa hiyag itfag.