Read Angguruk Yali KELUARAN 30 Bible Online

KELUARAN 30 - Angguruk Yali bible

KELUARAN 30

¹Allahn Musa fam nin ele uruk lit, ”An fahet amben fano angge yaloho hubu lahaptuk angge ulug e sahi seng toho wiri fuhun.

²Wiri fuhunon ino wirimangge yat toho wirim tuhunon men ayuhuk fil wirim tuhunon men ambi roho il misig pul ke minggiroho, lahabeg wirim tuhunon il misig wirim toho wiri feruk lit hubu lahaptuk ambehet ambiyang uhanet we misihim eneg mangno roho wiri fuhun.

³Wiri fuhunon obog toho emas orohole mondabi fanowon fam hililip toho lombog tubuhunteg inggapkap pali filon fene hesenggengge lisarep hahon emas fam wirihon topno rebehun.

⁴Topno rebehunteg hubu lahaptuk angge ino paya roho walug laruk ahen kilaboho emberuk ambeg ulug sehene emas fam wirihon piren lale felug e sali roho wirihon fuma-fuma lisarep hag angge topno roho werehon apma hunduhuk fehun.

⁵Hunduhuk fehunteg paya roho walug laruk ahen ulug e sahi piren oko emas fam hililip toho lombog tebehun.

⁶Ari obog toho tebehunteg hubu lahaptuk angge ino An men hat men ambi atuk lamuhuk ambeg horogma unduhuk lamag ulug sum peti Wene Numen haharehon elma kilabeg angge mapmu roho pilabehon aluke fil unduhuk fuhun.

⁷Ari tuhunmu hun Harun inowen iral haltuk li hundig-hundig hubet hubu lahaptuk ambeg inowen amben fano angge yaloho hubu lahaptuk laruhu.

⁸Hupmu oho Harun inowen iral hundutuk li hubu lahaptuk laruhu. Ari hag toho hiren endebuhubonen endebuhubon arimanowen oho likiya hupmu An HINIKNI Allah fahet hubu lahaptuk lamuhup.

⁹Hubu lahaptuk angge ino fam we amben fano angge Anden hiyag hisihiyon eneg yaltuk lamuhup. Hubu lahaptuk angge ino siyahap tuhup tohon ulug wam waroho hubu lahaptuk lit suburu yaltuk lit ik hilili feruk lamuhup fug.

¹⁰Hubu lahaptuk angge ino An HINIKNI Allah nanggengge mondabi fanowon werehen mo misig fam misihim Harun inowen fanowap turuk laruhu. Hubu lahaptuk angge ino fanowap timin ulug wam hit Israel hinaben siyag ane turuk lahebon fahet waroho hubu lahaptuk lamuhubon amep tot oko walug hubu lahaptuk ambeg ambiyang fima-fima werehon fene are reberuk laruhu. Ari hag toho hiren endebuhubonen endebuhubon arimanowen oho turuk lamuhup,” ulug hiyag itfag.

¹¹NINIKNI Allahn Musa fam nin ele uruk lit,

¹²”Israel inap arimano An nanggengge wereg angge re enebe saplangge winag isahun fug. Ari fahet enebe winag isahun sambil ap wal tanehen war amuhuk tohon ulug An HINIKNI Allah fahet uang umbuhup. Umbuhup fug halug alem angginon unubam aruhu rohon!

¹³Ap Israel inap indag atuk sali mo ilig am wirig am turukmu likin fumahen atukon pali filon eneg enebe winag isahunon wal tanehen uang perak misig pul ke minggiroho umbuhup. Uang perak ap wal tanehen umbuhubon arimano anggin emberuk angge o sabo fanowon inowen forohowon fam embelug winag harukmen anggin te 60 gram welaruhuwon umbuhup.

¹⁵Ap wal tanehen onoluk welamuhuben An HINIKNI Allah fahet uang perak emberuk lit tung inaben nin sebe roho umbuhup fug, enenggengge tor angge forohowonen oho tor angge umbuk fug angge we Anden hiyag hisaruk lahiyon hikit toho uang perak misig pul ke minggiroho imbik wamuhup.

¹⁶Uang imbik wamuhubon arimano haren yabuk o sabo fanowon fam wituk lamuhubon fahet umbuhun. Uang umbuhunon arimano Anden yet haruk lit Israel hinap fahet nindimu wenggel hahukteg siyag amuhup tohon ulug fet henesug laruhuk,” ulug Musa hiyag itfag.

¹⁷NINIKNI Allahn Musa fam nin ele uruk lit,

¹⁸”Kou humon men kou ino emberuk angge men ine angge tembaga fam wiri fuhunteg o sabo fanowon men hubu lahaptuk ambeg men honggolegma unduhuk fuhun. Unduhuk fuhunteg Harun umalikisi menen ininggik unuyug ik umaho feruk lamuhuben kou ino fam ik hinanggo umbuhun.

²⁰Harun umalikisi men o sabo fanowon kuk oho lir oho An HINIKNI Allah fahet hubu lahabul ulug hubu lahaptuk ambeg iraham luk oho lir oho war ahe ha nowen ulug ininggik unuyug tam ik umaho feruk lamuhup.

²¹Ik umatukon fahet ihiyon ari iren endebuhubonen endebuhubon arimanowen oho mondabi seneg lamuhup,” ulug hiyag itfag.

²² NINIKNI Allahn Musa fam nin ele uruk lit,

²³”Amben fano angge eke hag eke hag walug anggin emberuk angge o sabo fanowon inowen forohowon fam embelug winag hahun. Winag hahunon iminon tu: E mur ahaluwe anggin te 6 kilogram men, e kami ahap anggin te 3 kilogram men, kimkim amben fanowon anggin te 3 kilogram men,

²⁴e kami owil anggin te 6 kilogram men, e zaitun ahaluwe kubag misig 4 liter men winag halug wep toho umbuhun.

²⁵Wep toho umbuhunon arimano amben fano angge wituk inap og isahunmu iren tag toho wiri feruk lit amben fano angge An Allah nanggengge ulug ap enebene men nungge-nungge fene men are rurukon wiri fuhup.

²⁶Amben fano angge wiri fuhubon wahunteg o sabo fanowon men peti Wene Numen haharehon elma kilabeg angge men

²⁷e tuwalehon men e ino emberimu emberuk angge obog toho men iral emberuk angge men iral haltuk angge men amben fano angge yaloho hubu lahaptuk ambeg men

²⁸wam waroho hubu lahaptuk ambeg men hubu lahaptuk ambeg haltuk angge obog toho men kou humon men kou ino emberuk angge men fene amben fano angge ino are rebehun.

²⁹Arimano obog toho are reberuk lit Allah anggengge ulug usayap tuhun. Usayap tuhun angge arimano ap ekeyen saplangge tung haruk halug ebe abirangge An aruhuk.

³⁰Hun Harun umalikisi men oho An nanggengge ulug ununggul ke amben fano angge are reberuk lit An Allah amingmingangge imam welamuhuben lahap enebuhun.

³¹Ari obog toho tebehunteg amben fano angge wiri fuhubon ino fahet Israel inap hiyag isaruk lit Allah anggengge ulug amben fano angge ari hiren endebuhubonen endebuhubon arimanowen oho saplangge sen haruk lamuhup fug ulug hiyag isahun.

³²Amben fano angge ari ap yuhunon enehap ke are rebehup fug. Amben fano angge Anden ihiyon hikit toho tag toho wiri fuhubon hag toho ap yuhunon enebene are rurukon fahet winon eke wiri fuhup fug. Amben fano angge Anden ihiyon hikit toho wiri fuhubon ari fahet Allah ngi rehen usa wereg peruk lamuhup.

³³Ap san amben fano angge ari hahon saplangge wiri felug ap yuhunon enehap ke are rurukon ino hit Israel hinap sehelimuwen elehap tuhup,” ibag.

³⁴Ari ibareg NINIKNI Allahn Musa fam nin ele uruk lit, ”E amben fano ahan wal taneg werehon waruk lit amben fano ahan ahap men inggik men umanggen men e ahaluwe amben mondabi fanowon men wal taneg anggin ambi rehon wep toho umbuhun.

³⁵Wep toho umbuhunon arimano amben fano angge wituk inap og isahunmu An Allah fahet yaloho hubu lahaptuk angge welaruhu ulug tag toho wituk lit filik aruhu rohon ulug saho foloho wiri fuhup.

³⁶Amben fano angge wiri fuhubon minggiroho winon lilibug toho ul hag tebehup. Ul hag tebehubon tor angge o sabo fanowon undama walug kuhunteg peti An hat men ambi atuk lamuhuk ambeg aluke fil kinangma pilabuhun. Amben fano angge pilabuhunon ari fahet Allah ngi rehen usa wereg peruk lamuhup.

³⁷Amben fano angge Anden ihiyon hikit toho wiri fuhubon hag toho hiren saplangge yaltukon fahet winon eke wiri fuhup fug. Amben fano angge ari fahet NINIKNI Allah anggengge wereg peruk lamuhup.

³⁸Ap san ninggarehen amben fanowon somug hahuk ulug amben fano angge Anden ihiyon hikit toho wiri ferukon ino hit Israel hinap sehelimuwen elehap tuhup,” ulug hiyag itfag.