Read Angguruk Yali KELUARAN 31 Bible Online

KELUARAN 31 - Angguruk Yali bible

KELUARAN 31

¹ NINIKNI Allahn Musa fam nin ele uruk lit,

²”Anden ihiyon wituk laruhu ulug Anden Yehuda ahun Hur inowen endetfahon Uri amloho Bezaleel ino mumal tarikik.

³Mumal tarikikteg An nahime fanowon ubam emberuk lit indi anggarap tirikikmu mun ane man ane fahet oluk teg lit inggiken oho yi angge ti angge wibuk teg.

⁴Hun ariyen indimu wenggeltuk ane hikit toho ili ruruk angge emas perak men ine angge tembaga men fam nungge-nungge lale feruk lit

⁵helep enembeg wal taneg emberuk ane wirim toho paltuk lit e fam hesenggengge waruk lit yabuk eke hag eke hag wibuk teg.

⁶At men ambiyeg yabuk wituk laruhu ulug unggul unuk Dan ahun Ahisamakh amloho Aholiab ino mumal tarikik. Mumal taruk lit it piren let enebukag ulug eke hag eke hag ininggik fam wituk inap obog toho inindi anggarap eneptikikmu mun angge man angge Anden hiyag hirihiyon obog toho wibuk teg lamuhup.

⁷Ari reg lit o sabo fanowon men, peti Wene Numen haharehon elma kilabeg angge men, peti ino ele latuk angge men, o sabo fanowon undama foroho angge men,

⁸e tuwalehon men e ino emberimu emberuk angge men, iral emberuk angge men iral ino haltuk angge obog toho men, fano angge yaloho hubu lahaptuk angge men,

⁹wam waroho hubu lahaptuk angge men hubu lahaptuk ambeg haltuk angge obog toho men, kou humon men kou ino emberuk angge men arimano obog toho iren wiri fuhup.

¹⁰Wiri fuhupteg sum An namingmingangge imam Harun umalikisi menen wan teg asum men oho yihik fuhup.

¹¹Yihik fuhupteg amben fano angge ap enebene are rurukon men yaloho hubu lahaptukon men oho wiri fuhup. Wiri fuhup angge arimano obog toho Anden hiyag hirihiyon hikit toho wiri fuhup,” ulug hiyag itfag.

¹²NINIKNI Allahn Musa fam nin ele uruk lit,

¹³”Haren Israel inap hiyag isamihinon tu: O sabir angge Anden kel tarik iyag sambil ino hiren oho kel taruk lamuhup. O sabir angge kel taruk lamuhubon ari An men hit men sebe roho welahe ane fahet enehangge wereg ulug hiren endebuhubonen endebuhubon arimanowen oho seneg lamuhup. Enehangge ariyen An HINIKNI Allahn hit An numalikisi mumal taruk lahiyon ari honoluk aruhu.

¹⁴Ari fahet o falfalikenam o yabuk wituk lamuhup, o sabir angge yabuk wibuk fug angge usayap turuk lamuhup. O ino sambil kel taruk lit An HINIKNI Allah fahet wenggel niyaruk lamuhup. Ap o sabir angge yabuk wit tarukon arimano Israel hinap henesehelimuwen elehap eneptuk lit obog toho unusuruk lamuhup.

¹⁶An HINIKNI Allahn o falfalikenam pohol ha kinang ha wal tibiyareg o sabir angge yabuk wituk ane embeselug kel tarik iyag. Ari fahet An men hit men mondabi mangno roho welamuhuk ane fahet enehangge wereg ulug Israel hinaben endebuhubonen endebuhubon arimanowen oho o sabir angge fahet hiyag hisaruk lahiyon ino senegman eneg welamuhup,” ulug hiyag itfag.

¹⁸Musa tom Sinai fam weregma NINIKNI Allahn ele obog toho hiyag itfareg helep piren inggareg inggiken, ”Ari roho turuk lamuhup,” ulug hahare fibahon itano og itfag.