Read Angguruk Yali KELUARAN 32 Bible Online

KELUARAN 32 - Angguruk Yali bible

KELUARAN 32

¹ Musa ino tom Sinai fam amusun toho welatfagma Israel inaben nangno rurukmen wambik waharuk elehen it mondoko Harun ambeg libareg at ubam enele uruk lit, ”Hun Musa nit o Mesiren hondog neneplug wilip atisiyon ino alem nungge ubam atisimu wambik waharuk eleg, ari nenepeleg. Ari fahet tuwen nit milal neneptuk ulug wel turuk lamuhuk angge eke wit nisamihin,” ulug hiyag itfag.

²Hiyag itfagma Harunen hebeloho hiyag isaruk lit, ”Hunuhesi men hunumalikisi menen inisanggomangge kilabehon ili ruruk angge emas fam wirihon arimano lisoho walug an nambeg watlihip,” ibag.

³Ibag ane hikit toho Israel inap obog tohowen inisanggomangge emas fam witfahon arimano lisoho walug Harun og irik watfag.

⁴Og irik watfagma Harunen wibareg indokma yale fibagma ik hag atfahon ino wam sapi hag amag ulug kubag wirim tibag ambeg hilili fibag. Hilili fibagma nin ine atfareg wam sapi hag atfag. Wam sapi hag atfagma yet hibareg ap arimanowen, ”Nit nunumba tuwen Israel ninap o Mesiren hondog neneplug wilip atisi,” uruk latfag.

⁵Ari uruk latfagma Harun inowen wam sapi hag angge olohotma hubu lahaptuk ambeg witfareg ele hiyag isaruk lit, ”Sono NINIKNI Allah wel turuk lit seni esetuk lamuhuk,” ibag.

⁶Ibagma likiyamon hubet wam winon waroho yaltuk lit wam winon Allah olohotma nul ulug esetfag. Esetfahon nibareg enehiyehen in atuk lit abet hiyabet kelem yig-yig atuk latfag.

⁷Ari roho turuk latfagma NINIKNI Allahn Musa fam ele uruk lit, ”Ap o Mesiren hondog eneplug waharikinon arimanowen siyag ane turuken folo-folo wambin.

⁸Anden, ’Ari roho laruk lamuhup,’ ulug hiyag isarikik ane folo-folo pisan isalug ili ruruk angge emas fam wam sapi hag angge laltusareg olohotma kunuk toho hur atug wel turuk lit, ’Nunumba tuwen o Mesiren hondog neneplug waharisi,’ ulug ubahet wam waroho yaltusa.

⁹Ap arimano inindi arik teg lit nele holuk fug tehon An noluk.

¹⁰An nahummu het-pet atisimu obog toho siyahap enebuhuken sen nabuk fug. We hat humalikisi men Anden hinineyap henebuhukmu hiren indag enebuhubonen endebuhubon anggolo amuhup,” ibag.

¹¹Ibagma Musa inowen NIKNI Allah indi hondo rimin ulug ele uruk lit, ”Hat hinggik ineyonen humalikisi o Mesiren hondog eneplug waharikin angge re nungge fahet unubam holok ane wenggel haruk lahen?

¹²Unusuhun halug Mesir inaben hol hahupteg iren te, ’Tom famen unusuruk lit mondabi elehap enebuhuk ulug hondog eneplug wilip atisi,’ uhup tohon! NIKNI Allah, hindimu ahe lahakekma numalikisi unusuhuk pehen ane ari eleg amag!

¹³Hat hamingmingangge Abraham, Ishak, Yakub men unubam sali imbinahon wenggel hamihin. Haren it unubam, ’Anden hit hinineyap henebuhukmu hunumalikisi fobik indag enebuhubon suhal poholma mondeg hag toho anggolo amuhup. It anggolo amuhupmu kinang Anden og isahuk irikikon ino hiyag isahukmu mondabi ngi amuhuben tik-tem toho uruk lahi,’ ulug sali imbinag,” ibag.

¹⁴Ari ibagma NINIKNI Allahn numalikisi siyahap enebuhuk pibag ane ari imbisibag.

¹⁵Imbisibagma Musa inowen helep piren Allah inggarehen seng tibibareg Aren ibag ane fuma-fuma hahare fibahon itano tom famen walug wambibag.

¹⁷Wamburuk lit Yosua inowen hol harukmen Israel inaben enele hum toho ngik-ngog turukmu hol isibareg Musa hiyag utuk lit, ”O sabo wirig ambehen tog aptuk lit ngik-ngog turuk,” ibagma

¹⁸Musan, ”Ap unusulug uruk ane men nit nunusehesa ulug uruk ane men hag toho uruk eleg. It enehiyehen yunggultukon hol isaruk lahi,” ibag.

¹⁹Ibareg Musa ino o sabo wiroho welatfag ambeg ino horogma libareg yet harukmen wam sapi hag angge emas fam witfahon ino iraham Israel inap arimano yunggultukmu yet isaruk lit indimu olok atfag. Indimu olok atfagma tom alma itanowen helep walug wambibahon itano hik isibagma lilibug toho ilkal ibag.

²⁰Ilkal ibagma Musa inowen wam sapi hag angge Israel inaben lalfahon ino lisoho indokma yale fibareg al sahaloho ula fisibag. Ul atfahon ino ik men mangno roho kubag fam hinanggibareg Israel inap nalihip ulug og isibagma nibag.

²¹Nibagma Musa inowen Harun fam, ”Iren hat hubam nanggintusama siyag ane hum toho tukag ulug hil embeseruk lit welatikin?” ibagma

²²Harun inowen te, ”An pet nabuk fug. It unubabut siyag ane turuk warukon hat holuk.

²³Iren an hiyag nutuk lit, ’Hun Musa nit o Mesiren hondog neneplug wilip atisiyon ino alem nungge ubam atisimu wambik waharuk eleg, ari nenepeleg. Ari fahet tuwen nit milal neneptuk ulug wel turuk lamuhuk angge eke wit nisamihin,’ ulug heng naptusama

²⁴anden, ’Hit heneliliyangge emas fam wirihon arimano og nirik watlihip,’ irikikmu it wan tehonen nonggoloho og nirik waharusa. Og nirik waharuson arimano obog toho indokma yale ferikikmu wam sapi hag atisi,” ibag.

²⁵Ari urukmu hol hibareg Musan wenggel haruk lit, ”Ap seliyonen ininggaliyap enebuhuben Israel inap nungge-nungge turuk lamag ulug Harunen komo enebuk fug angge welatisi,” ulug indi anggar atfag.

²⁶Indi anggar atfagma Musa ino elehet o walinggoho ohowon sok iraham unduhuk lit ele hi roho, ”NINIKNI Allah apma welamuhuk perukon an nambeg maniyek!” ibagma ununggul unuk Lewi inap obog toho Musa iraham palu arik watfag.

²⁷Watfagma Musan hiyag isaruk lit, ”Israel ninap NINIKNI Allahn ele hiyag hisarukon tu, ”Hit henebe wal tanehen karog seneko lalihipteg sok tu famen tulug o sabo wal taneg werehon unusil lalihipteg sok atogma werehon fam imbisik lalihip. Honori men hunumbalisi men hit ambiyeg welahebon oho obog toho unusilihip,” ibag.

²⁸Musan ibag ane ari hikit toho o ino sambil Lewi inaben ap teng-teng angge 3.000 unusibag.

²⁹Unusibagma Musan Lewi inap hiyag isaruk lit, ”O yoho hunumalikisi men honori men hinindi isa fug angge unusehebon ari feneyen hit hininggarehen NINIKNI Allah amingmingangge imam welamuhuk ulug hinineyap taruk tehep. O yoho tu famen NINIKNI Allahn let heneptukmen eneg welaruhu,” ulug hiyag isibag.

³⁰Hiyag isibareg likiyamon Musa inowen Israel inap hiyag isaruk lit, ”Hiren siyag ane hum toho tirikibon ino fahet anden heng tuhukmu NINIKNI Allahn elehap tuhu ano ulug Allah ambeg tom fam lahamin,” ibag.

³¹Ibareg Musa ino nin suhuloho NINIKNI Allah ambeg lahibareg At ubam ele uruk lit, ”Israel inaben siyag ane hum toho turuk lit wel turuk angge emas fam wit tarusa.

³²Ari fahet iren siyag ane turuson Haren elehap timihin. Elehap timihin fug halug suwesingga ap onoluk werehon ununuk haharehon fam an war amag ulug nunuk ware fesemihin,” ibag.

³³Ibagma NINIKNI Allahn hiyag utuk lit, ”We An nolohotma siyag ane turuson arimano ununuk eneg ware fusuhuk.

³⁴Ketiya wambimihinteg ap arimano hondog eneplug Anden hiyag hitikik ambeg lahun. Larukmu An not malaikat inowen milal haptuk laruhu. Siyag ane turuson arimano unusimin puhuk sambil horog aruhumu alem angginon unubam umbuhuk,” ibag.

³⁵Welatfareg ap arimanowen, ”Wam sapi hag angge wit nisamihin,” ulug Harun mingming tibag ane fahet NINIKNI Allahn ouk alem angginon unubam monde feruk latfag.