Read Angguruk Yali KELUARAN 33 Bible Online

KELUARAN 33 - Angguruk Yali bible

KELUARAN 33

¹Welatfareg NINIKNI Allahn Musa fam ele uruk lit, ”Ap o Mesiren hondog eneplug waharikinon arimano men o aru embeselug wilip amuhup. Hit hunumbasi Abraham, Ishak, Yakub men unubam, ’Hit hunumalikisi fobik welamuhubon kinang og isahuk,’ ulug sali imbiyag ambeg lahup.

²Larukmu Anden not malaikat eke monde ferukmu milal heneptuk laruhu. Lahup ambeg ino Kanaan inap, Amori inap, Het inap, Feris inap, Hewi inap, Yebus inap werehon arimano yanggal enebuhuk.

³Yanggal enebuhuk ambeg ino kinang fanoma ag owe men kin ahaluwe men eleg am fug angge mondabi anggolo weregma lahup. Hit kalemma laruk lit ap arimano ununggul uwag arik teg eneg ulug hunusuhuk tohon An hit men ambiyeg lahuk fug,” ibag.

⁴Ibareg nin Musa fam ele uruk lit, ”Israel inap hiyag isamihinon tu, ’Hit hununggul uwag arik teg inap welahepma An hit men il misig eneg ambiyeg lilareg hit obog toho mondabi elehap heneple. Heneliliyangge wan teg lahebon obog toho nonggoloho embeselihipmu Anden hit hunubam tuhuk ane wenggel hahuk,’ imihin,” ibag. Allah ele olok toho ibahon hol hibareg inindi siyag atfagma uba yatuk lit eneliliyangge nonggoloho embeseruk latfag.

⁶Tom Sinai alman wilip atfag sambil ino ak tibareg Israel inap eneliliyangge lahabeg eleg angge laruk latfag.

⁷Israel inaben o sabo witil larukmu Musa inowen o taloho walug laruk latfahon ino Israel inap inibam witukon arimano tot tahan toho amumu wituk latfag. O ino unuk Allah men Ambi Atuk Ibam suwalfag. Ap san NINIKNI Allahn komo napmisi perukon arimano o ino laruk latfag.

⁸Hun Musa o ino larukmu Israel inap inibam sok ele ke unduhuk lit Musa ino yet teg lit weregma o ino kuruk latfag.

⁹Musa ino o ino kirikim hina alem unduhukon ino wambik watlug sokolma unduhukmu hina sehelimuwen NINIKNI Allahn Musa fam ele uruk latfag.

¹⁰Hina ino Allah men Ambi Atuk Ibam sokolma unduhukmu yet haruk lit Israel inap inibam wal taneg iraham ke enelenggen fam hur atfareg kinangma ying atuk latfag.

¹¹Ap misihen are men enele uruk hag toho NINIKNI Allahn Musa men onorohole ambimu enele uruk latfag. Enele ulug Musa ibam waharukmu hun Nun amloho Yosua kabiniyon Musa let turukon ino wilip am fug angge Allah men Ambi Atuk Ibam welatfag.

¹²O misihim sambil Musan NINIKNI Allah fam ele uruk lit, ”NIKNI, Haren te, ’Israel inap hondog eneplug lahun,’ ulug hiyag nitikin angge famen, ’Hat larukmu ap tuwen let haptuk laruhuwen monde fuhuk,’ ulug hiyag nitikin fug. Haren te, ’Hat fahet An noluk teg lit nindi hasug lahi,’ irikin angge re

¹³Anden tuhuk peruk lahen ane hiyag nitmihin. Hiyag nitmihinmu eneg Hat hindimuwen wenggel haruk lahen ane noluk teg lit let haptuk laruhukmu fobik oho hindi nasug laruhun. Israel inap arimano Haren numalikisi welamuhup ulug mumal tarikin ane hindimu holuk toho welaruhun,” ibag.

¹⁴Ari ibagma NINIKNI Allahn, ”An namuwen hondog heneplug kinang hinindi yuwag toho welamuhup ambeg hunumbahik lahuk,” ibag.

¹⁵Ibagma Musan, ”Hat nit ninim lahuk fug halug, ’Hit o aru embeselug lalihip,’ ulug hiyag nisamihin fug.

¹⁶Nit ninim laruk lit let nenebuhun fug halug Haren nit an notsi Israel inap men hindi nenesug ane nangginoho ap winon onoluk aruhu? Hat nit sehelimu welaruhun ane ariyen eneg nit Hat humalikisi ap o pumbuk winon kinang atogman atogma werehon men ambi roho welamuhuk fug,” ibag.

¹⁷Ibagma NINIKNI Allahn Musa fam, ”An hat fahet noluk teg lit nindi hasug lahireg haren heng nabehenon hikit toho turuk laruhuk,” ibag.

¹⁸Ari ibagma Musan, ”NIKNI, Hat hubam umbagpag werehon yet haminen unug niyimin,” ulug heng tibagma

¹⁹NINIKNI Allahn hebeloho hiyag utuk lit, ”An nebe mondabi fanowon hat pisan toho horohole fil laruk lit An nunuk imin. An HINIKNI Allah welahireg Anden nindi reg latmin perukon nindi reg lahi. Anden let timin perukon oho let turuk laruhuk.

²⁰Ap An yet niyarukon obog toho war atuken An norohole haren yet niyamihin fug.

²¹Ari fahet An niraham helep werehon tu fam in arik watmihin.

²²Watmihinmu An nebe umbagpag toho laruk lit hat helep elma kilap hapminteg ninggiken laroho larukmen eneg hat pisan hiyalug lamin.

²³Pisan hiyalug laminteg ninggik lisoho waminmu An nambolma yet niyamihin angge famen norohole yet hamihin fug,” ibag.