Read Angguruk Yali KELUARAN 34 Bible Online

KELUARAN 34 - Angguruk Yali bible

KELUARAN 34

¹Welatfareg NINIKNI Allahn Musa hiyag utuk lit, ”Helep tamon haren halog tebeserikinon itano ubalma keron piren seng tebemihinmu Anden nele tam hahatikikon hag toho haharoho umbuhuk.

²O sono hubet tom Sinai fam lahik waruhunmu An men tom atelman ambi amuhuken holuk toho welamin.

³Ap misig oho hat men ambiyeg lahik wamuhup fug. Ap sa-o sa-o lahuk perukon tom aru iraham lahup fug. Wam sapi men domba menen oho tom aru alma inggilangge na lahup fug,” ibag.

⁴NINIKNI Allahn ibag ane hikit toho Musa inowen nin eke helep piren seng tibibareg likiyamon hubet tom Sinai fam walug lahibag.

⁵Lahibagma NINIKNI Allah hina sehelimu wambik watfareg Musa iraham unduhuk lit At inggarehen, ”An HINIKNI Allah welahi,” ulug unuk ibag.

⁶Ibareg NINIKNI Allahn Musa orohole fil pisan toho laruk lit, ”An HINIKNI Allah inowen inilaheg ulug ap obog toho nindi enesug lit let eneptuk lahi. Ap siyahon fahet oho An nindi folo-folo nolok am fug angge numalikisi embesemin fug ulug unubam we fano ane eneg turuk lahi.

⁷Ari roho let eneptukmen eneg it arimanowen endebuhubonen endebuhubon arimanowen endetil lahubon oho Anden let eneptuk laruhuk. It unubabut siyag toho wereg lit onolok ane turukon apmayap turuk lahi angge famen ap siyag ane turukon Allahn alem angginon unubam emberuk eleg puk fug. An enembol yig nutuk inap arimanowen siyag ane turukon fahet unumalikisi men unumbusagsi men unumbasi men Anden alem angginon unubam emberuk laruhuk,” ibag.

⁸Ari urukmu itano Musa ino elenggen fam hur atfareg kinangma ying atfareg Allah hi ruruk lit,

⁹”Nikni, Haren we tik-tem toho hindi nasug lahen halug nit men ambiyeg laruk lamuhuken heng haptuk lahi. Israel inap ununggul uwag arik teg lit onolok ane eneg turukon Hat holuk. Ari fahet niren siyag ane turuk laheyon hambolmaya feserukmu nit Hat hanggengge amuhuk,” ulug heng tibag.

¹⁰Ari ulug heng tibagma NINIKNI Allahn Musa fam ele uruk lit, ”Ketiya Anden Israel inap unubam nele sali emberuk lahi. Enehangge aben tuk fug tehon ap o pumbuk kinangma werehonen indamen oho yet hibag fuhon Anden Israel inap onolohotman turuk laruhuk. Anden let henepmin ulug ap enekol atuk ane turukmu hat humalikisi obog tohowen yet niyaruk lamuhup.

¹¹O yoho Anden ari-ari turuk lamuhup ulug hiyag hisaruk lahi ane hinine roho seneg lamuhup. Hit kinang Anden og hisahuk ambeg ino kuhupmu Amori inap, Kanaan inap, Het inap, Feris inap, Hewi inap, Yebus inap arimano obog toho hit honolohotman yanggal enebuhuk.

¹²Hit yebangge elma luhur amuhup tohon yanggal enebuhuk inap arimano unubam hunusuk fug angge mangno roho welamuhuk ulug sali emberuk lamuhup fug angge famen

¹³nunumba ulug hubu lahaptuk ambeg men usa ahalep men e usa ahen uwag iren hutuk teberuk latuson oho halog toho siyaha feseruk lamuhup.

¹⁴Aben nunumba ulug wel eneptukon arimano hiren oho wel eneptuk lamuhup fug. Tu Allah hag toho wereg ulug wirim turukon fahet An HINIKNI Allahn nolok haruk lahi.

¹⁵Kinang kuhup ambeg wereg inap unubam mangno roho welamuhuk ulug sali emberuk lamuhup fug. It arimanowen nunumba ulug wam waroho esetuk lit wol heneptuk lamuhupmu hit it inim ambiyeg naruk lamuhup tohon!

¹⁶Hit hunumalikisiyen it eneholani hilaruk lamuhup halug hiyap arimanowen hunumalikisi inindi kahal eneptuk lit hit Hinikni Allah ino embeselug niren nunumba ulug wel eneptuk laheyon hiren oho wel eneptuk lamuhup ulug hiyag isaruk lamuhup tohon!

¹⁷Hininggiken ine angge fam ap hag angge wit taruk lit tu Allah hag toho wereg ulug wel eneptuk lamuhup fug.

¹⁸ Mo ilig am wirig am turukmu pikalem tamon unuk Abib nit o Mesiren wilip atukukon ino fam hiren An wel naptuk lit hiyag hisarikik ane hikit toho suburu roti suwap turuk angge ragi embeselug wiratukon eneg narukmen hup sabirenam atuk laruhu.

¹⁹Hit hunumalikisi ap angge wandabon men henembohom umalik ap angge tam indag atukon men Allah anggengge ulug An nubahet emberuk lamuhup.

²⁰Henembohom keledai umalik tam indag atukon arimano unubalmangge wam domba umalik emberuk lamuhup. Ari roho emberuk lamuhup fug halug wam keledai umalik ino anggolop kong tebeseruk lamuhup. Hit hunumalikisi ap angge wandabon arimano oho An nubahet embelep angge famen embeselug unubalmangge nungge-nungge emberuk lamuhup. Ap sa An nambeg waharukon inggikmu eleg angge waharuk laruhu fug.

²¹O falfalikenam o yabuk wituk lamuhup. O sabir angge nungge-nungge wituk lamuhup fug. Yabuk wituk li oho suburu sig naruk li oho o sabir angge kel taruk lamuhup.

²²Roti anggen tamon paltuk li Allah henehiyehen wel turuk lamuhup. Mo lahalug hur atukmu anggen yihikon tahantuk li oho Allah wel turuk lamuhup.

²³Mo misig fam hinahanam hit ap angge welahebon obog toho Allah Israel ninap NINIKNI suwon ino wel tul ulug An nambeg waharuk lamuhup.[17]

²⁴Anden ap obog toho hit honolohotman yanggal enebuhukteg enengginang hili yat toho hiyag hisahuk angge re hit hinindimuwen it suhuloho wamuhupteg nenengginang ilmig nenebuhup puk fug angge henekol eleg toho An Allah wel naptuk ambeg ino laruk lamuhup.

²⁵Suburu roti suwap turuk angge men tag toho wiratukonet wam waroho yaltul peruk lahebonet mangno roho An nubahet emberuk lamuhup fug. Wam Paskah esetuk lamuhubon arimano sono nahuk ulug tor angge oho umbuk fug angge hubanggo ino eneg obog toho naruk lamuhup.

²⁶Mo eke fam eke fam kinangman anggen wilip atukon tamon NINIKNI Allah ibam walug waharuk lamuhup. Wam domba kambing umalik unu ino isinga ag owe men mangno roho esetuk lamuhup fug,” ulug hiyag itfag.

²⁷Ari ulug hiyag itfareg NINIKNI Allahn nin Musa fam, ”An nele hiyag hirihiyon aru haharoho embemihin. Nele hiyag hutuk lahiyon hikit toho laruk lamuhup ulug hat humalikisi Israel inap men hunubam sali emberuk lahi,” ibag.

²⁸Ari ibagma Musa inowen suburu ik na fug angge NINIKNI Allah iraham weregman hup teng misihen nubam hilag nuwalen 40 atfag. Allahn sali imbibag ane Wene Numen itano Musan helep fam hahatfag.

²⁹Musa tom Sinai famen helep piren Wene Numen hahatfahon itano inggikmu seneko wambik waharukmu NINIKNI Allah men enele uruk latfahon ariyen Musa orohole umbagpag turuk latfag angge famen at inggareg apeleg teg latfag.

³⁰Harun men Israel inap obog toho menen yet harukmen Musa orohole umbagpag turuk latfagma it enekolen iraham libag fugmu

³¹Musa inowen Harun men Israel inap onowesi men wol enepfareg ele hiyag isaruk latfag.

³²Ele hiyag isibagma Israel inap obog toho iraham luhal arik watfagma NINIKNI Allahn ari-ari turuk lamuhup ulug tom Sinai famen hiyag utuk latfahon Musan hiyag isibag.

³³Ele obog toho hiyag isibareg Musa orohole sum fam saleg latfag.

³⁴Hundig-hundig Musa NINIKNI Allah men Ambi Atuk Ibam kuruk lit sum orohole salehon ino oho felug wereg angge wilip atuk latfag. Wilip atug Allahn uruk latfag ane Israel inap hiyag isaruk latfag.

³⁵Hiyag isarukmu iren yet harukmen Musa orohole umbagpag turuk latfagma nin orohole sum fam saleg lit weregman eneg fobik Allah men enele uk oho lit sum oho felug kuruk latfag.