Read Angguruk Yali KELUARAN 35 Bible Online

KELUARAN 35 - Angguruk Yali bible

KELUARAN 35

¹Welatfareg Musa inowen Allah umalikisi Israel inap obog toho wol enepfareg unubam ele uruk lit, ”NINIKNI Allahn tuk teg ane fahet hiyag nisarisiyon iminon tu:

²O falfalikenam o yabuk wituk lamuhup. O sabir angge kel taruk lit An HINIKNI Allah fahet wenggel niyaruk lamuhup. Ap o sabir angge yabuk wit tarukon arimano obog toho war amag.

³O sabir angge o kema-kema hit hinibam indok munggaltuk lamuhup fug,” ibag.

⁴Nin Musa inowen Allah umalikisi Israel inap obog toho unubam ele uruk lit, ”NINIKNI Allahn hiren turuk lamuhubon fahet hiyag hisarukon tu:

⁵An fahet henenggengge fano-fano angge imbik maniyek! Hit hinindimuwen imbila peruk lahebonen eneg embelihip. Imbik watlihibon iminon tu: Ili ruruk angge emas, perak, tembaga men,

⁶hekel sulumon men wiyuk anggen, mut, polu fam palehon men,

⁷wam kambing oruk men, wam domba ahap mut fam palehon men, o ungga saltukon inag ahap hag angge men, e sahi men,

⁸hindali ahaluwe iral faheron men, amben fano angge ap enebene are rurukon men hubu lahaptukon men,

⁹helep il uningga rohon men, helep ili faya urukon winon sum Allah amingmingangge imam onoweyen wan turuk asum fam topno reberukon men, sum imamen amigmu sukni ferukon fam topno reberukon men ari obog toho walug watlihip.

¹⁰Walug waharuk lit o wituk hinap men eke hag eke hag laltuk hinap menen NINIKNI Allahn tu men ari men An wit numuhup irisiyon wiri fuhuben nambeg watlihip.

¹¹Wiri fububon tu: o sabo fanowon men, sum ungga saltukon men, sum ungga altap toho hondo rehon men, ubahat men, e anggeyon tik hag angge ahandip turukon men, kanti hag angge men, e uwag men, anduli men,

¹²e seng toho wirihon peti Wene Numen haharehon elma kilabeg angge men, peti ele latuk angge men, paya roho walug laruk ahen men, sum peti ino mapmu roho pilabehon men,

¹³e tuwalehon men, e ino emberimu emberuk angge obog toho men, e ino fam Allah fahet roti anggen tag toho wirako emberukon men,

¹⁴iral emberuk angge men, iral iraroho emberukon men, hindali ahaluwe men, iral haltuk angge obog toho men,

¹⁵hubu lahaptuk angge men, paya roho walug laruk ahen men, amben fano angge ap enebene are rurukon men hubu lahaptuk angge men, o sabo sok fahet sum tuhuloho pilabehon men,

¹⁶wam waroho yaltuk ambeg walinggoho sum hag angge tembaga fam wiroho hililip tehon men, yaltuk ambeg haltuk angge obog toho men, paya roho walug laruk ahen men, kou humon men, kou ino emberuk angge men,

¹⁷o sabo fanowon walinggoho elehet huk toho warukon fahet sum yaron men, sum ino tuhuloho pilaptukon fahet e uwag men anduli men, sok ele latuk asum men,

¹⁸o sabo fanowon asum men elehet walinggoho wahup asum men fahet posiyemanggen kinangma yatukon men hele men,

¹⁹Allah amingmingangge imam Harun umalikisi menen o sabo fanowon fam iniyabuk wituk lit wan teg asum arimano men wiri fuhup,” ulug hiyag isibag.

²⁰Hiyag isibagma holfareg Israel inap arimano Musa embeselug libag.

²¹Libareg ap inindimuwen imbila pibahon arimanowen o sabo fanowon undama foroho angge men sum Allah amingmingangge imam arimanowen wan teg asum men wibuhup ulug enenggengge eke hag eke hag NINIKNI Allah fahet imbik watfag.

²²NINIKNI Allah fahet nenehiyehen umbul ulug ap men hiyap menen eneliliyangge emas fam wirihon eke hag eke hag enenggolop ke wan teg latfahon men pun hag angge men inisanggomangge men sohomangge men walug watfag.

²³Nin eke hekel wiyuk anggen, mut, polu men fam palehon, sum sulumon men, wam kambing oruk men, wam domba ahap mut fam palehon men, o ungga saltukon inag ahap hag angge men,

²⁴ili ruruk angge perak men tembaga men e sahi men NINIKNI Allah fahet umbul ulug walug watfag.

²⁵Walug watfagma hiyap ininggik fanowonen inindi enehiyehen hekel men wam kambing oruk men walug watfahon arimano suwalfareg Musa ambeg walug watfag.

²⁷Walug watfagma Israel inap onowesiyen helep il uningga rohon men, helep ili faya urukon winon sum Allah amingmingangge imam onoweyen wan turuk asum fam topno reberukon men, sum imamen amigmu sukni ferukon fam topno reberukon men,

²⁸amben fano angge eke hag eke hag men, hindali ahaluwe iral faheron men, amben fano angge ap enebene are rurukon men hubu lahaptuk angge men imbik watfag.

²⁹Ari roho imbik waharuk lit Israel inap abet hiyabet NINIKNI Allahn Musa feneyen ari-ari wibuhup ulug hiyag nesehek ane hikit toho nungge-nungge At fahet imbik lul ulug wenggel haruk latfahon obog tohowen inindi enehiyeg toho enenggengge walug watfag.

³⁰Walug watfagma Musa inowen Israel inap unubam ele uruk lit, ”NINIKNI Allahn o sabo fanowon wituk laruhu ulug Yehuda ahun Hur inowen endetfahon Uri amloho Bezaleel ino mumal tarisi.

³¹Mumal tarisireg Ahime fanowon ubam emberuk lit indi anggarap tirisimu mun ane man ane fahet oluk teg lit inggiken oho yi angge ti angge wibuk teg.

³²Hun ariyen indimu wenggeltuk ane hikit toho ili ruruk angge emas perak men ine angge tembaga men fam nungge-nungge lale feruk lit

³³helep wal taneg emberuk ane wirim toho paltuk lit e fam hesenggengge waruk lit yabuk eke hag eke hag wibuk teg.

³⁴Wibuk tegma NINIKNI Allahn hun Bezaleel ino men unggul unuk Dan ahun Ahisamakh amloho Aholiab men inindi onolukap eneptisimu it piren itanowen ap winon milal eneptuk lamuhup.

³⁵Allahn let eneptukmu it piren itano inindi anggat toho yabuk eke hag eke hag wibuk teg lit inindimuwen wenggeltuk ane hikit toho sum il sakowon hik toho uruk ane men sum wiyuk anggen, mut, polu men fam palehon yihik feruk ane men nungge-nungge ilit toho yihik feruk ane men onoluk teg.