Read Angguruk Yali KELUARAN 36 Bible Online

KELUARAN 36 - Angguruk Yali bible

KELUARAN 36

¹Onoluk teg lit hun Bezaleel men Aholiab men ap NINIKNI Allahn inindi anggarap eneptukon men eke hag eke hag ininggik fam witukon obog toho menen NINIKNI Allahn hiyag nitisi ane hikit toho o sabo fanowon ino wit umuhup,” ulug hiyag isibag.

²Ari ulug hiyag isibareg Musa inowen Bezaleel men Aholiab men ap NINIKNI Allahn inindi anggarap eneptuk latfahon inindimuwen enehiyeg toho o sabo ino wiri fuhuk peruk latfahon men wol enepfagma Musa ambeg watfag.

³Watfagma Israel inaben Allah ibam o sabo wibuhuk ulug obamangge fano-fano angge miningguruk latfahon obog toho Musa inowen hun Bezaleel men Aholiab men it winon at ambeg watfahon men og isibag. Og isibagma Israel inaben nin sebe roho o hubet inindi enehiyeg toho fano-fano angge walug waharukmen eneg welatfag.

⁴Walug waharukmu o sabo wituk inap arimano iniyabuk embeselug Musa ambeg watfareg

⁵at ubam enele uruk lit, ”Israel inaben fano-fano angge mun angge man angge anggolo roho walug waharuk latusa. Walug waharuk latusa angge arimano men NINIKNI Allahn niniyabuk wal taneg hiyag nisarisiyon men wirim teg angge re fobik oho walug wamuhup fug,” ulug hiyag itfag.

⁶Hiyag itfagma Musa inowen otsi hiyag isaruk lit, ”Allah ibam o sabo wibuhukon fahet obamangge anggolo walug waharikipteg nin sebe roho walug wamuhup fug ulug o walinggoho ap hiyap obog toho hiyag isil lalihip,” ulug hiyag isibag. Hiyag isibagma Israel inaben obamangge mun angge man angge anggolo roho walug watfahon men Allah ibam o sabo wibuhuk peruk latfahon men wirim tehen nin sebe roho walug wamuhuk pibag ane ino imbisibag.

⁸Imbisibagma hun Bezaleel men eke hag eke hag wituk ane fahet inindi anggat teg inap menen o sabo fanowon hulubit ulug sum il sakowon hik toho urukon mut men polu men fam palehon numen yihik fibareg ilit toho wituk inaben sum arimano fam malaikat ahuhe ilit tibibag.

⁹Sum itano wal taneg wirimangge yat toho wirim tibahon il nisanggowen, onggorik wirim tibahon il piren wirim toho yihik fibag.

¹⁰Sum yihik fibahon fuwaben-fuwaben seleben toho ahandip tibag.

¹¹Seleben toho ahandip tibahon piren itano il hunduhuk ful ulug enelulukmu ahale polu fam palehon wal taneg teng piren yihik fibag.

¹³Yihik fibareg ahale sum piren fam werehon itano ahandip turuk angge ulug emas fam kanti hag angge teng piren wiri felug sum piren kanti itano fam ahandip tibag.

¹⁴Ahandip tibareg o sabo ungga fahet wam kambing oruk fam sum nanggoloben yihik fibag.

¹⁵Sum yihik fibahon itano wal taneg wirimangge yat toho wirim tibahon il nuwalen, onggorik wirim tibahon il piren wirim toho yihik fibag.

¹⁶Sum yihik fibahon fuwaben seleben toho misihap tibareg sum falfaliken winon oho ahandip tibag.

¹⁷Sum misihap tibahon piren itano hunduhuk ferukon fahet sum piren wal taneg enelulukmu ahale wal taneg teng piren yihik fibag.

¹⁸Yihik felug sum piren itano ahandip turuk angge ulug ine angge tembaga fam kanti hag angge teng piren wiri fibareg sum piren itano o sabo ungga saltukon fahet kanti itano fam ahandip tibag.

¹⁹O sabo ungga altap toho hondo reg lamag ulug wam domba ahap mut fam palehon imbik lahalug ahap ino palimu altap toho inag ahap hag angge imbik lahibag.

²⁰Ari obog toho wiri fibareg o sabo ubahat fahet e sahi wep toho imbibag.

²¹E sahi arimano wal taneg wirimangge yat toho wirim tibahon il uhanen, horog toho wirim tibahon il misig wirim toho seng tibag.

²²E imbibahon arimano ambiyang piren toho kabale fil libareg imbibag.

²³E arimano ubahat ik eleruk filon men ambut filon men fahet wal taneg likin fumahen wep toho imbibag. Imbibareg anduli fo roho ambiyang pilaptuk ambeg ulug ili ruruk angge perak fam anduli teng misigmen nubam hilag nuwalen wiri fibag. Wiri felug ubahat wal taneg werehon ambiyang piren itano anduli fo reg ambeg itano piren-piren pilabe fil libag.

²⁷Ubahat ambol fil hubula fil werehon fahet e falfaliken wep toho imbibag.

²⁸Ubahat ambolma indit fuma-fuma werehon fahet e anggeyon piren sali roho wiri fibag.

³⁰E ubahat ambolma werehon falfaliken men e anggeyon indit wibukon piren men hutuk teberuk ambeg ulug ili ruruk angge perak fam anduli nisanggo fumahen wiri felug ubahat misig-misig anduli piren-piren fam pilabe fil libag.

³¹Pilabe fil libareg e anggeyon tik hag toho ahandip turukon ulug ubahat ik eleruk filon, ambut filon, hubula filon wal taneg fahet e anggeyon tik hahon fuwaben seng toho wiri fibag.

³³E anggeyon tik hahon misig ubahat pik-pulmu emberuk lit indit fuman fuma watil libag.

³⁴E ubahat men tik ahandip turuk ahen arimano men emas fam hililip toho lombog tebelug sehene emas fam wirihon ubahat wal taneg hunduhuk fibahon fam kilabe fil libag.

³⁵O sabo obog toho wiri fibareg peti elma Wene Numen haharehon kilabeg ambeg mapmu roho ulug aluke fil sum tuhuloho pilabeg asum sulumon men wiyuk anggen, mut, polu men fam palehon men yihik fibag. Yihik fibagma ilit toho wituk inaben sum ino fam malaikat ahuhe ilit tibag.

³⁶Sum ino tuhuloho pilaptuk ambeg ulug e sahi uwag uhan emas fam hililip toho lombohap tibareg o undama hutuk teberuk ambeg ulug ili ruruk angge perak fam anduli uhan wiri fibag. E sahi anduli uhan itano fene laha felug sum ino emas kanti hahon ambiyangman suknoho pilabe fibag.

³⁷Pilabe fibareg o sabo sok ulug sum sulumon men wiyuk anggen, mut, polu men fam palehon men yihik fibag.

³⁸Yihik fibareg sum ino tuhuloho pilaptuk ambeg ulug e sahi uwag fuwaben oko kanti hag angge fam ahandip tibareg e sahi ambiyangma men kanti hag angge ahandip turuk angge itano men emas fam hililip toho lombohap tibag. Lombohap tibareg ine angge tembaga fam anduli fuwaben wiri felug o sabo sok fahet e sahi fuwaben itano hutuk tibibareg sum ino tuhuloho pilabe fibag.