Read Angguruk Yali KELUARAN 37 Bible Online

KELUARAN 37 - Angguruk Yali bible

KELUARAN 37

¹Hun Bezaleel inowen peti elma Wene Numen kilabeg angge ulug e sahi sali roho peti eke wiri fibag. Peti ino wirimangge yat toho wirim tibahon il piren 110 sentimeter, horog toho wirim tibahon men lahabeg wirim tibahon men ambi roho il misig 60 sentimeter wirim toho wiri fibag.

²Peti ino selma oho undama oho ili ruruk angge emas orohole mondabi fanowon fam hililip toho lombog tibibag. Lombog tibibareg peti inggapkap pali filon fene hesenggengge emas fam wirihon topno ribibag.

³Peti ino paya roho walug laruk ahen fahet indok fam emas wirako sehene uhan lale fibareg peti fuma-fuma sehene piren-piren hunduhuk ke ulug indit uhan fam topno ribibag.

⁴Topno ribibareg paya roho walug laruk ahen ulug e sahi piren oko emas fam hililip toho lombog tibibag.

⁵Lombog tibibareg e paya roho walug laruk ahen piren itano sehene uhan itano fam kilabe fibag.

⁶Peti ele latuk angge emas orohole mondabi fanowon fam wituk lit peti wirimangge yat toho wirim tibahon men horog toho wirim tibahon men hikit toho wiri fibag.

⁷Wiri fibareg kik turuk angge fam emas teloho malaikat hag angge piren ilit toho wiri fibag. Wiri fibareg malaikat itano peti ele latuk angge atog fuma-fuma unduhuk fibag.

⁸Malaikat piren itano peti emberimu unduhuk feruk lit ele latukon men ahandip toho misihap tibag.

⁹Malaikat piren itano fuma-fuma unduhuk lit onorohole peti ele latukon fil pilaboho weregma eneherabul peti ino palimu wiriloho hondo reg latfag.

¹⁰Peti witfareg hun Bezaleel inowen e tuwalehon suburu roti emberuk ambeg ulug e sahi seng toho wirimangge yat toho wirim tibahon il misig, horog toho wirim tibahon il misig pul ke minggiroho, lahabeg wirim tibahon il misig pul ke minggiroho sebe roho tor angge hikit toho wiri fibag.

¹¹Wiri feruk lit e ino emas orohole mondabi fanowon fam hililip toho lombohap tibibareg inggapkap fene hesenggengge emas fam wirihon topno ribibag.

¹²Topno ribibareg e tuwalehon ino walinggoho e seng toho wirimangge lahabeg wirim tibahon inggik misig wirim toho palehon eke imbik lahibag. E seng tohon ino fene oho hesenggengge emas fam paloho wirihon topno ribibag.

¹³E tuwalehon ino paya roho walug laruk ahen fahet sehene uhan emas fam lale fibareg e seng tohon walinggoho imbik lahibahon apma e tuwalehon uyug uhan fam hunduhuk fibag.

¹⁵Hunduhuk fibareg paya roho walug laruk ahen ulug e sahi piren oko emas fam hililip toho lombog tibibag.

¹⁶Lombog tibibareg Allah olohotma ik anggur ahaluwe hilili ferukon fahet kou, kubag, ikag, fili hag angge men emas orohole mondabi fanowon fam lale fibag.

¹⁷Lale fibareg hun Bezaleel inowen kik turuk angge fam emas orohole mondabi fanowon teloho iral emberuk angge eke lale fibag. Laltuk lit iral emberuk angge uyug men uwag men hesenggengge e owil hahon men ahandip til la fug angge we misihim mangno roho lalfag.

¹⁸Iral emberuk angge uwag misig fam fuma fil inggik hinahan, fuma fil inggik hinahan wiri fibag.

¹⁹Inggik wal taneg fam hesenggengge e owil hahon hinahan topno reg latfag.

²⁰Iral emberuk angge uwag fam hesenggengge e owil hahon uhan topno ribibareg

²¹inggik fuma-fuma wilibig ambeg hinahan itano apma e owil hahon misig-misig topno ribibag.

²²Iral emberuk angge ino emas orohole fanowon fam teloho lale feruk lit inggiket hesenggenggeyet misihim eneg mangno roho lale fibag.

²³Lale fibareg hun Bezaleel inowen emas orohole mondabi fanowon fam hindali ahaluwe hundutuk ambeg ulug kou sabiren men iral haltuk angge men indok ware feseruk ahik foroho anggubag men lalfag.

²⁴Iral emberuk anggeyet haltuk angge obog tohowet emas orohole mondabi fanowon anggin te 35 kilogram fam witfag.

²⁵Hun Bezaleel inowen Allah fahet amben fano angge yaloho hubu lahaptuk angge ulug e sahi seng toho wirimangge yat toho wirim tibahon men ayuhuk fil wirim tibahon men ambi roho il misig pul ke minggiroho, lahabeg wirim tibahon il misig wirim toho wituk lit hubu lahaptuk ambehet ambiyang uhanet we misihim eneg mangno roho wiri fibag.

²⁶Wiri fibahon obog toho emas orohole mondabi fanowon fam hililip toho lombog tibibareg inggapkap pali filon fene hesenggengge lisarep hahon emas fam wirihon topno ribibag.

²⁷Topno ribibareg hubu lahaptuk angge ino paya roho walug laruk ahen kilaboho emberuk ambeg ulug sehene emas fam wirihon piren oko e sali roho wirihon fuma-fuma lisarep hag angge topno roho werehon apma hunduhuk fibag.

²⁸Hunduhuk fibareg paya roho walug laruk ahen ulug e sahi piren oko emas fam hililip toho lombog tibibag.

²⁹Ari obog toho tibareg Bezaleel inowen amben fano angge wituk inap unubam amben fano angge Allah ibamen ap enebene are rurukon men hubu lahaptuk angge men wiriyek ulug hiyag isibagma wiri fibag.