Read Angguruk Yali KELUARAN 38 Bible Online

KELUARAN 38 - Angguruk Yali bible

KELUARAN 38

¹Hun Bezaleel inowen Allah fahet wam waroho hubu lahaptuk angge ulug e sahi seng toho wiri fibag. Wiri fibahon wirimangge yat toho wirim tibahon men ayuhuk fil wirim tibahon men ambi roho il hinahan, lahabeg wirim tibahon il piren wirim toho wiri fibag.

²Wiri feruk lit hubu lahaptuk ambeg ambiyang uhanet we misihim eneg mangno roho wiri fibareg ambiyang uhan itano ine angge tembaga fam hililip toho lombohap tibibag.

³Lombohap tibibareg ine angge tembaga fam ulanggen men, fa men, kubag mep hinangguruk angge men, ul arep men, kou ul hik isa laruk angge men wiri fibag.

⁴Wiri fibareg tembaga fam sum hag angge indit tehon eke lale fibareg sum hag angge inowen hubu lahaptuk angge apma fil hililip tukag ulug kinangman laharuk lit hiliyangge pulmu werehon ino fam imbik lahibag.

⁵Imbik lahibareg hubu lahaptuk angge paya roho walug laruk ahen kilaptuk ambeg ulug tembaga fam sehene uhan lale felug sum hag angge indit wal taneg fam hunduhuk fibag.

⁶Hunduhuk fibareg paya roho walug laruk ahen ulug e sahi piren oko tembaga fam hililip toho lombog tibibag.

⁷Lombog tibibareg paya roho walug laruk ahen piren itano sehene hubu lahaptuk angge fuma-fuma hunduhuk fibahon fam kilabe fibag. Ari roho hubu lahaptuk angge obog toho wiri feruk lit undama kolo reg laruhu ulug e paleg fam wiri fibag.

⁸Hun Bezaleel inowen kou humon ik hinanggoho foroho angge wirik oho lit ine angge tembaga famen ininggareg onorohole kim haruk angge wirihon hiyap o sabo fanowon sok forohowon arimanowen tohon oko walug tembaga ino fam kou humon eke men kou emberuk angge men wiri fibag.

⁹Hun Bezaleel inowen o sabo fanowon owahalma ap palu atuk ambeg walinggoho elehet huk toho warukon fahet sum yaron il sakowon hik toho yihik fibag. Elehet ik ambut filon fahet sum yihik fibahon wirimangge yat toho wirim tibahon il teng piren wirim toho yihik fibag.

¹⁰Yihik fibareg sum ino tuhuloho pilaptuk ambeg ulug e uwag likin fumahen wep toho embelug e uwag hutuk teberuk ambeg ulug ine angge tembaga fam anduli likin fumahen oho wiri fibag. Wiri fibareg sum ino hele fuman fuma lisil lahabik embeminon famen kanti hahon ambiyangman suknoho pilabe femin ulug heleyet kanti hag anggeyet ili ruruk angge perak fam wiri fibag.

¹¹Ari roho elehet ik ambut filon wiri fibag ane hag toho elehet ik eleruk filon oho sumet e uwahet heleyet kanti hag anggeyet wiri feruk lit elehet wirimangge ilihig wirim tibahon il teng piren wirim toho wiri fibag.

¹²Elehet hubula filon wirimangge nunggulig wirim tibahon il hinahaneg fumahen wirim toho wiri fibareg sum tuhuloho pilabeg ambeg ulug e uwag numen wal taneg anduli tembaga wirihon fam hutuk tibibareg hele men kanti hag angge men perak fam lalfag.

¹³Elehet yali filon wirimangge nunggulig wirim tibahon oho il hinahaneg fumahen wirim toho wiri fibag.

¹⁴Elehet yali filon sok pulmu weregma sok ino fuma-fuma wal taneg elehet asum wirimangge yat toho wirim tibahon il sabiren wirim toho yihik fibareg sum tuhuloho pilabeg ambeg ulug e uwag hinahan anduli hinahan fam hutuk tibibag.

¹⁶Elehet asum il sakowon hik toho yihikon oko walug o sabo fanowon walinggoho elehet ino huk toho wibag.

¹⁷Elehet asum tuhuloho pilabeg ahen arimano ambiyangma ili ruruk angge perak fam hililip toho lombog tibibareg e uwag hutuk teberuk ambeg anduli arimano tembaga fam wiri fibag. Wiri fibareg elehet asum suknoho pilaptuk ahele men kanti hag angge men perak fam wiri fibag.

¹⁸Ari obog toho wiri fibareg elehet sok ele latukon fahet sum il sakowon hik toho urukon mut men polu men fam palehon yihik feruk lit sum wirimangge yat toho wirim tibahon il numen, lahabeg wirim tibahon ino elehet asum winon lahabeg wirim tibahon hikit toho il hinahan wirim toho yihik fibag.

¹⁹Sok ele latuk asum tuhuloho pilabeg ambeg ulug e uwag uhan ambiyangma perak fam hililip toho lombog tibibareg e uwag hutuk teberuk ambeg anduli uhan itano tembaga fam wiri fibag. Wiri fibareg sum suknoho pilaptuk ahele men kanti hag angge men perak fam lalfag.

²⁰O sabo fanowon asum men elehet walinggoho wibag asum men fahet posiyemanggen kinangma yatukon arimano oho tembaga fam wiri fibag.

²¹Hun Bezaleel inowen o sabo fanowon Allah Wene Numen haharehon foroho ambeg ino obog toho wiri fibagma Musa inowen Allah amingmingangge imam Harun amloho Itamar hiyag utuk lit, ”Ili ruruk angge o sabo fanowon witukukon suwesingga fam haharoho umbuhuben hat hotsi Lewi inap arimano hiyag isahun,” ulug hiyag itfag. Hiyag itfag ane hikit toho suwesingga fam haharoho imbibahon tu:

²²Yehuda ahun Hur amloho Uri inowen endetfahon Bezaleel inowen NINIKNI Allahn Musa fam hiyag itfag ane hikit toho o sabo fanowon obog toho wiri fibag.

²³Wiri feruk lit Dan ahun Ahisamakh amloho Aholiab inowen hun Bezaleel ino let turuk latfag. Aholiab ino indi anggat teg lit sum il sakowon hik toho uruk ane men sum mut men polu men fam palehon yihik feruk ane men nungge-nungge ilit toho yihik feruk ane men oluk teg latfag.

²⁴Bezaleel men Aholiab menen o sabo fanowon wibuhup ulug Israel inaben obamangge miningguruk lit ninindiyen Allah fahet umbul ulug ili ruruk angge emas anggolo roho walug watfag. Emas ino anggin emberuk angge o sabo fanowon inowen foroho latfahon fam embelug winag harukmen anggin te 1.000 kilogram atfag.

²⁵Ap Israel inap indag atfag sali mo ilig am wirig am turukmu likin fumahen atfahon emberim filon enebe teng-teng angge 603.550 arimano wal tanehen uang perak misig pul ke minggiroho imbik watfag. Perak imbik watfahon arimano andog toho anggin emberuk angge o sabo fanowon inowen foroho latfahon fam embelug winag harukmen anggin te 3.430 kilogram atfag.

²⁷Perak anggin te 3.400 kilogram fam ubahat anduli men e uwag sum sukni ferukon anduli men teng uhan wiri fibag. Anduli wiri fibahon wal taneg anggin te 34 kilogram welatfag.

²⁸Anduli obog toho wiri fibareg perak alindik atfahon anggin te 30 kilogram fam hele men kanti hag angge men wiri feruk lit e uwag ambiyangma oho perak fam hililip toho lombohap tibibag.

²⁹Ine angge tembaga walug watfahon anggin te 2.425 kilogram welatfag.

³⁰Tembaga ino fam e uwag o sabo sokolma werehon anduli men, e uwag owahalma werehon anduli men, o sabo men elehet walinggoho werehon men fahet posiyemanggen kinangma yatukon men, sum hag angge hubu lahaptuk angge altap toho lombohap teberukon men wiri felug hubu lahaptuk angge obog toho tembaga fam hililip toho lombog tibibag.