Read Angguruk Yali KELUARAN 39 Bible Online

KELUARAN 39 - Angguruk Yali bible

KELUARAN 39

¹ NINIKNI Allahn Musa fam hiyag itfag ane hikit toho Bezaleel men Aholiab menen Allah amingmingangge imam Harunen Allah iyabuk wituk lit wan teg asum yihik fibag. Yihik ful ulug hekel wiyuk anggen fam palehon men, mut fam palehon men, polu fam palehon men wep toho imbibag.

²Hekel wep toho imbibahon men sum sulumon il sakowon men ili ruruk angge emas men fam sum amigmu hililip toho wan tehon unuk efod yihik fibag.

³Sum ino yihik feruk lit sum uruk inaben yihik feruk ane hikit toho hekel emas fam suwalehon men hekel sulumon men wiyuk anggen, mut, polu men fam palehon men mangno roho yihik feruk latfag.

⁴Sum ino misihim uk fug angge olohotma wan turukon men ambolma wan turukon men amu-amu yihik felug sum piren itano ahandip turuk angge ulug ahale umaloma emberukon piren yihik fibag.

⁵Ahale itano yihik felug NINIKNI Allahn Musa fam hiyag itfag ane hikit toho hele alunggu ke pug turukon eke yihik fibag. Hele yihik fibahon ino sum efod ino yihik fibag ane wirim toho hekel sulumon men wiyuk anggen, mut, polu men fam palehon men, hekel ili ruruk angge emas suwalehon men fam yihik felug sum efod ino men ahandip toho misihap tibag.

⁶Misihap tibareg Bezaleel men Aholiab menen helep il singon men yanggowon men altap tohon piren oko walug helep itano walinggoho lisarep hag angge emas fam wirihon eke topno ribibareg helep paltuk inaben enehangge ilit toho paltuk ane hikit toho helep piren itano fam Israel inap ununggul unuk nisanggowen ununuk paloho imbibag.

⁷Paloho imbibareg Allahn Israel inap ununggul unuk helep fam haharehon arimano yet isalug it fahet wenggel isaruk laruhu ulug NINIKNI Allahn Musa fam hiyag itfag ane hikit toho helep itano sum efod ahale piren fam topno ribibag.

⁸Topno ribibareg sum efod yihik fibag hag toho sum ilit toho uruk inaben yihik feruk ane wirim toho hekel sulumon men wiyuk anggen, mut, polu men fam palehon men, hekel ili ruruk angge emas suwalehon men fam sum amigmu sukni ferukon eke yihik fibag.

⁹Sum ino pul ke si roho yihik feruk lit wirimangge yat toho wirim tibahon men onggorik wirim tibahon men ambi roho inggik misig wirim toho yihik fibag.

¹⁰Sum yihik fibahon fam helep ili faya rurukon iraroho topno reberuk lit sum ino ilan fil helep il ip orohole hahon, il puhulik palehon hahon, il piyanu palehon hahon men,

¹¹helep ilan fil imbibahon iraham helep il mut palehon hahon, il sing pohol hahon, il ik wirik anggolowon hahon men,

¹²helep itano iraham e ahaluwe helep hag atfahon, helep hesenggengge ohowon hahon, il wiyuk anggen hahon men,

¹³sum ino atogma helep il polu palehon hahon, il singon men yanggowon men altap tohon, sili umbagpag turukon men topno ribibag. Helep arimano topno reberuk lit helep wal taneg walinggoho lisarep hag angge emas fam wirihon eke topno ribibag.

¹⁴Helep topno ribibahon nisanggowen wal taneg fam helep paltuk inaben paltuk ane hikit toho Israel inap ununggul unuk nisanggowen ununuk man-man paloho imbibag.

¹⁵Paloho imbibareg sum amigmu sukni ferukon ino fahet hekel suwaltuk ane hikit toho emas orohole fanowon fam hele piren suwalfag.

¹⁶Suwalfareg emas fam sohomangge piren men sehene piren men lale felug sehene itano sum ino awirihigmu fuma-fuma topno ribibag.

¹⁷Topno rebelug hele piren itano sehene itano fam kilaboho imbibag.

¹⁸Kilaboho imbibareg sum amigmu sukni ferukon ino sum efod alukema ahandip amag ulug hele piren itano atog wal taneg sohomangge sum efod ahale piren fene topno ribibahon itano elma kilaboho imbibag.

¹⁹Kilaboho imbibareg emas fam sehene piren eke lale felug sum amigmu sukni ferukon ambol fil onggorik fuma-fuma topno ribibag.

²⁰Topno rebelug sehene emas fam wirihon piren eke sum efod ahale piren fam sum awirihigmu horogma hele alunggu ke pug turukon emberimu topno ribibag.

²¹Topno rebelug sum amigmu sukni ferukon ino hele alunggu ke pug turukon pali fil suknigmu loloho lahu rohon ulug sehene sum ino fam werehon men sehene sum efod fam werehon men hele wiyuk anggen palehon fam ahandip tibag. Ari obog toho tibag ane ari Bezaleel men Aholiab menen NINIKNI Allahn Musa fam hiyag itfag ane hikit toho turuk latfag.

²²Sum efod unda fil wan turuk asum ino abirangge hekel polu palehon fam sum uruk inaben yihik feruk ane hikit toho il hik toho yihik fibag.

²³Yihik feruk lit sum ino pulmu ap unggul fahet yendeg ambeg ino tararag tuhu rohon ulug sing yihik feruk ane hikit toho keyenteg ele ino walinggoho awirihig ineyon fam yihik fibag.

²⁴Sum ino yihik fibareg Allah iyabuk wituk lit wan teg lamuhup asum ulug hekel wiyuk anggen fam palehon men, mut palehon men, polu palehon men fam yanggila anggen hahon lale felug sum ino onggorikmu walinggoho ilili fil libag. Yanggila anggen hahon ilili fibahon misig-misig sehelimu pinggong hahon emas orohole fanowon fam wirihon song tibisil libag. Ari obog toho witfahon NINIKNI Allahn Musa fam hiyag itfag ane hikit toho wiri fibag.

²⁷Wiri fibareg Harun umalikisi men unubahet hekel sulumon il hik toho sum undamon men,

²⁸sum ununggulmu langguk eneptukon toron men suwon men, sum unuyugmon men yihik fibareg

²⁹sum ilit toho uruk inaben yihik feruk ane wirim toho hekel sulumon men wiyuk anggen, mut, polu men palehon fam pahaluk hag angge yihik fibag. Ari obog toho NINIKNI Allahn Musa fam hiyag itfag ane hikit toho yihik fibag.

³⁰Nin eke hun Harun inowen ilahema wan turuk laruhu ulug emas orohole fanowon fam suwesingga hag angge eke lale felug helep fam paltuk ane hikit toho suwesingga hag angge ino fam ”NINIKNI Allah fahet” ulug paloho imbibag.

³¹Paloho imbibareg NINIKNI Allahn Musa fam hiyag itfag ane hikit toho suwesingga hag angge ino hekel polu palehon fam sum Harunen unggulmu langguk turukon emberim fil ilili fibag.

³² NINIKNI Allahn Musa fam hiyag itfag ane hikit toho Israel inaben Allah ibam o ta witil ya witil larukon ino obog toho wiri fibag.

³³Obog toho wiri fibag angge arimano Musa ambeg walug watfag. Walug watfahon tu: ubahat men, e anggeyon tik hag angge ahandip turukon men, kanti hag angge men, e uwag men, anduli men,

³⁴o sabo ungga altap toho hondo rehon wam domba ahap mut fam palehon men inag ahap hag angge men, sum tuhuloho pilabehon men,

³⁵e seng toho wirihon peti Wene Numen haharehon elma kilabeg angge men, peti ele latuk angge men, paya roho walug laruk ahen men,

³⁶e tuwalehon men, e ino emberimu emberuk angge obog toho men, e ino fam Allah fahet suburu roti emberukon men,

³⁷iral emberuk angge emas orohole fanowon fam wirihon men, iral iraroho emberukon men, hindali ahaluwe men, iral haltuk angge obog toho men,

³⁸hubu lahaptuk angge emas fam wirihon men, amben fano angge ap enebene are rurukon men hubu lahaptuk angge men, o sabo sok fahet sum tuhuloho pilabehon men,

³⁹wam waroho yaltuk ambeg tembaga fam witfahon walinggoho sum hag angge tembaga fam wiroho hililip tehon ino men, yaltuk ambeg haltuk angge obog toho men, paya roho walug laruk ahen men, kou humon men, kou ino emberuk angge men,

⁴⁰o sabo fanowon walinggoho elehet huk toho warukon fahet sum yaron men, sum ino tuhuloho pilaptukon e uwag men anduli men, sok ele latuk asum men, sum fahet posiyemanggen kinangma yatukon men hele men, o sabo fanowon fam wan turuk angge obog toho men,

⁴¹Allah amingmingangge imam Harun umalikisi menen o sabo fanowon fam iniyabuk wituk lit wan teg asum arimano men Israel inaben Musa ambeg walug watfag.

⁴²Eheyon arimano obog toho NINIKNI Allahn Musa fam hiyag itfag ane hikit toho Israel inaben wiri fibahon walug watfag.

⁴³Walug watfag angge arimano obog toho Musa inowen yet haruk lit NINIKNI Allahn hiyag nitisi ane hikit toho wiri ferusa ulug yet hibareg Israel inap arimano Allah unuk fam hi enepfag.