Read Angguruk Yali KELUARAN 4 Bible Online

KELUARAN 4 - Angguruk Yali bible

KELUARAN 4

¹Allahn Musa ubam ele hiyag itfagma Musa inowen hebeloho hiyag utuk lit, ”Israel inaben an nele holuk fug anggeyen, ’Hele si ane uruk lahen, NINIKNI Allah harikin fug,’ uruk lamuhupmu anden it unubam nungge ane tuhuk?” ulug kapal hibagma

²NINIKNI Allahn, ”Hinggikmu ari nungge seneg lahen?” ibagma, ”Wanggun seneg lahi,” ibag.

³Ibagma NINIKNI Allahn, ”Wanggun ari kinangma hik isin!” ibagma hik isibagma wanggun ino pisanggo atikim itano Musa akolen il misig hikip atfag.

⁴Hikip atukmen NINIKNI Allahn, ”Nin ahaye han lisoho wamihin,” ibagma lisoho wibag. Nin lisoho warukmen wanggun atfagma

⁵NINIKNI Allahn ele uruk lit, ”NINIKNI Allah, nunumbasi Abraham, Ishak, Yakub Inikni ino we tem harisi puhuben ari turuk laruhun,” ibag.

⁶Nin NINIKNI Allahn ele uruk lit, ”Hinggik sum ele ke kila fin!” ibagma inggik sum wan teg latfahon ele ke kila fibag. Inggik sum elman lisoho wibagma inggik yanggo atuk lit salukangge reg latfag.

⁷Salukangge reg latfagma, ”Nin sum ele ke kila fin!” ibagma nin sum elma kila fibareg lisoho wibagma fano atfag.

⁸Fano atfagma NINIKNI Allahn ele uruk lit, ”Enehangge atamon hag toho wal hahunmu yet hahup angge famen hat hele holuhup fug halug enehangge pirenehon wal hahunmu tem toho puhupteg hele holuhup.

⁹Enehangge pirenehon fam inindi anggar am fug angge hele holuhup fug halug ik Nil hinanggik lahunteg kinangma hilili fuhunmu mep aruhu,” ulug hiyag itfag.

¹⁰Ari ulug hiyag itfagma Musan te, ”Nikni, indamen tulug ketiya Haren an nubam hele uruk lahenma oho an nele ine roho uk fug teg lahi. Nambilik anggin tehen nele se roho uk fug teg lahi,” ibagma

¹¹NINIKNI Allahn, ”Ap ambilik san og isaruk? Ele urukon, ele uruk elehon, inisanggo larehon, inisanggo husihon, inil hupnihon, inil fenggenehon san wal turuk? An HIKNI Allahn wal turuk lahi fug?

¹²Ari fahet hat lamihinteg hele se roho uruk laruhunen let haptuk lit hiyag isaruk laruhun ane Anden milal haptuk laruhuk,” ulug hiyag itfag.

¹³Hiyag itfagma Musan te, ”Nikni, an we tem toho lahuk fuhen ap winon eke monde fuhun,” ibagma

¹⁴NINIKNI Allahn Musa fahet olok hibareg, ”Hat hare Harun, Lewi ahun ino wereg eleg ano? At ele ine roho urukon An noluk. At te hat yet hiyahuk ulug ahiyeg toho holohotma funggalma waharuk.

¹⁵Hat hambeg waruhumu aren ap hiyag isaruk laruhu ane haren hiyag utukmu hat hele muko hiyag isaruk laruhu. Anden hit henele seleg toho uruk lamuhuben let heneptuk lit hiren turuk lamuhup ane hiyag hisaruk laruhuk.

¹⁶Hat hele at hiyag utukmu aren Allah hag toho wereg lit hiyag nutuk ulug hat hele lisoho Israel inap hiyag isaruk laruhu.

¹⁷Aben tem toho hiyag nesehek peruk lamuhuben enehangge wanggun aru fam wal haruk laruhuk ulug hinggikmu seneko lahun,” ulug hiyag itfag.

¹⁸Allahn ari ibagma Musa iyamal Yitro ambeg suhuloho libareg ubam ele uruk lit, ”Haren fano pemihin halug an nori fano roho wereg ano ulug o Mesir isa lahuk,” ibagma Yitro inowen, ”Fano isa lahun,” ibag.

¹⁹Ari ibagma Musa ino kinang Midian embeselug uwan la fugmu NINIKNI Allahn at ubam ele uruk lit, ”Hat huwabuhuk perukon arimano mondabi war atusama ketiya o Mesir suhuloho lahun,” ulug hiyag itfag.

²⁰Ari ulug hiyag itfagma uhe men umalikisi men og eneplug wam keledai fam lahap enepfareg it inim o Mesir lul ulug laruk latfag. Allahn, ”Wanggun aru hinggikmu seneko lahun,” ulug hiyag itfag ane roho laruk latfag.

²¹Larukmu NINIKNI Allahn Musa fam, ”Hat o Mesir suhuloho lahunteg enehangge Anden tuhun ulug hineyap haptikikon itano Mesir inap onowe suwon olohotma wal haruk laruhun angge famen Anden ap suwon ino indi arikap tubusuhukmu humalikisi Israel inap men lalihip ulug hiyag hisahu fug.

²²Hiyag hisahu fugmu haren ap suwon ino fam hele uruk lit, ’NINIKNI Allahn ele urukon tu holeg lamin: Israel inap arimano An numalikisi wandabon werehen

²³Anden hiyag hutuk lit, ’Numalikisi arimanowen An nubam sembahyang ik lahuben hiyag isamihin,’ ulug heng haptikik angge famen haren hiyag isarikin fugmu ketiya hat hamloho wandabon An Allahn ware fusuhuk irisi,’ uhun,” ulug Musa hiyag itfag.

²⁴Ari ulug hiyag itfagma Musa uhe malik men o Mesir lahuk ulug kema nohorukmu NINIKNI Allah ambeg watfareg ware fesemin ulug turuk latfag.

²⁵Ari ulug turukmen Musa uhe Zipora inowen helep ele ohowon habo hahon wibareg amloho ambilahap palfag. Ambilahap palfahon ino fam Musa uyugmu[6] tung hibareg ambilahap palfahon fahet wenggel haruk lit, ”Hat an nahun mep wilip atukon welahen,” ibagma NINIKNI Allahn watmin fug ulug Musa imbisibag.

²⁷Welatfareg itano NINIKNI Allahn Harun fam, ”Musa olohotma lekma lamihin,” ibagma Harun ino libareg tom Sinai Allah antom alma salkal ibareg mako pug toho hi ribag.

²⁸Hi ribagma, ”NINIKNI Allahn, ’O Mesir lahunteg enehangge ari-ari wal haruk laruhun,’ ulug hiyag nitisi,” ulug Musa inowen Harun hiyag itfareg

²⁹Harun men o Mesir libareg Israel inap onowesi obog toho wol enepfagma palu arik watfag.

³⁰Palu arik watfagma NINIKNI Allahn Musa fam hiyag itfag ane ino Harun inowen hiyag isarukmu Musa inowen enehangge Allahn hiyag itfahon itano it iniline wal haruk latfag.

³¹Wal harukmu Israel inaben we tem hiyag nesehesa pibag. NINIKNI Allahn nit asengseng toho welaheyon yet nisarisireg let nenebuhuk peruk lit wereg ulug hiyag isarukmu hol hibareg enelenggen fam hur atfareg Allah wel turuk latfag.