Read Angguruk Yali KELUARAN 40 Bible Online

KELUARAN 40 - Angguruk Yali bible

KELUARAN 40

¹NINIKNI Allahn Musa fam ele uruk lit,

²”Pikalem misihon inam aruhu sambil ino haren o sabo fanowon An men Ambi Atuk Ibam ino unduhuk fuhun.

³Unduhuk fuhunteg e seng toho wirihon peti Wene Numen haharehon elma kilabeg angge ino o saboma imbik kulug mapmu roho ulug aluke fil sum tuhuloho pilabe fuhun.

⁴Pilabe fuhunteg e tuwalehon ino o ino imbik kulug emberimu emberuk angge iraroho umbuhun. Umbuhunteg iral emberuk angge oho imbik kulug iral arimano emberimu umbuhun.

⁵Umbuhunteg hubu lahaptuk angge emas fam wirihon ino peti Wene Numen elma kilabeg angge horogma sum tuhuloho pilabehon aluke fil unduhuk fuhun. Unduhuk fuhunteg o sabo sok kuruk ambeg sum tuhuloho pilabe fuhun.

⁶Pilabe fuhunteg sok sel fil wam waroho yaltuk angge ino umbuhun.

⁷Umbuhunteg o sabo men hubu lahaptuk ambeg men honggolegma kou humon ino embelug ik hinanggoho kilabe fuhun.

⁸Kilabe fuhunteg o sabo ino elehet huk toho wahunteg sok kuruk ambeg sum fam lare fuhun.

⁹Lare fuhunteg o sabowet undama wereg anggeyet Allah anggengge wereg ulug e ahaluwe amben fano angge are rebehun.

¹⁰Ari hag toho wam waroho hubu lahaptuk ambeg haltuk anggeyet, kou humon emberuk ambehet Allah anggengge ulug amben fano angge are rebehun.

¹²Are rebehunteg Harun umalikisi men o sabo sok kuruk ambeg iraham watlihip ulug wol eneplug enebe ik umag enebuhun.

¹³Ik umag enebuhunteg Harunen An niyabuk wituk lit wan teg asum haren at wan tebelug e ahaluwe amben fanowon unggulmu are reberuk lit An namingmingangge imam welaruhu ulug unduhuk fuhun.

¹⁴Unduhuk fuhunteg Harun umalikisi oho hat hiraham wamuhuben wol enebuhunteg sum enebemon imamen wan turukon wan enebuhun.

¹⁵Wan enebuhunteg inikni amben fanowon unggulmu are rebehun hag toho ir oho ununggulmu are eneptuk lit imam in enebuhun. Ari roho are eneptuk lit iren endebuhubonen endebuhubon oho An namingmingangge imam mondabi welamuhup ulug in enebuhun,” ulug hiyag itfag.

¹⁶NINIKNI Allahn hiyag itfag ane obog toho Musa inowen turuk latfag.

¹⁷Israel inap o Mesiren wilip atfahon mo ilig atug wirig atfagma pikalem misihon ket inam atfag sambil ino Allah men Ambi Atuk Ibam ino unduhuk fibag.

¹⁸Unduhuk feruk lit anduli hutuk tibareg ubahat lahabe felug tik watfag. Tik watfareg sum tuhuloho pilaptuk ambeg ulug e uwag hutuk tibibag.

¹⁹Hutuk tibibareg ungga sale felug NINIKNI Allahn hiyag itfag ane hikit toho sum fam palimu hililip tibibag.

²⁰Wiri fibareg helep piren Wene Numen hahatfahon itano e seng toho wirihon peti elma kilabe fibareg ele laroho e paya roho walug larukon piren lombog tibibag.

²¹Lombog tibibareg Allah men Ambi Atuk Ibam ino imbik kulug NINIKNI Allahn ibag ane hikit toho e seng toho wirihon ino mapmu roho ulug aluke fil sum tuhuloho pilabe fibag.

²²Pilabe fibareg sum ino iliko fil e tuwalehon ino imbik kibareg

²³NINIKNI Allahn ibahon ino hikit toho Allah fahet roti e tuwalehon emberimu imbibag.

²⁴E tuwalehon iraham wiriko fil indok umbagpag turukon emberuk angge imbibareg

²⁵NINIKNI Allah olohotma umbagpag tukag ulug hunduhuk fibag.

²⁶Sum ino orohole fil hubu lahaptuk ambeg umbagpag turuk angge emas fam wirihon imbibareg

²⁷NINIKNI Allahn hiyag itfag ane hikit toho Allah fahet amben fano angge yalfag.

²⁸Yale fibareg sok kuruk ambeg sum tuhuloho pilabe fibag.

²⁹Pilabe fibareg sok sel fil hubu lahaptuk angge ino imbibareg Allahn ibag ane hikit toho At ubahet suburu men wam men yaltuk latfag.

³⁰Yale fibareg hubu lahaptuk ambeg men o ino men honggolegma kou humon ino imbibareg ik hinanggoho kilabe fibag.

³¹Allahn ibag ane roho Musa men owe Harun umalikiyet hubu lahaptuk ambeg iraham luk oho lir oho o ino kuk oho lir oho ik hinanggoho kilabe fibag ambeg ino ininggiket unuyuhet umatuk latfag.

³³Musa inowen o inowet hubu lahaptuk ambehet elehet walinggoho kilabe fibareg sok kuruk ambeg sum fam lare fibag. Ari roho turukmen eneg o ino obog toho wiri fibag.

³⁴ Obog toho wiri fibagma hinan Allah men Ambi Atuk Ibam ino hililip tik wambik watfagma NINIKNI Allah o ino elma umbagpag turukmu o ino undamane seleg teg eneg latfagma

³⁵Musa kuk fug teg latfag.

³⁶Hina ino hililip tegma Israel inap we o ino iraham welatfag angge hina o ino embeselug palimu laharukmu yet halug Israel inaben o inowet o sabo iren tohonet halog toho walug ekema laruk latfag.

³⁸Israel inaben o wiri fil halog hil laruk latfag li yet harukmu NINIKNI Allah ilingge hina seheli ke o ino palimu wambik watlug weregma hubanggo hina sehelimu indok ambulpul turuk latfag.