Read Angguruk Yali KELUARAN 5 Bible Online

KELUARAN 5 - Angguruk Yali bible

KELUARAN 5

¹Welatfareg Musa men Harun men Mesir inap onowe suwon ambeg libareg ubam enele uruk lit, ”Israel ninap NINIKNI Allahn ele urukon tu holeg lamin, ’Lekman Hinikni Allah fam sembahyang ik lahup,’ ulug numalikisi hiyag isamihin irisi,” ulug hiyag itfagma

²ap suwon inowen, ”HINIKNI Allah ap sa hahon weregma At ele anden holtuk lit, ’Hit Israel hinap lalihip,’ ulug hiyag hisamin? HINIKNI Allah an napeleg. Lalihip ulug hiyag hisamin fug,” ibag.

³Ari ibagma Musa men Harun menen, ”Nit Ibrani ninap Ninikni Allah niniline ebenam atisireg ele hiyag nisarisi. Ari fahet fano pemihin halug nit hup hinahanam lekma lahukteg Allah NINIKNI fahet wam esebuhuk. Esebuhuk fug halug NINIKNI Allahn tog feneyen ano ouk feneyen ano nunusuhu rohon!” ulug hiyag itfag.

⁴Hiyag itfagma ap suwon inowen, ”Israel inaben yabuk warukmu nungge fahet hiren yabuk umbusukag ulug og enebul peruk lahep? Yabuk wituk latlihiben aliyek!

⁵Hit hunumalikisi Israel inap enebe anggolo weregma yabuk iren witukon ari embeselug kel ta lahup ulug nangginoho peruk lahep?” ibag.

⁶O ino sambil Mesir inap onowe suwon inowen otsi yabuk wiriyek ulug Israel inap mingming eneptuk latfag inap men, Israel inap yabuk warukon enesehelimuwon onowesi roho welamuhup ulug lahap enepfahon men unubam ele hiyag isaruk lit,

⁷”Hoholangge kinang men mangno roho tag tebelug o wituken hoholangge og isaruk latikip hag toho fobik og isaruk lamuhup fugmu enemu yami roho wak laruk lamuhup angge famen

⁸kinang anggolo tag taruk latusa hag toho tag turuk lamuhubon winag hahupmu alindik aruhu fug. Inirim toho eneg turuken, ’Ninikni Allah fahet wam waroho eserik lahuk,’ ulug enele hi roho uruk.

⁹Iren yabuk sat toho wituk halug ap enele si ane urukon holtuk lamuhup fug. Ari fahet yabuk angginon wituk lamuhuben mingming eneptuk lamuhup!” ulug ap suwon inowen hiyag isibag.

¹⁰Hiyag isibagma Israel inap mingming eneptuk inap men Israel inap onowesi roho welatfahon men libareg Israel inap unubam hiyag isaruk lit, ”Nit nonowe suwon inowen, ’Hoholangge og isaruk lamuhup fug,’ ulug hiyag nisarisimu

¹¹hit henemuwen hoholangge yami roho wak laruk lit kinang men mangno roho tag turuk lamuhup angge famen tag turuk lamuhubon alindik aruhu fug. Tam anggolo tag turuk latikip hag toho fobik oho tag turuk lamuhup,” ulug hiyag isibag.

¹²Ari ulug hiyag isibagma Israel inap o Mesir kinang atogman atogma hoholangge yami roho wak laruk latfag.

¹³Enemuwen yami roho wak larukmu mingming eneptuk inaben, ”Tam hoholangge og hisarukmu likiya hupmu anggolo tag turuk latikip hag toho ketiya oho anggolo tag turuk lamek! Alindik toho tag tilihip fug!” ulug enele olok toho hiyag isil laruk latfag.

¹⁴Hiyag isil laruk lit Mesir inaben Israel inap mingming eneptukon arimanowen Israel inap fahet onowesi roho welamuhup ulug in enepfahon unubam hiyag isaruk lit, ”Hit hunumalikisiyen tam kinang anggolo tag turuk latusa hag toho nungge fahet ketiya tag turuk eleg?” ulug yik angge unusuruk latfag.

¹⁵Ari turuk latfagma Israel inap yabuk warukon onowesi roho welatfag inap arimano Mesir inap onowe ambeg libareg at ubam enele uruk lit, ”Nungge fahet haren nit nunubam ari turuk lahen?

¹⁶Hoholangge og nisaruk eleg anggeyen kinang tag tiyek ulug mingming neneptuk lit yik angge nunusuruk angge famen alem hat hamingmingangge unubam wereg,” ulug hiyag itfag.

¹⁷Hiyag itfagma ap suwon inowen, ”Hit hinirim toho eneg turuk lit, ’NINIKNI Allah fahet wam waroho eserik lahuk,’ uruk lahep.

¹⁸Ari fahet suhuloho yabuk wirik lalihip! Hoholangge og hisaruk lam fug anggeyen kinang tag turuk lamuhubon alindik aruhu fug!” ulug hiyag isibag.

¹⁹Ari ulug hiyag isibagma Israel inap onowesi roho in enepfahon arimanowen ari roho hiyag nesehekma siyag toho welamuhuk ulug inindi anggin atfareg

²⁰ap suwon ibamen wilip atug Harun men Musa men selma yet enesugmu enembeg libareg

²¹it unubam enele uruk lit, ”Hiren turuk latikibon ari famen ap suwon ino amingmingangge men inindimuwen nit fahet inirim peruk lit nunusuhuk ulug wenggeltuk lit werehen NINIKNI Allahn hiren turuk latikibon ari fuki roho yet hisaruk lit alem angginon hunubam umbuhu,” ulug hiyag isibag.

²²Hiyag isibagma Musa inowen nin hebeloho NINIKNI Allah fam sembahyang uruk lit, ”Nikni, nungge fahet Haren Israel inap holok ane ari unubam turuk lahen? Nungge fahet an tuma mon nabik waharikin?

²³An Mesir inap onowe ambeg larikikteg Haren irikin ane hikit toho hiyag itikik li itanowen ap suwon inowen Israel inap siyahap eneptukmen eneg wereg angge famen Haren humalikisi windat eneptuk lahen fug,” ibag.

²⁴Ari ibagma NINIKNI Allahn Musa hiyag utuk lit, ”Ketiya Anden Mesir inap onowe ubam tuhuk ane yet hahun. Anden at indi akolap tuhukmu aren lalihip ulug hiyag hisahu. An ninggik ineyonen ware fusuhukmu folo-folo aliyek ulug yanggal henebuhu,” ulug Musa hiyag itfag.