Read Angguruk Yali KELUARAN 7 Bible Online

KELUARAN 7 - Angguruk Yali bible

KELUARAN 7

¹Hiyag itfagma NINIKNI Allahn Musa fam, ”Anden let habuhukmu hat o Mesir inap onowe olohotma An Allah hag toho welaruhunmu howe Harun ino hat fahet Allah amingmingangge nabi hag toho wereg lit hat hele lisoho ap suwon ino fam hiyag utuk laruhu.

²Anden nele hiyag hutuk lahiyon obog toho haren Harun fam hiyag utuk laruhunmu Harun inowen Israel inap o Mesir embeselug wilip amuhuben Mesir inap onowe fam hiyag utuk laruhu angge famen

³Anden ap suwon ino indi arikap tubusuhukmu holtuk laruhu fug. Anden Mesir inap iniline enehangge anggolo wal haruk lit aben tuk fug tohon eke hag eke hag turuk laruhuk angge famen at indi hebel aruhu fugmu

⁴Anden alem angginon ekeyon-ekeyon Mesir inap unubam emberuk lit An numalikisi Israel inap o Mesiren hondog eneplug wilip aruhuk.

⁵An ninggik ineyonen Mesir inap unusuruk lit Israel inap it enesehelimuwen hondog eneplug wilip aruhukmu Mesir inaben An nubahet Israel inap INIKNI Allah wereg ulug onoluk aruhu,” ulug NINIKNI Allahn Musa hiyag itfag.

⁶Hiyag itfagma Musa men Harun menen NINIKNI Allahn hiyag isibag ane hikit toho turuk latfag.

⁷Musa ino indag atfag sali mo ilig am wirig am turukmen teng hinahan 80 atfagma owe Harun oho indag atfahon famen mo teng hinahan nubam hilag piren 83 libagma Mesir inap onowe suwon fam nenele hiyag umul ulug ambeg libag.

⁸NINIKNI Allahn Musa men Harun men unubam ele uruk lit,

⁹”Mesir inap onowe suwon inowen, ’Tem toho hiyag nerehesa peminen enehangge eke niline wal haruk lamek,’ ulug heng henebuhu halug hat Musan Harun fam, ’Wanggun haren seneg lahenon aru ap suwon olohotman kinangma hik isamihin,’ ulug hiyag uruhunmu hik isarukmen pisanggo aruhu,” ulug hiyag isibag.

¹⁰Hiyag isibagma Musa men Harun men Mesir inap onowe weregma libareg NINIKNI Allahn hiyag isibag ane hikit toho Harun inowen ap suwon amingmingangge men onolohotman wanggun inggikmu seneg latfahon ino kinangma hik isarukmen pisanggo atfag.

¹¹Pisanggo atfagma ap suwon inowen alem obog toho onoluk inap men hal inap men wol enepfareg, ”Hiren oho wal hemek!” ibagma hal ane alem onoluk teg lit

¹²wal tanehen unuwanggun hik isarukmu pisanggo atfag angge famen wanggun Harunen hik isibahon inowen unuwanggun arimano abit pil-pil isibag.

¹³Ari turuk latfag angge famen NINIKNI Allahn ibag ane hikit toho ap suwon indi arik teg lit Musa men Harun menen hiyag utukon holtuk latfag fug.

¹⁴Mesir inap onowe inowen holfag fugmu NINIKNI Allahn Musa fam ele uruk lit, ”Mesir inap onowe suwon ino indi imbik wamburuk lit, ’Israel hinap lalihip,’ irisi fug.

¹⁵Ari fahet ap suwon ino likiyanet ik Nil ayegma larukmu haren wanggun pisanggo hag atisiyon ino hinggikmu seneg lit ap suwon olohotma ik Nil ayegma lahun.

¹⁶Lahunteg ap suwon ino fam hiyag uruhunon tu, ’Ibrani ninap NINIKNI Allah inowen hambeg mon naptisimu haren te, ’Lekman Hinikni ubam sembahyang ik lalihip,’ ulug hiyag nisamihinen hiyag hirik waharikik angge famen ketiya oho nele holtuk lahen fug.

¹⁷Ari fahet NINIKNI Allahn ele urukon tu holeg lamin, ’Anden hat hiline timin ane yet hamihinteg An nubahet Ibrani inap INIKNI Allah wereg ulug holuk atmisi. Wanggun tu fam ik Nil ware feminmu ik il mep atmisimu

¹⁸ikan ik ahummu werehon obog toho war atuk lit amben siyag turuken Mesir inaben ik na fug teg lamusa,’ uhun,” ulug Allahn Musa hiyag itfag.

¹⁹Nin eke Musa fam hiyag utuk lit, ”Howe Harun fam, ’Wanggun seneg lahenon aru ik suwonet toronet sene yenggelehonet fil leg hamihinmu ik obog toho il mep amusa,’ ulug hiyag itmihin. Aben fili fam, kubag fam ik hinanggoho werehon oho mep atmisi,” ulug hiyag itfag.

²⁰Ari ulug hiyag itfag ane hikit toho Musa men Harun men libareg Mesir inap onowe suwon amingmingangge men iniline Harunen wanggun fam ik Nil ware ferukmu mep atuk latfag.

²¹Mep atuk latfagma ikan ik ahummu werehon obog toho war atuk lit amben siyag anggolo turuken Mesir inaben ik na fug teg latfag. Ik obog toho Mesir kinangma werehon mep eneg atuk latfag.

²²Mep eneg atuk latfagma hal inap o Mesir werehon arimanowen oho hal fam wal haruk lit ik il mebap tibagma ap suwon inowen yet hibareg NINIKNI Allahn ibag ane hikit toho indi imbik wamburuk lit Musa men Harun menen hiyag itfahon holfag fug.

²³Holuk fug angge ibam libareg teko libag ane ino fahet tot oho wenggel haruk latfag fug.

²⁴Ik na fug tehen Mesir inap obog tohowen ik narukon ulug ik Nil ayegma kinang habultil laruk latfag.

²⁵NINIKNI Allahn ik Nil siyahap tibagma hup sabirenam atikim